Liber Exodus, 38

1. fecit et altare holocausti de lignis setthim quinque cubitorum per quadrum et trium in altitudine

1. Fecit et altare holocausti de lignis acaciae quinque cubi torum per quadrum et trium in altitudine,

2. cujus cornua de angulis procedebant operuitque illud æneis lamminis

2. cuius cornua de angulis procedebant; operuitque illud laminis aeneis.

3. et in usus ejus paravit ex ære vasa diversa lebetas forcipes fuscinulas uncinos et ignium receptacula

3. Et in usus eius paravit ex aere vasa diversa: lebetes, vatilla et pateras, fuscinulas et ignium receptacula.

4. craticulamque ejus in modum retis fecit æneam et subter eam in altaris medio arulam

4. Craticulamque eius in modum retis fecit aeneam subter marginem altaris ab imo usque ad medium eius,

5. fusis quattuor anulis per totidem retiaculi summitates ad inmittendos vectes ad portandum

5. fusis quattuor anulis per totidem craticulae summitates, ad immittendos vectes ad portandum.

6. quos et ipsos fecit de lignis setthim et operuit lamminis æneis

6. Quos et ipsos fecit de lignis acaciae et operuit laminis aeneis;

7. induxitque in circulos qui in altaris lateribus eminebant ipsum autem altare non erat solidum sed cavum ex tabulis et intus vacuum

7. induxitque in circulos, qui in lateribus altaris eminebant. Ipsum autem altare non erat solidum, sed cavum ex tabulis et intus vacuum.

8. fecit et labrum æneum cum base sua de speculis mulierum quæ excubabant in ostio tabernaculi

8. Fecit et labrum aeneum cum basi sua de speculis mulierum, quae excubabant in ostio tabernaculi conventus.

9. et atrium in cujus australi plaga erant tentoria de bysso retorta cubitorum centum

9. Fecit et atrium, in cuius australi plaga erant tentoria de bysso retorta cubitorum centum;

10. columnæ æneæ viginti cum basibus suis capita columnarum et tota operis celatura argentea

10. columnae aeneae viginti cum basibus suis; unci columnarum et anuli earum argentei.

11. æque ad septentrionalis plagam tentoria columnæ basesque et capita columnarum ejusdem et mensuræ et operis ac metalli erant

11. Aeque ad septentrionalem plagam tentoria, columnae basesque et unci anulique columnarum eiusdem mensurae et operis ac metalli erant.

12. in ea vero plaga quæ occidentem respicit fuere tentoria cubitorum quinquaginta columnæ decem cum basibus suis æneæ et capita columnarum celata argentea

12. In ea vero plaga, quae ad occidentem respicit, fuerunt tentoria cubitorum quinquaginta, columnae decem cum basibus suis; et unci columnarum anulique earum argentei.

13. porro contra orientem quinquaginta cubitorum paravit tentoria

13. Porro contra orientem quinquaginta cubitorum paravit tentoria,

14. e quibus quindecim cubitos columnarum trium cum basibus suis unum tenebat latus

14. e quibus quindecim cubitos columnarum trium cum basibus suis unum tenebat latus;

15. et in parte altera quia utraque introitum tabernaculi facit quindecim æque cubitorum erant tentoria columnæ tres et bases totidem

15. et in parte altera ­ quia inter utraque introitum tabernaculi fecit ­ quindecim aeque cubitorum erant tentoria columnaeque tres et bases totidem.

16. cuncta atrii tentoria byssus torta texuerat

16. Cuncta atrii tentoria in circuitu ex bysso retorta texuerat.

17. bases columnarum fuere æneæ capita autem earum cum celaturis suis argentea sed et ipsas columnas atrii vestivit argento

17. Bases columnarum fuere aeneae, unci autem earum et anuli earum argentei et capita earum vestivit argento et omnes columnas atrii cinxit anulis argenteis.

