Liber Exodus, 35
1. igitur congregata omni turba filiorum Israël dixit ad eos hæc sunt quæ jussit Dominus fieri
1. Igitur, congregato omni coetu filiorum Israel, dixit ad eos: “Haec sunt, quae iussit Dominus fieri:
2. sex diebus facietis opus septimus dies erit vobis sanctus sabbatum et requies Domini qui fecerit opus in eo occidetur
2. sex diebus facietis opus, septimus dies erit vobis sanctus, sabbatum et requies Domino; qui fecerit opus in eo, occidetur.
3. non succendetis ignem in omnibus habitaculis vestris per diem sabbati
3. Non succendetis ignem in omnibus habitaculis vestris per diem sabbati”.
4. et ait Moses ad omnem catervam filiorum Israël iste est sermo quem præcepit Dominus dicens
4. Et ait Moyses ad omnem coetum filiorum Israel: “Iste est sermo, quem praecepit Dominus dicens:
5. separate apud vos primitias Domino omnis voluntarius et proni animi offerat eas Domino aurum et argentum et æs
5. "Separate apud vos donaria Domino". Omnis voluntarius et proni animi offerat ea Domino: aurum et argentum et aes,
6. hyacinthum purpuram coccumque bis tinctum et byssum pilos caprarum
6. hyacinthum et purpuram coccumque et byssum, pilos caprarum
7. et pelles arietum rubricatas et janthinas
7. et pelles arietum rubricatas et pelles delphini, ligna acaciae
8. ligna setthim
8. et oleum ad luminaria concinnanda et aromata, ut conficiatur unguentum et thymiama suavissimum,
9. et oleum ad luminaria concinnanda et ut conficiatur unguentum et thymiama suavissimum
9. lapides onychinos et gemmas ad ornatum ephod et pectoralis.
10. lapides onychinos et gemmas ad ornatum superumeralis et rationalis
10. Quisquis vestrum sapiens est, veniat et faciat, quod Dominus imperavit,
11. quisquis vestrum est sapiens veniat et faciat quod Dominus imperavit
11. habitaculum scilicet et tentorium eius atque operimentum, fibulas et tabulata cum vectibus, columnas et bases;
12. tabernaculum scilicet et tectum ejus atque operimentum anulos et tabulata cum vectibus paxillos et bases
12. arcam et vectes, propitiatorium et velum, quod ante illud oppanditur;
13. arcam et vectes propitiatorium et velum quod ante illud oppanditur
13. mensam cum vectibus et vasis et propositionis panibus;
14. mensam cum vectibus et vasis et propositionis panibus
14. candelabrum ad luminaria sustentanda, vasa illius et lucernas et oleum ad nutrimenta luminarium;
15. candelabrum ad luminaria sustentanda vasa illius et lucernas et oleum ad nutrimenta ignium
15. altare thymiamatis et vectes et oleum unctionis et thymiama ex aromatibus; velum ad ostium habitaculi;
16. altare thymiamatis et vectes oleum unctionis et thymiama ex aromatibus tentorium ad ostium tabernaculi
16. altare holocausti et craticulam eius aeneam cum vectibus et vasis suis, labrum et basim eius;
17. altare holocausti et craticulam ejus æneam cum vectibus et vasis suis labrum et basim ejus
17. cortinas atrii cum columnis et basibus, velum in foribus atrii;
18. cortinas atrii cum columnis et basibus tentorium in foribus vestibuli
18. paxillos habitaculi et atrii cum funiculis suis;
19. paxillos tabernaculi et atrii cum funiculis suis
19. vestimenta texta, quorum usus est in ministerio sanctuarii, vestes sanctas Aaron pontificis ac vestes filiorum eius, ut sacerdotio fungantur mihi”.
