Liber Ecclesiasticus, 21
1. fili peccasti non adicias iterum sed et de pristinis deprecare ut tibi remittatur
1. Fili, peccasti? Non adicias iterum, sed et de pristinis deprecare, ut tibi dimittantur.
2. quasi a facie colubri fuge peccata et si accesseris ad illa suscipient te
2. Quasi a facie colubri fuge peccata: et, si accesseris ad illa, mordebunt te.
3. dentes leonis dentes ejus interficientes animas hominum
3. Dentes leonis dentes eorum interficientes animas hominum.
4. quasi romphea bis acuta omnis iniquitas plagæ illius non est sanitas
4. Quasi romphaea bis acuta omnis iniquitas: plagae illius non est sanitas.
5. cataplectatio et iniuriæ adnullabunt substantiam sic substantia superbiæ eradicabitur
5. Terror et iniuriae annullabunt substantiam, et domus, quae nimis locuples est, annullabitur superbia; sic substantia superbi eradicabitur.
6. deprecatio pauperis ex ore usque ad aures ejus veniet et judicium festinato adveniet illi
6. Deprecatio pauperis ex ore usque ad aures Dei perveniet, et iudicium festinato adveniet illi.
7. qui odit correptionem vestigium est peccatoris et qui timet Deum convertet ad cor suum
7. Qui odit correptionem, in vestigio est peccatoris; et, qui timet Deum, convertet illam ad cor suum.
8. notus a longe potens lingua audaci et sensatus scit labi se ab ipso
8. Notus a longe potens lingua audaci, et sensatus novit illum labi.
9. qui ædificat domum inpendiis alienis quasi qui colligat lapides suos in hieme
9. Qui aedificat domum suam impendiis alienis, quasi qui colligit lapides suos in hiemem.
10. stuppa collecta synagoga peccantium et consummatio illorum flamma ignis
10. Stuppa collecta synagoga peccantium, et consummatio illorum flamma ignis.
11. via peccantium conplanata lapidibus et in fine illorum inferi et tenebræ et pœna
11. Via peccantium complanata lapidibus, et in fine illius fovea inferi.
12. qui custodit justitiam continebit sensum ejus
12. Qui custodit legem, continebit sensum suum;
13. consummatio timoris Dei sapientia et sensus
13. consummatio timoris Dei sapientia et sensus.
14. non erudietur qui non est sapiens in bono
14. Non erudietur, qui non est prudens;
15. est autem insipientia quæ abundat in malo et non est sensus ubi abundat amaritudo
15. est autem astutia, quae abundat in malo, et non est sensus, ubi est amaritudo.
16. scientia sapientis tamquam inundatio abundabit et consilium illius sicut fons vitæ permanet
16. Scientia sapientis tamquam inundatio abundabit, et consilium illius sicut fons vitae permanet.
17. cor fatui quasi vas confractum et omnem sapientiam non tenebit
17. Cor fatui quasi vas confractum et omnem sapientiam non tenebit.
18. verbum sapiens quodcumque audierit scius laudabit et ad se adiciet audivit luxuriosus et displicebit illi et proiciet illud post dorsum suum
18. Verbum sapiens, quodcumque audierit scius, laudabit et ad illud adiciet; audivit luxuriosus, et displicebit illi et proiciet illud post dorsum suum.
19. narratio fatui quasi sarcina in via nam in labiis sensati invenietur gratia
19. Narratio fatui quasi sarcina in via, sed in labiis sensati invenietur gratia.
20. os prudentis quæritur in ecclesia et verba illius cogitabunt in cordibus suis
20. Os prudentis quaeretur in ecclesia, et verba illius cogitabunt in cordibus suis.
21. tamquam domus exterminata sic fatuo sapientia et scientia insensati inenarrabilia verba
21. Tamquam domus exterminata sic fatuo sapientia; et scientia insensati inenarrabilia verba.
22. conpedes in pedibus stulto doctrina et quasi vincula manuum supra manum dexteram
22. Compedes in pedibus stulto doctrina et quasi vincula manuum super manum dexteram.
23. fatuus in risu inaltat vocem suam vir autem sapiens vix tacite ridebit
23. Fatuus in risu exaltat vocem suam; vir autem sapiens vix tacite ridebit.
24. ornamentum aureum prudenti doctrina et quasi brachiale in brachio dextro
24. Tamquam ornamentum aureum prudenti doctrina et quasi brachiale in brachio dextro.
25. pes fatui facilis in domum proximi et homo peritus confundetur a persona potentis
25. Pes fatui facilis in domum proximi, sed homo peritus verebitur personam.
26. stultus a fenestra respiciet in domum vir autem eruditus foris stabit
26. Stultus a fenestra respiciet in domum, vir autem eruditus foris stabit.
27. stultitia hominis audire per ostium et prudens gravabitur contumelia
27. Ineruditio hominis auscultare per ostium, et prudenti gravis contumelia.
28. labia inprudentium stulta narrabunt verba autem prudentium statera ponderabuntur
28. Labia imprudentium stulta narrabunt, verba autem prudentium statera ponderabuntur.
29. et in ore fatuorum cor illorum et in corde sapientium os illorum
29. In ore fatuorum cor illorum, et in corde sapientium os illorum.
30. dum maledicit impius diabolum maledicit ipse animam suam
30. Dum maledicit impius adversarium, maledicit ipse animam suam.
31. susurrio coinquinabit animam suam et in omnibus odietur et qui manserit odiosus erit tacitus et sensatus honorabitur
31. Susurro coinquinabit animam suam et in omnibus odietur; et, qui cum eo manserit, odiosus erit: tacitus et sensatus honorabitur.