18. et in introitu ejus opere plumario fecit tentorium ex hyacintho purpura vermiculo ac bysso retorta quod habebat viginti cubitos in longitudine altitudo vero quinque cubitorum erat juxta mensuram quam cuncta atrii habebant tentoria

18. Et in introitu eius opere plumario fecit velum ex hyacintho, purpura, cocco ac bysso retorta; quod habebat viginti cubitos in longitudine, altitudo vero quinque cubitorum erat iuxta mensuram, quam cuncta atrii tentoria habebant.

19. columnæ autem ingressus fuere quattuor cum basibus æneis capitaque earum et celaturæ argenteæ

19. Columnae autem in ingressu fuere quattuor cum basibus aeneis, uncis argenteis; capitaque et anulos earum vestivit argento.

20. paxillos quoque tabernaculi et atrii per gyrum fecit æneos

20. Paxillos quoque habitaculi et atrii per gyrum fecit aeneos.

21. hæc sunt instrumenta tabernaculi testimonii quæ numerata sunt juxta præceptum Mosi in cærimonias Levitarum per manum Ithamar filii Aaron sacerdotis

21. Hic est census habitaculi, habitaculi testimonii, qui recensitus est iuxta praeceptum Moysi ministerio Levitarum per manum Ithamar filii Aaron sacerdotis.

22. quas Beselehel filius Uri filii Hur de tribu Juda Domino per Mosen jubente conpleverat

22. Beseleel filius Uri filii Hur de tribu Iudae fecit cuncta, quae praeceperat Dominus Moysi,

23. juncto sibi socio Hooliab filio Achisamech de tribu Dan qui et ipse artifex lignorum egregius fuit et polymitarius atque plumarius ex hyacintho purpura vermiculo et bysso

23. iuncto sibi socio Ooliab filio Achisamech de tribu Dan fabro et polymitario atque plumario ex hyacintho, purpura, cocco et bysso.

24. omne aurum quod expensum est in opere sanctuarii et quod oblatum in donariis viginti novem talentorum fuit et septingentorum triginta siclorum ad mensuram sanctuarii

24. Omne aurum, quod expensum est in opere sanctuarii et quod oblatum est in donariis, viginti novem talentorum fuit et septingentorum triginta siclorum ad mensuram sicli sanctuarii.

25. oblatum est autem ab his qui transierant ad numerum a viginti annis et supra de sescentis tribus milibus et quingentis quinquaginta armatorum

25. Argentum autem eorum, qui in congregatione recensiti sunt, centum talentorum fuit et mille septingentorum et septuaginta quinque siclorum ad mensuram sicli sanctuarii.

26. fuerunt præterea centum talenta argenti e quibus conflatæ sunt bases sanctuarii et introitus ubi velum pendet

26. Beca, id est dimidium sicli iuxta mensuram sicli sanctuarii, dedit quisquis transit ad censum a viginti annis et supra, de sescentis tribus milibus et quingentis quinquaginta armatorum.

27. centum bases factæ sunt de talentis centum singulis talentis per bases singulas supputatis

27. De talentis centum argenti conflatae sunt bases sanctuarii et veli, singulis talentis per bases singulas supputatis.

28. de mille autem septingentis et septuaginta quinque fecit capita columnarum quas et ipsas vestivit argento

28. De mille autem septingentis et septuaginta quinque siclis fecit uncos columnarum et vestivit capita earum et cinxit eas argento.

29. æris quoque oblata sunt talenta septuaginta duo milia et quadringenti supra sicli

29. Aeris quoque oblata sunt septuaginta talenta et duo milia et quadringenti sicli,

30. ex quibus fusæ sunt bases in introitu tabernaculi testimonii et altare æneum cum craticula sua omniaque vasa quæ ad usum ejus pertinent

30. ex quibus fecit bases in introitu tabernaculi conventus et altare aeneum cum craticula sua omniaque vasa, quae ad usum eius pertinent,

31. et bases atrii tam in circuitu quam in ingressu ejus et paxilli tabernaculi atque atrii per gyrum

31. et bases atrii tam in circuitu quam in ingressu eius et omnes paxillos habitaculi atque atrii per gyrum.