Liber Isaiae, 8
1. et dixit Dominus ad me sume tibi librum grandem et scribe in eo stilo hominis Velociter spolia detrahe Cito prædare
1. Et dixit Dominus ad me: “Sume tibi tabulam grandem et scribe in ea stilo hominis: Maher Salal Has Baz (id est Velociter spolia detrahe, cito praedare).
2. et adhibui mihi testes fideles Uriam sacerdotem et Zacchariam filium Barachiæ
2. Et adhibui mihi testes fideles, Uriam sacerdotem et Zachariam filium Barachiae;
3. et accessi ad prophetissam et concepit et peperit filium et dixit Dominus ad me voca nomen ejus Adcelera spolia detrahere Festina prædari
3. et accessi ad prophetissam, et concepit et peperit filium. Et dixit Dominus ad me: “Voca nomen eius Maher Salal Has Baz,
4. quia antequam sciat puer vocare patrem suum et matrem suam auferetur fortitudo Damasci et spolia Samariæ coram rege Assyriorum
4. quia antequam sciat puer clamare: “Pater mi” et “Mater mea”, afferentur opes Damasci et spolia Samariae coram rege Assyriorum”.
5. et adiecit Dominus loqui ad me adhuc dicens
5. Et adiecit Dominus loqui ad me adhuc dicens:
6. pro eo quod abiecit populus iste aquas Siloæ quæ vadunt cum silentio et adsumpsit magis Rasin et filium Romeliæ
6. “Pro eo quod abiecit populus iste aquas Siloae, quae vadunt cum silentio, et defecit coram Rasin et filio Romeliae,
7. propter hoc ecce Dominus adducet super eos aquas Fluminis fortes et multas regem Assyriorum et omnem gloriam ejus et ascendet super omnes rivos ejus et fluet super universas ripas ejus
7. propter hoc ecce Dominus adducet super eos aquas Fluminis fortes et multas, regem Assyriorum et omnem gloriam eius, et ascendet super omnes rivos eius et fluet super universas ripas eius;
8. et ibit per Judam inundans et transiens usque ad collum veniet et erit extensio alarum ejus implens latitudinem terræ tuæ o Emmanuhel
8. et ibit per Iudam inundans et diffluens, usque ad collum veniet. Et erit extensio alarum eius implens latitudinem terrae tuae, o Emmanuel”.
9. congregamini populi et vincimini et audite universæ procul terræ confortamini et vincimini accingite vos et vincimini
9. Clamorem tollite, populi, et consternemini; et audite, universae procul terrae: accingimini et perterremini, accingimini et perterremini.
10. inite consilium et dissipabitur loquimini verbum et non fiet quia nobiscum Deus
10. Inite consilium, et dissipabitur; loquimini verbum, et non fiet, quia nobiscum Deus.
11. hæc enim ait Dominus ad me sicut in forti manu erudivit me ne irem in via populi hujus dicens
11. Haec enim ait Dominus ad me, cum apprehendit me manu et monuit, ne irem in via populi huius, dicens:
12. non dicatis coniuratio omnia enim quæ loquitur populus iste coniuratio est et timorem ejus ne timeatis neque paveatis
12. “Ne vocetis coniurationem, quodcumque populus iste vocat coniurationem, et timorem eius ne timeatis neque paveatis”.
13. Dominum exercituum ipsum sanctificate ipse pavor vester et ipse terror vester
13. Dominum exercituum ipsum sanctificate: ipse pavor vester, et ipse terror vester;
14. et erit vobis in sanctificationem in lapidem autem offensionis et in petram scandali duabus domibus Israël in laqueum et in ruinam habitantibus Hierusalem
14. et erit in sanctuarium, in lapidem offensionis et in petram scandali duabus domibus Israel, in laqueum et in insidias habitantibus Ierusalem.
15. et offendent ex eis plurimi et cadent et conterentur et inretientur et capientur
15. Et offendent ex eis plurimi et cadent et conterentur et irretientur et capientur.
16. liga testimonium signa legem in discipulis meis
16. Liga testimonium, signa legem in discipulis meis.
17. et expectabo Dominum qui abscondit faciem suam a domo Jacob et præstolabor eum
17. Et exspectabo Dominum, qui abscondit faciem suam a domo Iacob, et praestolabor eum.
18. ecce ego et pueri quos mihi dedit Dominus in signum et in portentum Israhelis a Domino exercituum qui habitat in monte Sion
18. Ecce ego et pueri, quos dedit mihi Dominus in signum et in portentum Israel a Domino exercituum, qui habitat in monte Sion.
19. et cum dixerint ad vos quærite a pythonibus et a divinis qui stridunt in incantationibus suis numquid non populus a Deo suo requirit pro vivis a mortuis
19. Et cum dixerint ad vos: “Quaerite a pythonibus et a divinis, qui susurrant et murmurant; numquid non populus a deo suo requiret, pro vivis a mortuis?”.
20. ad legem magis et ad testimonium quod si non dixerint juxta verbum hoc non erit eis matutina lux
20. Ad legem et ad testimonium! Quod si non dixerint iuxta verbum hoc, non erit eis matutina lux.
21. et transibit per eam corruet et esuriet et cum esurierit irascetur et maledicet regi suo et Deo suo et suspiciet sursum
21. Et transibit per eam afflictus et esuriens; et, cum esurierit, irascetur et maledicet regi suo et deo suo et suspiciet sursum
22. et ad terram intuebitur et ecce tribulatio et tenebræ dissolutio angustia et caligo persequens et non poterit avolare de angustia sua
22. et ad terram intuebitur: et ecce tribulatio et tenebrae, caligo opprimens et obscuritas diffusa.
23.
23. Non erit enim amplius caligo, ubi erat oppressio. Primo tempore contemptibilem reddidit terram Zabulon et terram Nephthali; et novissimo glorificavit viam maris, trans Iordanem, Galilaeam gentium.
