Liber Proverbiorum, 21
1. sicut divisiones aquarum ita cor regis in manu Domini quocumque voluerit inclinabit illud
1. Sicut rivi aquarum cor regis in manu Domini: quocumque voluerit, inclinabit illud.
2. omnis via viri recta sibi videtur adpendit autem corda Dominus
2. Omnis via viri recta sibi videtur; appendit autem corda Dominus.
3. facere misericordiam et judicium magis placent Domino quam victimæ
3. Facere misericordiam et iudicium magis placet Domino quam victimae.
4. exaltatio oculorum et dilatatio cordis lucerna impiorum peccatum
4. Exaltatio oculorum et dilatatio cordis, lucerna impiorum: peccatum.
5. cogitationes robusti semper in abundantia omnis autem piger semper in egestate
5. Cogitationes sollertis semper in abundantiam; omnis autem festinus semper in egestate est.
6. qui congregat thesauros lingua mendacii vanus est et inpingetur ad laqueos mortis
6. Qui congregat thesauros lingua mendacii, vento impingetur ad laqueos mortis.
7. rapinæ impiorum detrahent eos quia noluerunt facere judicium
7. Violentia impiorum detrahet eos, quia noluerunt facere iudicium.
8. perversa via viri aliena est qui autem mundus est rectum opus ejus
8. Perversa via viri aliena est; qui autem mundus est, rectum opus eius.
9. melius est sedere in angulo domatis quam cum muliere litigiosa et in domo communi
9. Melius est sedere in angulo domatis quam cum muliere litigiosa et in domo communi.
10. anima impii desiderat malum non miserebitur proximo suo
10. Anima impii desiderat malum; non miserebitur proximo suo.
11. multato pestilente sapientior erit parvulus et si sectetur sapientem sumet scientiam
11. Multato derisore sapientior erit parvulus; et, si instruatur sapiens, sumet scientiam.
12. excogitat justus de domo impii ut detrahat impios in malum
12. Excogitat Iustus de domo impii, ut praecipitet impios in malum.
13. qui obturat aurem suam ad clamorem pauperis et ipse clamabit et non exaudietur
13. Qui obturat aurem suam ad clamorem pauperis, et ipse clamabit, et non exaudietur.
14. munus absconditum extinguet iras et donum in sinu indignationem maximam
14. Munus absconditum exstinguit iras, et donum in sinu indignationem maximam.
15. gaudium justo est facere judicium et pavor operantibus iniquitatem
15. Gaudium iusto est facere iudicium, et ruina operantibus iniquitatem.
16. vir qui erraverit a via doctrinæ in cœtu gigantum commorabitur
16. Vir, qui erraverit a via prudentiae, in coetu umbrarum commorabitur.
17. qui diligit epulas in egestate erit qui amat vinum et pinguja non ditabitur
17. Qui diligit convivia, in egestate erit; qui amat vinum et pinguia, non ditabitur.
18. pro justo datur impius et pro rectis iniquus
18. Redemptio pro iusto impius, et pro rectis iniquus.
19. melius est habitare in terra deserta quam cum muliere rixosa et iracunda
19. Melius est habitare in terra deserta quam cum muliere rixosa et iracunda.
20. thesaurus desiderabilis et oleum in habitaculo justi et inprudens homo dissipabit illud
20. Thesaurus desiderabilis et pinguis in habitaculo sapientis, et imprudens homo dissipabit illum.
21. qui sequitur justitiam et misericordiam inveniet vitam et justitiam et gloriam
21. Qui sequitur iustitiam et misericordiam, inveniet vitam et iustitiam et gloriam.
22. civitatem fortium ascendit sapiens et destruxit robur fiduciæ ejus
22. Civitatem fortium ascendit sapiens et destruit robur fiduciae eius.
23. qui custodit os suum et linguam suam custodit ab angustiis animam suam
23. Qui custodit os suum et linguam suam, custodit ab angustiis animam suam.
24. superbus et arrogans vocatur indoctus qui in ira operatur superbiam
24. Superbus et arrogans vocatur derisor, qui operatur in ira superbiae.
25. desideria occidunt pigrum noluerunt enim quicquam manus ejus operari
25. Desideria occidunt pigrum; noluerunt enim quidquam manus eius operari:
26. tota die concupiscit et desiderat qui autem justus est tribuet et non cessabit
26. tota die concupiscit et desiderat; qui autem iustus est, tribuet et non parcit.
27. hostiæ impiorum abominabiles quia offeruntur ex scelere
27. Hostiae impiorum abominabiles, eo magis quia offeruntur ex scelere.
28. testis mendax peribit vir obœdiens loquitur victoriam
28. Testis mendax peribit; vir oboediens loquetur in victoriam.
29. vir impius procaciter obfirmat vultum suum qui autem rectus est corrigit viam suam
29. Vir impius obfirmat vultum suum; qui autem rectus est, corrigit viam suam.
30. non est sapientia non est prudentia non est consilium contra Dominum
30. Non est sapientia, non est prudentia, non est consilium contra Dominum.
31. equus paratur ad diem belli Dominus autem salutem tribuet
31. Equus paratur ad diem belli, Dominus autem salutem tribuit.
