Liber Ecclesiasticus, 4
1. fili elemosynam pauperis ne fraudes et oculos tuos ne transvertas a paupere
1. Fili, eleemosynam pauperis ne defraudes et oculos tuos ne transvertas a paupere.
2. animam esurientem ne despexeris et non exasperes pauperem in inopia sua
2. Animam esurientem ne contristaveris et non exasperes pauperem in inopia sua.
3. cor inopis ne adflixeris et non protrahas datum angustianti
3. Cor inopis ne afflixeris et non protrahas datum angustianti.
4. rogationem contribulati ne abicias et non avertas faciem tuam ab egeno
4. Rogationem contribulati ne abicias et non avertas faciem tuam ab egeno.
5. ab inope ne avertas oculos propter iram et non relinquas quærentibus tibi retro maledicere
5. Ab inope ne avertas oculos tuos propter iram et non des ei locum tibi retro maledicendi;
6. maledicentis enim te in amaritudine exaudietur precatio illius exaudiet autem eum qui fecit illum
6. maledicentis enim tibi in amaritudine animae, exaudietur precatio illius: exaudiet autem eum, qui fecit illum.
7. congregationi pauperum affabilem te facito et presbytero humilia animam tuam et magnato humilia caput tuum
7. Congregationi affabilem te facito et presbytero humilia animam tuam et magnato humilia caput tuum.
8. declina pauperi aurem tuam et redde debitum tuum et responde pacifica in mansuetudine
8. Declina pauperi sine tristitia aurem tuam et redde debitum tuum et responde illi pacifica in mansuetudine.
9. libera eum qui iniuriam patitur de manu superbi et non acide feras in anima tua
9. Libera eum, qui iniuriam patitur, de manu opprimentis eum et non acide feras in anima tua in iudicando.
10. in judicando esto pupillis misericors ut pater et pro viro matri illorum
10. Esto pupillis misericors ut pater et pro viro matri illorum;
11. et eris velut filius Altissimi obaudiens et miserebitur tui magis quam mater
11. et eris velut filius Altissimi oboediens, et miserebitur tui magis quam mater.
12. sapientia filiis suis vitam inspiravit et suscipit exquirentes se et præibit in viam justitiæ
12. Sapientia filiis suis vitam inspiravit et suscipit inquirentes se.
13. et qui illam diligit diligit vitam et qui vigilaverint ad illam conplectebuntur placorem ejus
13. Qui illam diligit, diligit vitam; et, qui vigilaverint ad illam, complectentur placorem a Domino.
14. qui tenuerint illam vitam hereditabunt et quo introibit benedicit Deus
14. Qui tenuerint illam, gloriam hereditabunt, et, quo introibit, benedicet Deus.
15. qui serviunt ei obsequentes erunt Sancto et eos qui diligunt illam diligit Deus
15. Qui serviunt ei, obsequentes erunt Sancto, et eos, qui diligunt illam, diligit Deus.
16. qui audit illam judicat gentes et qui intuetur illam permanebit confidens
16. Qui audit illam, iudicabit gentes; et, qui intuetur illam, permanebit confidens.
17. si crediderit ei hereditabit illam et erunt in confirmatione creaturæ illorum
17. Si crediderit ei, hereditabit illam, et erunt in possessione generationes illius.
18. quoniam in temptatione ambulat cum eo et in primis eligit eum
18. Quoniam in simulatione ambulat cum eo et in primis explorat eum,
19. timorem et metum et adprobationem inducet super illum et cruciabit illum in tribulatione doctrinæ suæ donec temptet illum in cogitationibus illius et credat animæ illius
19. timorem et tremorem inducet super illum et probabit illum in tentatione doctrinae suae, donec ipse teneat eam in cogitationibus suis et credat animae illius.
20. et firmabit illum et iterum adducet directum ad illum
20. Et redibit recta ad illum et firmabit illum et laetificabit illum
21. et denudat absconsa sua et thesaurizat super illum scientiam et intellectum justitiæ
21. et denudabit illi absconsa sua et thesaurizabit super illum scientiam et intellectum iustitiae.
22. si autem oberraverit derelinquet eum et tradet illum in manus inimici sui
22. Si autem oberraverit, derelinquet eum et tradet eum in manus inimici sui.
23. fili conserva tempus et devita a malo
23. Fili, observa tempus et devita a malo
24. pro anima tua non confundaris dicere verum
24. et pro anima tua ne confundaris;
25. est enim confusio adducens peccatum et est confusio adducens gloriam et gratiam
25. est enim confusio adducens peccatum, et est confusio adducens gloriam et gratiam.
26. ne accipias faciem adversus faciem tuam nec adversus animam tuam mendacium
26. Ne accipias faciem adversus animam tuam nec adversus animam tuam mendacium.
27. non reverearis proximum tuum in casum suum
27. Ne reverearis proximum tuum in casu suo
28. nec retineas verbum in tempus salutis non abscondas sapientiam tuam in decore ejus
28. nec retineas verbum in tempore suo; non abscondas sapientiam tuam in decorem.
29. in lingua enim agnoscitur sapientia et sensus et scientia et doctrina in verbis veritatis et firmamentum in operibus justitiæ
29. In verbo enim agnoscitur sapientia, et sensus in responsione linguae.
30. non contradicas veritati ullo modo et de mendacio ineruditionis tuæ confundere
30. Non contradicas verbo veritatis ullo modo et de ineruditione tua confundere.
31. non confundaris confiteri peccata tua et ne subicias te homini pro peccato
31. Non confundaris confiteri peccata tua et ne subicias te omni homini pro peccato.
32. noli resistere contra faciem potentis nec coneris contra ictum fluvii
32. Noli resistere contra faciem potentis nec coneris contra ictum fluvii.
33. pro justitia agoniare pro anima tua et usque ad mortem certa pro justitia et Deus expugnabit pro te inimicos tuos
33. Usque ad mortem agonizare pro iustitia, et Deus expugnabit pro te inimicos tuos.
34. noli citatus esse in lingua tua et inutilis et remissus in operibus tuis
34. Noli citatus esse in lingua tua et pavidus et remissus in operibus tuis.
35. noli esse sicut leo in domo tua evertens domesticos tuos et opprimens subiectos tibi
35. Noli esse sicut leo in domo tua evertens domesticos tuos et opprimens subiectos tibi.
36. non sit porrecta manus tua ad accipiendum et ad reddendum collecta
36. Non sit porrecta manus tua ad accipiendum et ad dandum collecta.
