Liber Isaiae, 19
1. onus Ægypti ecce Dominus ascendet super nubem levem et ingredietur Ægyptum et movebuntur simulacra Ægypti a facie ejus et cor Ægypti tabescet in medio ejus
1. Oraculum Aegypti. Ecce Dominus vehitur super nubem levem et ingreditur Aegyptum; et commovebuntur simulacra Aegypti a facie eius, et cor Aegypti tabescet in medio eius.
2. et concurrere faciam Ægyptios adversum Ægyptios et pugnabit vir contra fratrem suum et vir contra amicum suum civitas adversus civitatem regnum adversus regnum
2. “Et concurrere faciam Aegyptios adversus Aegyptios; et pugnabit vir contra fratrem suum, et vir contra amicum suum, civitas adversus civitatem, regnum adversus regnum.
3. et disrumpetur spiritus Ægypti in visceribus ejus et consilium ejus præcipitabo et interrogabunt simulacra sua et divinos suos et pythones et ariolos
3. Et dirumpetur spiritus Aegypti in visceribus eius, et consilium eius confundam; et interrogabunt simulacra et divinos et pythones et hariolos.
4. et tradam Ægyptum in manu dominorum crudelium et rex fortis dominabitur eorum ait Dominus Deus exercituum
4. Et tradam Aegyptios in manu domini crudelis, et rex fortis dominabitur eorum”, ait Dominus, Deus exercituum.
5. et arescet aqua de mari et fluvius desolabitur atque siccabitur
5. Et arescet aqua de mari, et fluvius desolabitur atque siccabitur,
6. et deficient flumina adtenuabuntur et siccabuntur rivi aggerum calamus et juncus marcescet
6. et putrida fient flumina; attenuabuntur et siccabuntur rivi Aegypti, calamus et iuncus marcescent;
7. nudabitur alveus rivi a fonte suo et omnis sementis inrigua siccabitur arescet et non erit
7. nudabuntur ripae Nili, et omnis planta Nili siccabitur; arescet et non erit.
8. et mærebunt piscatores et lugebunt omnes mittentes in flumen hamum et expandentes rete super faciem aquæ marcescent
8. Et maerebunt piscatores, et lugebunt omnes mittentes in flumen hamum; et expandentes rete super faciem aquarum languebunt.
9. confundentur qui operabantur linum pectentes et texentes subtilia
9. Confundentur, qui operantur linum, pectentes et texentes byssum.
10. et erunt inrigua ejus flaccentia omnes qui faciebant lacunas ad capiendos pisces
10. Et opifices eius deprimentur, omnes mercennarii omnino deficient.
11. stulti principes Taneos sapientes consiliarii Pharao dederunt consilium insipiens quomodo dicetis Pharaoni filius sapientium ego filius regum antiquorum
11. Quam stulti principes Taneos! Sapientes consiliarii pharaonis dederunt consilium insipiens; quomodo dicetis pharaoni: “Filius sapientium ego, filius regum antiquorum”?
12. ubi sunt nunc sapientes tui adnuntient tibi et indicent quid cogitaverit Dominus exercituum super Ægyptum
12. Ubi nunc sunt sapientes tui? Annuntient tibi et indicent quid cogitaverit Dominus exercituum super Aegyptum.
13. stulti facti sunt principes Taneos emarcuerunt principes Mempheos deceperunt Ægyptum angulum populorum ejus
13. Stulti facti sunt principes Taneos, decepti sunt principes Mempheos, deceperunt Aegyptum anguli tribuum eius.
14. Dominus miscuit in medio ejus spiritum vertiginis et errare fecerunt Ægyptum in omni opere suo sicut errat ebrius et vomens
14. Dominus miscuit in medio eius spiritum vertiginis, et errare fecerunt Aegyptum in omni opere suo, sicut errat ebrius in vomitu suo;
15. et non erit Ægypto opus quod faciat caput et caudam incurvantem et refrenantem
15. et non erit Aegypto opus, quod faciat, caput vel cauda, palma vel arundo.
16. in die illa erit Ægyptus quasi mulieres et stupebunt et timebunt a facie commotionis manus Domini exercituum quam ipse movebit super eam
16. In die illa erunt Aegyptii quasi mulieres et stupebunt et timebunt a facie commotionis manus Domini exercituum, quam ipse movebit super eam.
17. et erit terra Juda Ægypto in festivitatem omnis qui illius fuerit recordatus pavebit a facie consilii Domini exercituum quod ipse cogitavit super eam
17. Et erit terra Iudae Aegypto in pavorem: omnis, qui illius fuerit recordatus, pavebit a facie consilii Domini exercituum, quod ipse cogitavit super eam.
18. in die illa erunt quinque civitates in terra Ægypti loquentes lingua Chanaan et jurantes per Dominum exercituum civitas Solis vocabitur una
18. In die illa erunt quinque civitates in terra Aegypti loquentes lingua Chanaan et iurantes per Dominum exercituum. Civitas Solis vocabitur una.
19. in die illa erit altare Domini in medio terræ Ægypti et titulus juxta terminum ejus Domini
19. In die illa erit altare Domino in medio terrae Aegypti, et titulus iuxta terminum eius Domino.
20. et erit in signum et in testimonium Domino exercituum in terra Ægypti clamabunt enim ad Dominum a facie tribulantis et mittet eis salvatorem et propugnatorem qui liberet eos
20. Et erit in signum et in testimonium Domino exercituum in terra Aegypti. Clamabunt enim ad Dominum a facie tribulantium, et mittet eis salvatorem et propugnatorem, qui liberet eos.
21. et cognoscetur Dominus ab Ægypto et cognoscent Ægyptii Dominum in die illa et colent eum in hostiis et muneribus et vota vovebunt Domino et solvent
21. Et cognoscetur Dominus ab Aegypto, et cognoscent Aegyptii Dominum in die illa; et colent eum in hostiis et in muneribus et vota vovebunt Domino et solvent.
22. et percutiet Dominus Ægyptum plaga et sanabit eam et revertentur ad Dominum et placabitur eis et sanabit eos
22. Et percutiet Dominus Aegyptum plaga et sanabit; et revertentur ad Dominum, et placabitur eis et sanabit eos.
23. in die illa erit via de Ægypto in Assyrios et intrabit Assyrius Ægyptum et Ægyptius in Assyrios et servient Ægyptii Assur
23. In die illa erit via de Aegypto in Assyriam; et intrabit Assyrius Aegyptum, et Aegyptius in Assyriam, et servient Aegyptii cum Assyriis.
24. in die illa erit Israël tertius Ægyptio et Assyrio benedictio in medio terræ
24. In die illa erit Israel tertius cum Aegypto et Assyria; benedictio in medio terrae,
25. cui benedixit Dominus exercituum dicens benedictus populus meus Ægypti et opus manuum mearum Assyrio hereditas autem mea Israël
25. cui benedicet Dominus exercituum dicens: “Benedictus populus meus Aegyptius, et opus manuum mearum Assyrius, et hereditas mea Israel”.
