Liber Ecclesiasticus, 8
1. non litiges cum homine potente ne forte incidas in manus illius
1. Non litiges cum homine potente, ne forte incidas in manus illius.
2. non contendas cum viro locuplete ne forte contra consistat litem tibi
2. Non contendas cum viro locuplete, ne forte contra te constituat pondus tuum:
3. multos perdidit aurum atque argentum et usque cor regum extendit et convertit
3. multos enim perdidit aurum, et argentum etiam cor regum subvertit.
4. non litiges cum homine linguato et non strues in igne illius ligna
4. Non litiges cum homine linguato et non struas in ignem illius ligna.
5. non communices homini indocto ne male de progenie tua loquatur
5. Non communices homini indocto, ne contemnaris a principibus.
6. ne despicias hominem avertentem se a peccato neque inproperes ei memento quoniam omnes sumus in correptionem
6. Ne despicias hominem avertentem se a peccato neque improperes ei; memento quoniam omnes in correptione sumus.
7. ne spernas hominem in sua senecta etenim ex nobis senescunt
7. Ne spernas hominem in sua senectute, etenim ex nobis senescunt.
8. noli de mortuo gaudere sciens quoniam omnes morimur et in gaudium nolumus venire
8. Noli de mortuo inimico tuo gaudere; memento quoniam omnes morimur et in gaudium nolumus venire.
9. ne despicias narrationem presbyterorum sapientium et in proverbiis illorum conversare
9. Ne despicias narrationem presbyterorum sapientium et in proverbiis eorum conversare;
10. ab ipsis enim disces doctrinam intellectus et servire magnatis sine querella
10. ab ipsis enim disces sapientiam et doctrinam intellectus et servire magnatis sine querela.
11. non te prætereat narratio seniorum et ipsi enim didicerunt a patribus suis
11. Non te praetereat narratio seniorum: ipsi enim didicerunt a patribus suis;
12. quoniam ab ipsis disces intellectum et in tempore necessitatis responsum
12. quoniam ab ipsis disces intellectum et in tempore necessitatis dare responsum.
13. non incendas carbones peccatoris arguens eos ne incendaris flamma ignis peccatorum illorum
13. Non incendas carbones peccatorum arguens eos et ne incendaris flamma ignis peccatorum illorum.
14. ne contra faciem stes contumeliosi ne sedeat quasi insidiator ori tuo
14. Ne contra faciem stes contumeliosi, ne sedeat quasi insidiator ori tuo.
15. noli fenerare homini fortiori te quod si feneraveris tamquam perditum habe
15. Noli fenerari homini fortiori te; quod si feneraveris, quasi perditum habe.
16. non spondeas super virtutem tuam quod si spoponderis quasi restituens cogita
16. Non spondeas super virtutem tuam; quod si spoponderis, quasi restituens cogita.
17. non judices contra judicem quoniam secundum quod dignum est judicat
17. Non litiges contra iudicem, quoniam secundum placitum suum iudicat.
18. cum audace non eas in via ne forte gravet mala sua in te ipse enim secundum voluntatem suam vadit et simul cum stultitia illius peries
18. Cum audace non eas in via, ne forte aggraves mala tua: ipse enim secundum voluntatem suam vadit, et simul cum stultitia illius peries.
19. cum iracundo non facias rixam cum audace non eas in desertum quoniam quasi nihil est ante illum sanguis et ubi non est adiutorium elidet te
19. Cum iracundo non facias rixam et cum ipso non eas in desertum, quoniam quasi nihil est ante illum sanguis, et, ubi non est adiutorium, elidet te.
20. cum fatuis ne consilium habeas non enim poterunt diligere nisi quæ ipsis placent
20. Cum fatuis consilium non habeas; non enim poterunt occultare secretum tuum.
21. coram extraneo ne facias consilium nescis enim quid pariet
21. Coram extraneo nihil facias cautum; nescis enim quid pariet.
22. non omni homini cor tuum manifestes ne forte inferat tibi gratiam et convicietur tibi
22. Non omni homini cor tuum manifestes, ne forte repellas a te bonum.
