Liber Ecclesiasticus, 27
1. propter inopiam multi deliquerunt et qui quærit locupletari avertit oculum suum
1. Propter lucrum multi deliquerunt; et, qui quaerit locupletari, avertet oculum suum.
2. si in medio conpaginis lapidum palus figitur sic et inter medium venditionis et emptionis angustabitur peccatis
2. Sicut in medio compaginis lapidum palus figitur, sic et inter medium venditionis et emptionis constringitur peccatum.
3. conteretur delictum
3. []
4. si non in timore Domini tenueris instanter cito subvertetur domus tua
4. Si non in timore Domini tenueris te, instanter cito subvertetur domus tua.
5. si in pertusura cribri remanebit stercus sic aporia hominis in cogitatu illius
5. Sicut in percussura cribri remanent quisquiliae, sic peripsemata hominis in cogitatu illius.
6. vasa figuli probat fornax et homines justos temptatio tribulationis
6. Vasa figuli probat fornax, et homines iustos tentatio tribulationis.
7. sicut rusticatio de ligno ostendit fructum illius sic verbum excogitatum hominis cordis
7. Sicut rusticationem ligni ostendit fructus illius, sic verbum ex cogitatu cordis hominis.
8. ante sermonem non conlaudes virum hæc enim temptatio est hominum
8. Ante sermonem non laudes virum: haec enim tentatio est hominum.
9. si sequaris justitiam adprehendes illam et indues quasi poderem honoris et inhabitabis cum ea et proteget te in sempiternum et in die agnitionis invenies firmamentum
9. Si sequaris iustitiam, apprehendes illam et indues quasi poderem honoris et inhabitabis cum ea, et proteget te in sempiternum, et in die agnitionis invenies firmamentum.
10. volatilia ad sibi similia conveniunt et veritas ad eos qui operantur illam revertetur
10. Volatilia ad sibi similia conveniunt, et veritas ad eos, qui operantur illam, revertetur.
11. leo venationi insidiatur semper sic peccata operantibus iniquitates
11. Leo venationi insidiatur semper, sic peccata operantibus iniquitates.
12. homo sanctus in sapientia manet sicut sol nam stultus sicut luna inmutatur
12. Loquela timorati semper in sapientia manet; stultus autem sicut luna mutatur.
13. in medio insensatorum serva verbum tempori in medio autem cogitantium adsiduus esto
13. In medio insensatorum serva tempus, in medio autem cogitantium assiduus esto.
14. narratio peccantium odiosa et risus illorum delictis peccati
14. Loquela stultorum odiosa, et risus illorum in deliciis peccati.
15. loquella multum jurans horripilationem capiti statuet et inreverentia ipsius obturatio aurium
15. Loquacitas multum iurantis horripilationem capiti statuet, et rixa illorum obturatio aurium.
16. effusio sanguinis in rixa superborum et maledictio illorum auditus gravis
16. Effusio sanguinis rixa superborum, et maledictio illorum auditus gravis.
17. qui denudat arcana amici perdet fidem et non inveniet amicum ad animum suum
17. Qui denudat arcana, amici fidem perdit et non inveniet amicum ad animum suum:
18. dilige proximum et coniungere fide cum illo
18. dilige amicum et coniungere fide cum illo;
19. quod si denudaveris absconsa illius non persequeris post eum
19. quod, si denudaveris absconsa illius, non persequeris post eum.
20. sicut enim homo qui perdit amicum suum sic qui perdit amicitiam proximi sui
20. Sicut enim homo, qui extulit mortuum suum, sic et qui perdit amicitiam proximi sui;
21. et sicut qui dimittit avem de manu sua sic reliquisti proximum tuum et non eum capies
21. et sicut qui dimittit avem de manu sua, sic dereliquisti proximum tuum et non eum capies.
22. non illum sequaris quoniam longe abest effugit enim quasi caprea de laqueo quoniam vulnerata est
22. Non illum sequaris, quoniam longe abest; effugit enim quasi caprea de laqueo, quoniam vulnerata est anima eius;
23. conligare et maledicti est concordatio
23. ultra eum non poteris colligare. Et maledicti est concordatio,
24. denudare autem amici mysteria desperatio est
24. denudare autem amici mysteria amputatio spei est.
25. annuens oculo fabricat iniqua et nemo eum abiciet
25. Annuens oculo fabricat iniqua; qui novit eum, recedet ab illo.
26. in conspectu oculorum tuorum condulcabit os tuum et super sermones tuos admirabitur novissime autem pervertet os suum et in verbis tuis dabit scandalum
26. In conspectu oculorum tuorum condulcabit os suum et super sermones tuos admirabitur; novissime autem pervertet os suum et in verbis tuis dabit scandalum.
27. multa audivi et non coæquavi ei et Dominus odiet illum
27. Multa odivi et non coaequavi ei, et Dominus odiet illum.
28. qui in altum mittit lapidem super caput ejus cadet et plaga dolosi dividet vulnera
28. Qui in altum mittit lapidem, super caput eius cadet, et plaga dolosa dolosi dividet vulnera.
29. et qui foveam fodit in illam decidet et qui statuit lapidem proximo offendet in eo et qui laqueum alio peribit in illo
29. Qui foveam fodit, incidet in eam, et, qui statuit lapidem proximo, offendet in eo, et, qui laqueum alii ponit, capietur in illo.
30. facienti nequissimum super ipsum devolvetur et non agnoscet unde adveniat illi
30. Facienti nequissimum consilium, super ipsum devolvetur, et non agnoscet, unde adveniat illi.
31. inlusio et inproperium superborum et vindicta sicut leo insidiabitur illi
31. Illusio et improperium superbo, et vindicta sicut leo insidiabitur illi.
32. laqueo peribunt qui oblectantur casu justorum dolor autem consumet illos antequam moriantur
32. Laqueo capientur, qui oblectantur casu iustorum, dolor autem consumet illos, antequam moriantur.
33. ira et furor utraque execrabilia et vir peccator continens erit illorum
33. Ira et furor utraque exsecrabilia sunt, et vir peccator continens erit illorum.
