Liber Ecclesiasticus, 24

1. sapientiæ laus sapientia laudabit animam suam et in Deo honorabitur et in medio populi sui gloriabitur

1. Laus sapientiae. Sapientia laudabit animam suam et in Deo honorabitur et in medio populi sui gloriabitur

2. et in ecclesiis Altissimi aperiet os suum et in conspectu virtutis illius gloriabitur

2. et in ecclesia Altissimi aperiet os suum et in conspectu virtutis illius gloriabitur

3. in medio populo exaltabitur et in plenitudine sancta admirabitur

3. et in medio populi sui exaltabitur et in plenitudine sancta admirabitur

4. in multitudine electorum habebit laudem et inter benedictos benedicetur dicens

4. et in multitudine electorum habebit laudem et inter benedictos benedicetur dicens:

5. ego ex ore Altissimi prodivi primogenita ante omnem creaturam

5. “Ego ex ore Altissimi prodivi, primogenita ante omnem creaturam.

6. ego in cælis feci ut oriretur lumen indeficiens et sicut nebula texi omnem terram

6. Ego feci in caelis, ut oriretur lumen indeficiens, et sicut nebula texi omnem terram.

7. ego in altis habitavi et thronus meus in columna nubis

7. Ego in altissimis habitavi, et thronus meus in columna nubis.

8. gyrum cæli circuivi sola et in profundum abyssi penetravi et in fluctibus maris ambulavi

8. Gyrum caeli circuivi sola et in profundum abyssi ambulavi,

9. et in omni terra steti et in omni populo

9. in fluctibus maris et in omni terra steti

10. et in omni gente primatum habui

10. et in omni populo et in omni gente primatum habui

11. et omnium excellentium et humilium corda virtute calcavi et in his omnibus requiem quæsivi et in hereditate ejus morabor

11. et omnium excellentium et humilium corda virtute calcavi. In his omnibus requiem quaesivi: cuius in hereditate morabor?

12. tunc præcepit et dixit mihi creator omnium et qui creavit me requievit in tabernaculo meo

12. Tunc praecepit et dixit mihi Creator omnium, et, qui creavit me, quietem dedit tabernaculo meo

13. et dixit mihi in Jacob inhabita et in Israël hereditare et in electis meis ede radices

13. et dixit mihi: “In Iacob inhabita et in Israel hereditare et in electis meis mitte radices”.

14. ab initio ante sæculum creata sum et usque ad futurum sæculum non desinam et in habitatione sancta coram ipso ministravi

14. Ab initio ante saecula creata sum et usque ad futurum saeculum non desinam.

15. et sic in Sion firmata sum et in civitate sanctificata similiter requievi et in Hierusalem potestas mea

15. Et in tabernaculo sancto coram ipso ministravi, et sic in Sion firmata sum et in civitate similiter dilecta requievi, et in Ierusalem potestas mea.

16. et radicavi in populo honorificato et in parte Dei mei hereditas illius et in plenitudine sanctorum detentio mea

16. Et radicavi in populo honorificato et in parte Domini, in hereditate illius, et in plenitudine sanctorum detentio mea.

17. quasi cedrus exaltata sum in Libano et quasi cypressus in monte Sion

17. Quasi cedrus exaltata sum in Libano, et quasi cupressus in montibus Hermon.

18. et quasi palma exaltata sum in Cades et quasi plantatio rosæ in Hiericho

18. Quasi palma exaltata sum in Engaddi, et quasi plantatio rosae in Iericho.

19. quasi oliva speciosa in campis et quasi platanus exaltata sum juxta aquam in plateis

19. Quasi oliva speciosa in campis, et quasi platanus exaltata sum iuxta aquam in plateis.

20. sicut cinnamomum et aspaltum aromatizans odorem dedi quasi murra electa dedi suavitatem odoris

20. Sicut cinnamomum et balsamum aromatizans odorem dedi; quasi myrrha electa dedi suavitatem odoris.

21. et quasi storax et galbanus et ungula et gutta et quasi libanus non incisus vaporavi habitationem meam et quasi balsamum non mixtum odor meus

21. Et quasi storax et galbanus et ungula et gutta, et quasi libani vapor in tabernaculo.

22. ego quasi terebinthus extendi ramos meos et rami mei honoris et gratiæ

22. Ego quasi terebinthus extendi ramos meos, et rami mei rami honoris et gratiae.

23. ego quasi vitis fructificavi suavitatem odoris et flores mei fructus honoris et honestatis