20. vestimenta quorum usus est in ministerio sanctuarii vestes Aaron pontificis ac filiorum ejus ut sacerdotio fungantur mihi
20. Egressus est omnis coetus filiorum Israel de conspectu Moysi,
21. egressaque omnis multitudo filiorum Israël de conspectu Mosi
21. et venit, quisquis erat mentis promptissimae, et attulit sponte sua donaria Domino ad faciendum opus tabernaculi conventus et quidquid ad cultum et ad vestes sanctas necessarium erat.
22. obtulit mente promptissima atque devota primitias Domino ad faciendum opus tabernaculi testimonii quicquid in cultum et ad vestes sanctas necessarium erat
22. Viri cum mulieribus, omnes voluntarii praebuerunt fibulas et inaures, anulos et dextralia; omne vas aureum in donaria Domini separatum est.
23. viri cum mulieribus præbuerunt armillas et inaures anulos et dextralia omne vas aureum in donaria Domini separatum est
23. Si quis habebat hyacinthum et purpuram coccumque, byssum et pilos caprarum, pelles arietum rubricatas et pelles delphini,
24. si quis habuit hyacinthum purpuram coccumque bis tinctum byssum et pilos caprarum pelles arietum rubricatas et janthinas
24. argenti aerisque metalla, obtulerunt Domino lignaque acaciae in varios usus.
25. argenti et æris metalla obtulerunt Domino lignaque setthim in varios usus
25. Sed et mulieres eruditae dederunt, quae neverant, hyacinthum, purpuram et coccum ac byssum
26. sed et mulieres doctæ dederunt quæ neverant hyacinthum purpuram et vermiculum ac byssum
26. et pilos caprarum, sponte propria cuncta tribuentes.
27. et pilos caprarum sponte propria cuncta tribuentes
27. Principes vero obtulerunt lapides onychinos et gemmas ad ephod et pectorale
28. principes vero obtulerunt lapides onychinos et gemmas ad superumerale et rationale
28. aromataque et oleum ad luminaria concinnanda et ad praeparandum unguentum ac thymiama odoris suavissimi componendum.
29. aromataque et oleum ad luminaria concinnanda et ad præparandum unguentum ac thymiama odoris suavissimi conponendum
29. Omnes viri et mulieres mente prompta obtulerunt donaria, ut fierent opera, quae iusserat Dominus per manum Moysi. Cuncti filii Israel voluntaria Domino dedicaverunt.
30. omnes viri et mulieres mente devota obtulerunt donaria ut fierent opera quæ jusserat Dominus per manum Mosi cuncti filii Israël voluntaria Domino dedicaverunt
30. Dixitque Moyses ad filios Israel: “Ecce vocavit Dominus ex nomine Beseleel filium Uri filii Hur de tribu Iudae;
31. dixitque Moses ad filios Israël ecce vocavit Dominus ex nomine Beselehel filium Uri filii Hur de tribu Juda
31. implevitque eum spiritu Dei, sapientia et intellegentia et scientia ad omne opus,
32. implevitque eum spiritu Dei sapientiæ et intellegentiæ et scientiæ omni doctrina
32. ad excogitandum et faciendum opus in auro et argento et aere,
33. ad excogitandum et faciendum opus in auro et argento et ære sculpendisque lapidibus et opere carpentario quicquid fabre adinveniri potest
33. ad scindendum et includendum gemmas et ad sculpendum ligna, quidquid fabre adinveniri potest.
34. dedit in corde ejus Hooliab quoque filium Achisamech de tribu Dan
34. Dedit quoque in corde eius, ut alios doceret, ipsi et Ooliab filio Achisamech de tribu Dan.
35. ambos erudivit sapientia ut faciant opera abietarii polymitarii ac plumarii de hyacintho et purpura coccoque bis tincto et bysso et texant omnia ac nova quæque repperiant
35. Ambos implevit sapientia, ut faciant opera fabri polymitarii ac plumarii de hyacintho ac purpura coccoque et bysso et textoris, facientes omne opus ac nova quaeque reperientes”.
