Liber Isaiae, 42

1. ecce servus meus suscipiam eum electus meus conplacuit sibi in illo anima mea dedi spiritum meum super eum judicium gentibus proferet

1. Ecce servus meus, suscipiam eum; electus meus, complacet sibi in illo anima mea; dedi spiritum meum super eum, iudicium gentibus proferet.

2. non clamabit neque accipiet personam nec audietur foris vox ejus

2. Non clamabit neque vociferabitur, nec audietur vox eius foris.

3. calamum quassatum non conteret et linum fumigans non extinguet in veritate educet judicium

3. Calamum quassatum non conteret et linum fumigans non exstinguet; in veritatem proferet iudicium.

4. non erit tristis neque turbulentus donec ponat in terra judicium et legem ejus insulæ expectabunt

4. Non languebit nec frangetur, donec ponat in terra iudicium; et legem eius insulae exspectant.

5. hæc dicit Dominus Deus creans cælos et extendens eos firmans terram et quæ germinant ex ea dans flatum populo qui est super eam et spiritum calcantibus eam

5. Haec dicit Dominus Deus, creans caelos et extendens eos, firmans terram et quae germinant ex ea, dans flatum populo, qui est super eam, et spiritum calcantibus eam:

6. ego Dominus vocavi te in justitia et adprehendi manum tuam et servavi et dedi te in fœdus populi in lucem gentium

6. “Ego, Dominus, vocavi te in iustitia et apprehendi manum tuam; et formavi te et dedi te in foedus populi, in lucem gentium,

7. ut aperires oculos cæcorum et educeres de conclusione vinctum de domo carceris sedentes in tenebris

7. ut aperires oculos caecorum et educeres de conclusione vinctum, de domo carceris sedentes in tenebris.

8. ego Dominus hoc est nomen meum gloriam meam alteri non dabo et laudem meam sculptilibus

8. Ego Dominus: hoc est nomen meum; et gloriam meam alteri non dabo et laudem meam sculptilibus.

9. quæ prima fuerant ecce venerunt nova quoque ego adnuntio antequam oriantur audita vobis faciam

9. Quae prima fuerunt, ecce venerunt; nova quoque ego annuntio: antequam oriantur, audita vobis faciam”.

10. cantate Domino canticum novum laus ejus ab extremis terræ qui descenditis in mare et plenitudo ejus insulæ et habitatores earum

10. Cantate Domino canticum novum, laus eius ab extremis terrae; qui descenditis in mare, et plenitudo eius, insulae et habitatores earum.

11. sublevetur desertum et civitates ejus in domibus habitabit Cedar laudate habitatores Petræ de vertice montium clamabunt

11. Exsultent desertum et civitates eius, vici, quos habitat Cedar. Iubilent habitatores Petrae, de vertice montium clament.

12. ponent Domino gloriam et laudem ejus in insulis nuntiabunt

12. Ponant Domino gloriam et laudem eius in insulis nuntient.

13. Dominus sicut fortis egredietur sicut vir prœliator suscitabit zelum vociferabitur et clamabit super inimicos suos confortabitur

13. Dominus sicut fortis egredietur, sicut vir proeliator suscitabit zelum; vociferabitur et conclamabit, super inimicos suos praevalebit.

14. tacui semper silui patiens fui sicut pariens loquar dissipabo et absorbebo simul

14. “Tacui semper, silui, patiens fui; sicut parturiens ululabo, gemam et fremam simul.

15. desertos faciam montes et colles et omne gramen eorum exsiccabo et ponam flumina in insulas et stagna arefaciam

15. Desertos faciam montes et colles et omne gramen eorum exsiccabo; et ponam flumina in insulas et stagna arefaciam.

16. et ducam cæcos in via quam nesciunt in semitis quas ignoraverunt ambulare eos faciam ponam tenebras coram eis in lucem et prava in recta hæc verba feci eis et non dereliqui eos

16. Et ducam caecos in viam, quam nesciunt, et in semitis, quas ignoraverunt, ambulare eos faciam; ponam tenebras coram eis in lucem et prava in recta. Haec verba faciam eis et non dereliquam eos”.

17. conversi sunt retrorsum confundantur confusione qui confidunt in sculptili qui dicunt conflatili vos dii nostri

17. Conversi sunt retrorsum; confundantur confusione, qui confidunt in sculptili, qui dicunt conflatili: “Vos dii nostri”.

18. surdi audite et cæci intuemini ad videndum

18. Surdi, audite; et caeci, intuemini ad videndum.

19. quis cæcus nisi servus meus et surdus nisi ad quem nuntios meos misi quis cæcus nisi qui venundatus est quis cæcus nisi servus Domini

19. Quis caecus sicut servus meus, et surdus sicut nuntius, quem ego mittam? Quis caecus sicut qui restitutus est? Et quis caecus sicut servus Domini?

20. qui vides multa nonne custodies qui apertas habes aures nonne audies

20. Multa vidisti, sed non servas; aures aperuisti, sed non audis.

21. et Dominus voluit ut sanctificaret eum et magnificaret legem et extolleret

21. Dominus voluit propter iustitiam suam magnificare legem et extollere.

22. ipse autem populus direptus et vastatus laqueus juvenum omnes et in domibus carcerum absconditi sunt facti sunt in rapinam nec est qui eruat in direptionem et non est qui dicat redde

22. Ipse autem populus direptus et vastatus; in foveis conclusi omnes, et in domibus carcerum absconditi sunt. Facti sunt in rapinam, nec est qui eruat; in direptionem, nec est qui dicat: “Redde!”.

23. quis est in vobis qui audiat hoc adtendat et auscultet futura

23. Quis est in vobis, qui audiat hoc, attendat et auscultet futura?

24. quis dedit in direptionem Jacob et Israël vastantibus nonne Dominus ipse cui peccavimus et noluerunt in viis ejus ambulare et non audierunt legem ejus

24. Quis dedit in direptionem Iacob et Israel vastantibus? Nonne Dominus ipse, cui peccavimus? Et noluerunt in viis eius ambulare et non audierunt legem eius.

25. et effudit super eum indignationem furoris sui et forte bellum et conbusit eum in circuitu et non cognovit et succendit eum et non intellexit

25. Et effudit super eum indignationem furoris sui et forte bellum. Et combussit eum in circuitu, et non cognovit; et succendit eum, et non intellexit.