Epistula ad Ephesios, 1

1. Paulus apostolus Christi Jesu per voluntatem Dei sanctis omnibus qui sunt Ephesi et fidelibus in Christo Jesu

2. gratia vobis et pax a Deo Patre nostro et Domino Jesu Christo

3. benedictus Deus et Pater Domini nostri Jesu Christi qui benedixit nos in omni benedictione spiritali in cælestibus in Christo

4. sicut elegit nos in ipso ante mundi constitutionem ut essemus sancti et inmaculati in conspectu ejus in caritate

5. qui prædestinavit nos in adoptionem filiorum per Jesum Christum in ipsum secundum propositum voluntatis suæ

6. in laudem gloriæ gratiæ suæ in qua gratificavit nos in dilecto

7. in quo habemus redemptionem per sanguinem ejus remissionem peccatorum secundum divitias gratiæ ejus

8. quæ superabundavit in nobis in omni sapientia et prudentia

9. ut notum faceret nobis sacramentum voluntatis suæ secundum bonum placitum ejus quod proposuit in eo

10. in dispensationem plenitudinis temporum instaurare omnia in Christo quæ in cælis et quæ in terra sunt in ipso

11. in quo etiam sorte vocati sumus prædestinati secundum propositum ejus qui omnia operatur secundum consilium voluntatis suæ

12. ut simus in laudem gloriæ ejus qui ante speravimus in Christo

13. in quo et vos cum audissetis verbum veritatis evangelium salutis vestræ in quo et credentes signati estis Spiritu promissionis Sancto

14. qui est pignus hereditatis nostræ in redemptionem adquisitionis in laudem gloriæ ipsius

15. propterea et ego audiens fidem vestram quæ est in Domino Jesu et dilectionem in omnes sanctos

16. non cesso gratias agens pro vobis memoriam vestri faciens in orationibus meis

17. ut Deus Domini nostri Jesu Christi Pater gloriæ det vobis spiritum sapientiæ et revelationis in agnitione ejus

18. inluminatos oculos cordis vestri ut sciatis quæ sit spes vocationis ejus quæ divitiæ gloriæ hereditatis ejus in sanctis

19. et quæ sit supereminens magnitudo virtutis ejus in nos qui credidimus secundum operationem potentiæ virtutis ejus

20. quam operatus est in Christo suscitans illum a mortuis et constituens ad dexteram suam in cælestibus

21. supra omnem principatum et potestatem et virtutem et dominationem et omne nomen quod nominatur non solum in hoc sæculo sed et in futuro

22. et omnia subiecit sub pedibus ejus et ipsum dedit caput supra omnia ecclesiæ

23. quæ est corpus ipsius plenitudo ejus qui omnia in omnibus adimpletur