Liber Exodus, 26
1. tabernaculum vero ita fiet decem cortinas de bysso retorta et hyacintho ac purpura coccoque bis tincto variatas opere plumario facies
1. Habitaculum vero ita facies: decem cortinas de bysso re torta et hyacintho ac purpura coccoque cum cherubim opere polymito facies.
2. longitudo cortinæ unius habebit viginti octo cubitos latitudo quattuor cubitorum erit unius mensuræ fient universa tentoria
2. Longitudo cortinae unius habebit viginti octo cubitos, latitudo quattuor cubitorum erit. Unius mensurae fient universae cortinae.
3. quinque cortinæ sibi jungentur mutuo et aliæ quinque nexu simili coherebunt
3. Quinque cortinae sibi iungentur mutuo, et aliae quinque nexu simili cohaerebunt.
4. ansulas hyacinthinas in lateribus ac summitatibus facies cortinarum ut possint invicem copulari
4. Ansulas hyacinthinas in latere facies cortinae unius in extremitate iuncturae et similiter facies in latere cortinae extremae in iunctura altera.
5. quinquagenas ansulas cortina habebit in utraque parte ita insertas ut ansa contra ansam veniat et altera alteri possit aptari
5. Quinquaginta ansulas facies in cortina una et quinquaginta ansulas facies in summitate cortinae, quae est in iunctura altera, ita insertas, ut ansa contra ansam veniat.
6. facies et quinquaginta circulos aureos quibus cortinarum vela jungenda sunt ut unum tabernaculum fiat
6. Facies et quinquaginta fibulas aureas, quibus cortinarum vela iungenda sunt, ut unum habitaculum fiat.
7. facies et saga cilicina undecim ad operiendum tectum tabernaculi
7. Facies et saga cilicina undecim pro tabernaculo super habitaculum.
8. longitudo sagi unius habebit triginta cubitos et latitudo quattuor æqua erit mensura sagorum omnium
8. Longitudo sagi unius habebit triginta cubitos et latitudo quattuor; aequa erit mensura sagorum omnium.
9. e quibus quinque junges seorsum et sex sibi mutuo copulabis ita ut sextum sagum in fronte tecti duplices
9. E quibus quinque iunges seorsum et sex sibi mutuo copulabis, ita ut sextum sagum in fronte tecti duplices.
10. facies et quinquaginta ansas in ora sagi unius ut coniungi cum altero queat et quinquaginta ansas in ora sagi alterius ut cum altero copuletur
10. Facies et quinquaginta ansas in ora sagi ultimi iuncturae unius et quinquaginta ansas in ora sagi iuncturae alterius.
11. quinquaginta fibulas æneas quibus jungantur ansæ et unum ex omnibus operimentum fiat
11. Facies et quinquaginta fibulas aeneas, quibus iungantur ansae, ut unum ex omnibus tabernaculum fiat.
12. quod autem superfuerit in sagis quæ parantur tecto id est unum sagum quod amplius est ex medietate ejus operies posteriora tabernaculi
12. Quod autem superfuerit in sagis, quae parantur tecto, id est unum sagum, quod amplius est, ex medietate eius operies posteriora habitaculi;
13. et cubitus ex una parte pendebit et alter ex altera qui plus est in sagorum longitudine utrumque latus tabernaculi protegens
13. et cubitus ex una parte pendebit, et alter ex altera, qui plus est in longitudine sagorum tabernaculi utrumque latus habitaculi protegens.
14. facies et operimentum aliud tecto de pellibus arietum rubricatis et super hoc rursum aliud operimentum de janthinis pellibus
14. Facies et operimentum aliud pro tabernaculo de pellibus arietum rubricatis et super hoc rursum aliud operimentum de pellibus delphini.
15. facies et tabulas stantes tabernaculi de lignis setthim
15. Facies et tabulas stantes habitaculi de lignis acaciae,
16. quæ singulæ denos cubitos in longitudine habeant et in latitudine singulos ac semissem
16. quae singulae denos cubitos in longitudine habeant et in latitudine singulos ac semissem.
17. in lateribus tabulæ duæ incastraturæ fient quibus tabula alteri tabulæ conectatur atque in hunc modum cunctæ tabulæ parabuntur
17. In tabula una duo pedes fient, quibus tabula alteri tabulae conectatur; atque in hunc modum cunctae tabulae habitaculi parabuntur.
