Liber Ecclesiasticus, 16

1. et ne jucunderis in filiis impiis si multiplicentur non oblecteris super ipsos si non est timor Dei cum illis

1. Ne iucunderis in filiis impiis; si multiplicentur, non oblecteris super ipsos, si non est timor Dei cum illis.

2. non credas vitæ illorum et ne respexeris in labores illorum

2. Non credas vitae illorum et ne respexeris in labores eorum.

3. melior est enim unus timens Deum quam mille filii impii

3. Melior est enim unus timens Deum quam mille filii impii;

4. et utile mori sine filiis quam relinquere filios impios

4. et potius est mori sine filiis quam relinquere filios impios.

5. ab uno sensato inhabitabitur patria et a tribus impiis deseretur

5. Ab uno sensato inhabitabitur patria, tribus autem impiorum deseretur.

6. multa talia vidit oculus meus et fortiora horum audivit auris mea

6. Multa talia vidit oculus meus, et fortiora horum audivit auris mea.

7. in synagoga peccantium exardebit ignis et in gente incredibili exardescit ira

7. In synagoga peccantium exardebit ignis, et in gente incredibili exardescet ira.

8. non exoraverunt pro peccatis suis antiquis gigantibus qui destruxerunt confidentes suæ virtuti

8. Non exoraverunt eum antiqui gigantes, qui rebelles fuerunt confidentes suae virtuti.

9. et non pepercit peregrinationi illorum et execratus est illos præ superbia verbi illorum

9. Et non pepercit accolis Lot et exsecratus est eos prae superbia verbi illorum;

10. non misertus est illis gentem totam perdens et extollentes se in suis peccatis

10. non misertus est gentis anathematis, qui depulsi sunt in peccatis suis.

11. et sicut sescenta milia peditum qui congregati sunt in duritia cordis sui et si unus fuisset cervicatus mirum si fuisset inmunis

11. Et sicut sescenta milia peditum, qui congregati sunt in duritia cordis sui; et, si unus fuisset cervicatus, mirum si fuisset immunis:

12. misericordia enim et ira est cum illo potens exoratio et effundens iram

12. misericordia enim et ira est cum illo, sustinens, exorabilis et effundens iram.

13. secundum misericordiam suam sic correptio illius hominem secundum operam suam judicat

13. ecundum multam misericordiam suam, sic et correptio illius: hominem secundum opera sua iudicat.

14. non effugiet in rapinam peccator et non retardabit sufferentia misericordiam facientis

14. Non effugiet in rapina peccator, et non irrita erit sustinentia iusti.

15. omnis misericordia faciet locum unicuique secundum meritum operum suorum et secundum intellectum peregrinationis ipsius

15. Omni misericordiae erit merces: unusquisque secundum meritum operum suorum inveniet coram se et secundum intellectum peregrinationis ipsius. Dominus induravit cor pharaonis, ne agnosceret illum, ut opera sua innotescerent sub caelo. Misericordia eius apparuit omnibus creaturis eius, lucem suam et tenebras dispertiit filiis hominum.

16. non dicas a Deo abscondar et ex summo quis mei memorabitur

16. Non dicas: “A Deo abscondar! Et, ex summo quis mei memorabitur?

17. in populo magno non agnoscar quæ est enim anima mea in tam inmensa creatura

17. In populo magno non agnoscar; quae est enim anima mea in tam immensa creatura?”.

18. ecce cælum et cæli cælorum abyssus et universa terra et quæ in eis sunt in conspectu illius commovebuntur

18. Ecce caelum et caeli caelorum, abyssus et universa terra et quae in eis sunt, in visitatione illius commovebuntur;

19. montes simul et colles et fundamenta terræ et cum conspexerit illa Deus tremore concutientur

19. montes simul et colles et fundamenta terrae, cum conspexerit illa Deus, tremore concutientur.

20. et omne cor intellegetur

20. Et in omnibus his non apponet cor, etenim omne cor intellegitur ab illo.

21. et vias illius quis intellegit et procella quam nec oculus videbit hominis

21. Et vias illius quis intellegit et procellam, quam nec oculus videbit hominis?

22. nam plurima opera illius sunt in absconsis opera justitiæ quis enuntiabit aut quis sustinebit longe enim est testamentum a quibusdam et interrogatio omnium in consummatione est

22. Nam plurima illius opera sunt in absconsis, et opera iustitiae eius quis enuntiabit, aut quis sustinebit? Longe enim est decretum, et interrogatio omnium in consummatione est.

23. qui minoratur corde cogitat inania et vir inprudens et errans cogitat stulta

23. Qui minoratur corde, cogitat ista, et vir imprudens et errans cogitat stulta.

24. audi me fili et disce disciplinam sensus et in verbis meis adtende in corde

24. Audi me, fili, et disce prudentiam sensus,

25. edicam in æquitate disciplinam et scrutabor enarrare sapientiam et in verbis meis adtende in corde tuo et dico in æquitate spiritus virtutes quas posuit Deus in opera sua ab initio et in veritate enuntio scientiam ejus

25. et dicam in aequitate disciplinam et scrutabor enarrare sapientiam; et in verbis meis attende in corde tuo. Edico in aequitate spiritus virtutes, quas posuit Deus in opera sua ab initio, et in veritate enuntio scientiam eius.

26. in judicio Dei opera ipsius ab initio et ab institutione ipsorum distinxit partes illorum et initia ipsorum in gentibus suis

26. Quando creavit Deus opera sua ab initio et ab institutione ipsorum distinxit partes illorum,

27. ornavit in æternum opera illorum nec esurierunt nec laboraverunt et non destiterunt ab operibus suis

27. ornavit in aeternum opera illorum et dominatum eorum in generationibus suis. Nec esurierunt nec laboraverunt et non destiterunt ab operibus suis.

28. unusquisque proximum sibi non angustiavit usque in ævum

28. Unusquisque proximum sibi non angustiavit,

29. non incredibiles verbo illius

29. et usque in aeternum non erunt incredibiles verbo illius.

30. post hæc Deus in terram respexit et implevit illam bonis suis

30. Post haec Deus in terram respexit et complevit illam bonis suis;

31. anima omnis vitalis denudavit ante faciem ipsius et ipsa iterum reversio illorum

31. anima omnis vitalis cooperuit faciem ipsius, et in ipsam iterum reversio illorum.