23. Ego quasi vitis germinavi gratiam, et flores mei fructus honoris et honestatis.

24. ego mater pulchræ dilectionis et timoris et agnitionis et sanctæ spei

24. Ego mater pulchrae dilectionis et timoris et agnitionis et sanctae spei.

25. in me gratia omnis vitæ et veritatis in me omnis spes vitæ et virtutis

25. In me gratia omnis viae et veritatis, in me omnis spes vitae et virtutis.

26. transite ad me omnes qui concupiscitis me et a generationibus meis implemini

26. Transite ad me, omnes, qui concupiscitis me, et a generationibus meis implemini.

27. spiritus enim meus super melle dulcis et hereditas mea super mel et favum

27. Doctrina enim mea super mel dulcis, et hereditas mea super mel et favum;

28. memoria mea in generatione sæculorum

28. memoria mea in generationes saeculorum.

29. qui edunt me adhuc esurient et qui bibunt me adhuc sitient

29. Qui edunt me, adhuc esurient; et, qui bibunt me, adhuc sitient.

30. qui audit me non confundetur et qui operantur in me non peccabunt

30. Qui audit me, non confundetur; et, qui operantur in me, non peccabunt:

31. qui elucidant me vitam æternam habebunt

31. qui elucidant me, vitam aeternam habebunt”.

32. hæc omnia liber vitæ testamentum Altissimi et agnitio veritatis

32. Haec omnia liber testamenti Altissimi,

33. legem mandavit Moses in præceptis justitiarum et hereditatem domui Jacob et Israël promissionis

33. lex, quam mandavit nobis Moyses, hereditas domui Iacob.

34. posuit David puero suo excitare regem ex ipso fortissimum in throno honoris sedentem in sempiternum

34. Posuit David puero suo excitare regem ex ipso fortissimum, et in throno honoris sedentem in sempiternum.

35. qui implet quasi Phison sapientiam et sicut Tigris in diebus novorum

35. Lex, quae implet quasi Phison sapientiam et sicut Tigris in diebus novorum,

36. qui adimplet quasi Eufrates sensum qui multiplicat quasi Jordanis in tempore messis

36. quae adimplet quasi Euphrates sensum et quasi Iordanis in tempore messis,

37. qui mittit disciplinam sicut lucem et adsistens quasi Geon in die vindemiæ

37. quae redundavit disciplina sicut Nilus et assistens quasi Geon in die vindemiae.

38. qui perficit primus scire ipsam et infirmior non investigavit eam

38. Non perfecit primus scire ipsam, sic nec ultimus investigavit eam.

39. a mari enim abundavit cogitatio ejus et consilium illius abysso magna

39. Super mare enim abundavit cogitatio eius, et consilium illius super abyssum magnam.

40. ego sapientia effudi flumina

40. Ego sapientia effudi flumina,

41. ego quasi tramis aquæ inmensæ de fluvio ego quasi fluvius Doryx et sicut aquæductus exivi a paradiso

41. ego quasi trames aquae immensae de fluvio et sicut aquaeductus exivi in paradisum.

42. dixi rigabo meum hortum plantationum et inebriabo pratus mei fructum

42. Dixi: “Rigabo hortum meum plantationum et inebriabo prati mei fructum”.

43. et ecce facta est mihi tramis abundans et fluvius meus propinquavit ad mare

43. Et ecce factus est mihi trames in fluvium, et fluvius meus appropinquavit ad mare.

44. quoniam doctrinam quasi antelucanum inlumino omnibus et enarrabo illam usque in longinquo

44. Quoniam doctrinam quasi antelucanum illuminabo et enarrabo illam usque ad longinquum.

45. penetrabo inferiores partes terræ et inspiciam omnes dormientes et inluminabo sperantes in Deo

45. Penetrabo omnes inferiores partes terrae et inspiciam omnes dormientes et illuminabo omnes sperantes in Domino;

46. adhuc doctrinam quasi prophetiam effundam et relinquam illam quærentibus sapientiam et non desinam in progenies illorum usque in ævum sanctum

46. adhuc doctrinam quasi prophetiam effundam et relinquam illam in generationes saeculorum et non desinam in progenies illorum usque in aevum sanctum.

47. videte quoniam non soli mihi laboravi sed omnibus exquirentibus veritatem

47. Videte quoniam non soli mihi laboravi, sed omnibus exquirentibus illam.