18. quarum viginti erunt in latere meridiano quod vergit ad austrum
18. Quarum viginti erunt in latere meridiano, quod vergit ad austrum;
19. quibus quadraginta bases argenteas fundes ut binæ bases singulis tabulis per duos angulos subiciantur
19. quibus quadraginta bases argenteas fundes, ut binae bases singulis pedibus singularum tabularum subiciantur.
20. in latere quoque secundo tabernaculi quod vergit ad aquilonem viginti tabulæ erunt
20. In latere quoque secundo habitaculi, quod vergit ad aquilonem, viginti tabulae erunt,
21. quadraginta habentes bases argenteas binæ bases singulis tabulis subponentur
21. quadraginta habentes bases argenteas; binae bases singulis tabulis supponentur.
22. ad occidentalem vero plagam tabernaculi facies sex tabulas
22. Ad occidentalem vero plagam in tergo habitaculi facies sex tabulas;
23. et rursum alias duas quæ in angulis erigantur post tergum tabernaculi
23. et rursum alias duas, quae in angulis erigantur, post tergum habitaculi.
24. eruntque coniunctæ a deorsum usque sursum et una omnes conpago retinebit duabus quoque tabulis quæ in angulis ponendæ sunt similis junctura servabitur
24. Eruntque geminae a deorsum usque sursum in compaginem unam; ita erit duabus istis, pro duabus angulis erunt.
25. et erunt simul tabulæ octo bases earum argenteæ sedecim duabus basibus per unam tabulam supputatis
25. Et erunt simul tabulae octo, bases earum argenteae sedecim, duabus basibus per unam tabulam supputatis.
26. facies et vectes de lignis setthim quinque ad continendas tabulas in uno latere tabernaculi
26. Facies et vectes de lignis acaciae, quinque ad continendas tabulas in uno latere habitaculi
27. et quinque alios in altero et ejusdem numeri ad occidentalem plagam
27. et quinque alios in altero et eiusdem numeri in tergo ad occidentalem plagam;
28. qui mittentur per medias tabulas a summo usque ad summum
28. vectis autem medius transibit per medias tabulas a summo usque ad summum.
29. ipsasque tabulas deaurabis et fundes eis anulos aureos per quos vectes tabulata contineant quos operies lamminis aureis
29. Ipsasque tabulas deaurabis et fundes eis anulos aureos, per quos vectes tabulata contineant, quos operies laminis aureis.
30. et eriges tabernaculum juxta exemplum quod tibi in monte monstratum est
30. Et eriges habitaculum iuxta exemplar, quod tibi in monte monstratum est.
31. facies et velum de hyacintho et purpura coccoque bis tincto et bysso retorta opere plumario et pulchra varietate contextum
31. Facies et velum de hyacintho et purpura coccoque et bysso retorta, opere polymito, cum cherubim intextis.
32. quod adpendes ante quattuor columnas de lignis setthim quæ ipsæ quidem deauratæ erunt et habebunt capita aurea sed bases argenteas
32. Quod appendes in quattuor columnis de lignis acaciae, quae ipsae quidem deauratae erunt et habebunt uncos aureos, sed bases argenteas.
33. inseretur autem velum per circulos intra quod pones arcam testimonii et quo sanctuarium et sanctuarii sanctuaria dividentur
33. Inseres autem velum subter fibulas, intra quod pones arcam testimonii et quo sanctum et sanctum sanctorum dividentur.
34. pones et propitiatorium super arcam testimonii in sancta sanctorum
34. Pones et propitiatorium super arcam testimonii in sancto sanctorum
35. mensamque extra velum et contra mensam candelabrum in latere tabernaculi meridiano mensa enim stabit in parte aquilonis
35. mensamque extra velum et contra mensam candelabrum in latere habitaculi meridiano; mensa enim stabit in parte aquilonis.
36. facies et tentorium in introitu tabernaculi de hyacintho et purpura coccoque bis tincto et bysso retorta opere plumarii
36. Facies et velum in introitu tabernaculi de hyacintho et purpura coccoque et bysso retorta opere plumarii.
37. et quinque columnas deaurabis lignorum setthim ante quas ducetur tentorium quarum erunt capita aurea et bases æneæ
37. Et quinque columnas deaurabis lignorum acaciae, ante quas ducetur velum, quarum erunt unci aurei et bases aeneae.
