Liber Ecclesiasticus, 7

1. noli facere mala et non te adprehendent

1. Noli facere mala, et mala non te apprehendent;

2. discede ab iniquo et deficient mala abs te

2. discede ab iniquitate, et deficiet abs te.

3. non semines mala in sulcis iniuriæ et non metes ea in septuplum

3. Fili, non semines in sulcis iniustitiae et non metes ea in septuplum.

4. noli quærere ab homine ducatum neque a rege cathedram honoris

4. Noli quaerere a Domino ducatum neque a rege cathedram honoris.

5. non te justifices ante Deum quoniam agnitor cordis ipse est et penes regem noli velle videri sapiens

5. Non te iustifices ante Deum, quoniam agnitor cordis ipse est; et penes regem noli velle videri sapiens.

6. noli quærere fieri judex nisi si valeas virtute inrumpere iniquitates ne forte extimescas faciem potentis et ponas scandalum in agilitate tua

6. Noli quaerere fieri iudex, nisi valeas virtute irrumpere iniquitates; ne forte extimescas faciem potentis et ponas scandalum in aequitate tua.

7. non pecces in multitudinem civitatis nec te inmittas in populum

7. Non pecces in multitudinem civitatis nec te immittas in populum.

8. neque alliges duplicia peccata nec enim in uno eris inmunis

8. Neque alliges duplicia peccata; nec enim in uno eris immunis.

9. noli esse pusillanimis in anima tua

9. Noli esse pusillanimis in oratione tua;

10. exorare et facere elemosynam non despicias

10. exorare et facere eleemosynam ne despicias.

11. ne dicas in multitudine munerum meorum respiciet Deus et offerentem me Deo altissimo suscipiet munera mea

11. Ne dicas: “In multitudine munerum meorum respiciet Deus et, offerente me Deo altissimo, munera mea suscipiet”.

12. non inrideas hominem in amaritudine animæ est enim qui humiliat et exaltat circumspector Deus

12. Non irrideas hominem in amaritudine animae; est enim, qui humiliat et exaltat, circumspector Deus.

13. noli amare mendacium adversus fratrem tuum neque amico similiter facias

13. Noli arare mendacium adversus fratrem tuum neque in amicum similiter facias.

14. noli velle mentiri omne mendacium adsiduitas enim illius non bona

14. Noli velle mentiri omne mendacium, assiduitas enim illius non est bona.

15. noli verbosus esse in multitudine presbyterorum et non iteres verbum in tua oratione

15. Noli verbosus esse in multitudine presbyterorum et non iteres verbum in oratione tua.

16. non oderis laboriosa opera et rusticationem ab Altissimo creatam

16. Non oderis laboriosa opera et rusticationem creatam ab Altissimo.

17. non te reputes in multitudine indisciplinatorum

17. Non te reputes in multitudine indisciplinatorum;

18. memento iræ quoniam non tardabit

18. memento irae, quoniam non tardabit.

19. humilia valde spiritum tuum quoniam vindicta carnis impii ignis et vermes

19. Humilia valde spiritum tuum, quoniam vindicta carnis impii ignis et vermis.

20. noli prævaricari in amicum pecunia differenti neque fratrem carissimum auro spreveris

20. Noli commutare amicum cum pecunia neque fratrem carissimum cum auro Ophir.

21. noli discedere a muliere sensata et bona quam sortitus es in timore Dei gratia enim verecundiæ illius super aurum

21. Noli discedere a muliere sensata et bona, quam sortitus es in timore Domini; gratia enim verecundiae illius super aurum.

22. non lædas servum operantem in veritate neque mercennarium dantem animam suam

22. Non laedas servum operantem in veritate neque mercennarium dantem animam suam.

23. servus sensatus dilectus quasi anima tua non defraudes illum libertate neque inopem derelinquas illum

23. Servus sensatus sit tibi dilectus quasi anima tua; non defraudes illum libertate neque inopem derelinquas illum.

24. pecora tibi sunt adtende illis et si sunt utilia perseverent apud te

24. Pecora tibi sunt? Attende illis, et, si sunt utilia, perseverent apud te.

25. filii tibi sunt erudi illos et curva illos a pueritia illorum

25. Filii tibi sunt? Erudi illos et curva a pueritia cervicem illorum.

26. filiæ tibi sunt serva corpus illarum et non ostendas hilarem faciem tuam ad illas

26. Filiae tibi sunt? Serva corpus illarum et non ostendas hilarem faciem tuam ad illas.

27. trade filiam et grande opus feceris et homini sensato da illam

27. Trade filiam, et grande opus feceris, et homini sensato da illam.

28. mulier si est tibi secundum animam tuam non proicias illam et odibili non credas te in toto corde

28. Mulier si est tibi secundum animam tuam, non proicias illam, sed odibili non credas teipsum. In toto corde tuo

29. honora patrem tuum et gemitus matris tuæ ne obliviscaris

29. honora patrem tuum et gemitus matris tuae ne obliviscaris.

30. memento quoniam nisi per illos non fuisses et retribue illis quomodo et illi tibi

30. Memento quoniam, nisi per illos, natus non fuisses; et quid retribues illis, quomodo et illi tibi?

31. in tota anima tua time Deum et sacerdotes illius sanctifica

31. In tota anima tua time Dominum et sacerdotes illius sanctifica.

32. in omni virtute dilige eum qui te fecit et ministros ejus non derelinquas

32. In omni virtute tua dilige eum, qui te fecit, et ministros eius ne derelinquas.

33. honora Deum ex tota anima tua et honorifica sacerdotes et propurga te cum brachiis

33. Honora Deum ex tota anima tua et honorifica sacerdotes.

34. da illi partem sicut mandatum est tibi primitiarum et purgationis et de neglegentia purga te cum paucis

34. Da illis partem, sicut mandatum est tibi, primitiarum et purgationis et de neglegentia

35. datum brachiorum tuorum et sacrificium sanctificationis offers initia sanctorum

35. et armum in oblationem et sacrificium sanctificationis et primitias sanctorum.

36. et pauperi porrige manum tuam ut perficiatur propitiatio et benedictio tua

36. Et pauperi porrige manum tuam, ut perficiatur propitiatio et benedictio tua.

37. gratia datus in conspectu omnis viventis et mortuo non prohibeas gratiam

37. Gratia dati in conspectu omnis viventis, sed et mortuo non prohibeas gratiam.

38. non desis plorantibus in conrogatione et cum lugentibus ambula

38. Non desis plorantibus in consolatione et cum lugentibus luge.

39. non te pigeat visitare infirmum ex his enim in dilectione firmaberis

39. Non te pigeat visitare infirmum, ex his enim in dilectione firmaberis.

40. in omnibus operibus tuis memorare novissima tua et in æternum non peccabis

40. In omnibus operibus tuis memorare novissima tua et in aeternum non peccabis.