Liber Ecclesiasticus, 47
1. post hoc surrexit Nathan propheta in diebus David
1. Post hunc surrexit Nathan propheta in diebus David.
2. et quasi adeps separatus est a carne sic David a filiis Israël
2. Et quasi adeps separatus a sacrificio salutari, sic David a filiis Israel.
3. cum leonibus lusit quasi cum agnis et in ursis similiter fecit sicut cum agnis ovium in juventute sua
3. Cum leonibus lusit quasi cum agnis et in ursis similiter fecit, sicut in agnis ovium.
4. numquid non occidit gigantem et extulit obprobrium de gente
4. In iuventute sua numquid non occidit gigantem et abstulit opprobrium de gente?
5. in tollendo manum in saxo fundæ dejecit exultationem Goliæ
5. In agitando manu fundam deiecit exsultationem Goliath.
6. ubi invocavit Dominum potentem et dedit in dexteram ejus tollere hominem fortem in bello et exaltare cornum gentis suæ
6. Nam invocavit Dominum altissimum, et dedit in dextera eius virtutem tollere hominem fortem in bello et exaltare cornu gentis suae.
7. sic in milibus glorificavit illum et laudavit eum in benedictionibus Domini in offerendo illi coronam gloriæ
7. Sic de decem milibus glorificaverunt eum et laudaverunt eum in benedictionibus Domini, in offerendo illi coronam gloriae.
8. conteruit enim inimicos undique et extirpavit Philisthim contrarios usque in hodiernum diem conteruit cornum ipsorum usque in æternum
8. Contrivit enim inimicos undique et humiliavit Philisthim contrarios, usque in hodiernum diem contrivit cornu ipsorum.
9. in omni opere dedit confessionem Sancto et Excelso in verbo gloriæ
9. In omni opere suo dedit confessionem Sancto et Excelso in verbo gloriae;
10. de omni corde suo laudavit Dominum et dilexit Deum qui fecit illum et dedit illi contra inimicos potentiam
10. de omni corde suo laudavit Dominum et dilexit Deum, qui fecit illum.
11. et stare fecit cantores contra altarium et in sono eorum dulces fecit modos
11. Et stare fecit cantores contra altare et in sono eorum dulces fecit modos.
12. et dedit in celebrationibus decus et ornavit tempora usque ad consummationem vitæ ut laudarent sanctum nomen Domini et amplificarent mane Dei sanctitatem
12. Dedit in celebrationibus decus et ornavit tempora usque ad consummationem anni, dum laudarent nomen sanctum Domini, et ante mane resonaret sanctuarium.
13. Christus purgavit peccata ipsius et exaltavit in æternum cornum ipsius et dedit illi testamentum regum et sedem gloriæ in Israël
13. Dominus purgavit peccata ipsius et exaltavit in aeternum cornu eius et dedit illi testamentum regni et sedem gloriae in Israel.
14. post ipsum surrexit filius sensatus et propter illum dejecit omnem potentiam inimicorum
14. Post ipsum surrexit filius sensatus, et propter illum habitavit in securitate.
15. Salomon imperavit in diebus pacis cui subiecit Deus omnes hostes ut conderet domum in nomine suo et pararet sanctitatem in sempiternum quemadmodum eruditus est in juventute sua
15. Salomon imperavit in diebus pacis; cui Deus requiem dedit in circuitu, ut conderet domum in nomine suo et pararet sanctuarium in sempiternum. Quemadmodum eruditus es in iuventute tua
16. et impletus est quasi flumen sapientia et terram retexit anima tua
16. et impletus es quasi flumen sapientia! Terram retexit anima tua,
17. et replesti in conparationibus enigmata ad insulas longe distulisti nomen tuum et dilectus es in pace tua
17. et replesti eam in comparationibus aenigmatum. Ad insulas longe divulgatum est nomen tuum, et dilectus es in pace tua.
18. in cantilenis et proverbiis et conparationibus et interpretationibus miratæ sunt te terræ
18. In cantilenis et proverbiis et comparationibus et interpretationibus te miratae sunt terrae.
19. et in nomine Domini Dei cui est cognomen Deus Israël
19. In nomine Domini Dei, cui est cognomen Deus Israel,
20. collegisti quasi auricalcum aurum et ut plumbum conplesti argentum
20. collegisti quasi orichalcum aurum et ut plumbum cumulasti argentum.
21. et reclinasti femora tua mulieribus potestatem habuisti in tuo corpore
21. Sed reclinasti femora tua mulieribus, subiugatus es in corpore tuo.
22. dedisti maculam in gloria tua et profugasti semen tuum inducere iracundiam ad liberos tuos et incitari stultitiam tuam
22. Dedisti maculam in gloria tua et profanasti semen tuum, inducens iracundiam ad liberos tuos et ingemiscere faciens super stultitia tua,
23. ut faceres imperium bipertitum et ex Efraim imperare imperium durum
23. ut fieret imperium bipartitum, et ex Ephraim inciperet imperium infidele.
24. Deus autem non relinquit misericordiam suam et non corrumpit nec delebit opera sua neque perdet ab stirpe nepotes electi sui et semen ejus qui diligit Dominum non corrumpet
24. Deus autem non derelinquet misericordiam suam et non corrumpet nec delebit verba sua neque perdet a stirpe nepotes electi sui et semen eius, qui diligit Dominum, non corrumpet.
25. dedit autem reliquum Jacob et David de ipsa stirpe
25. Dedit autem reliquum Iacob et David de ipso stirpem.
26. et finem habuit Salomon cum patribus suis
26. Et finem habuit Salomon cum patribus suis
27. et reliquit post se de semine suo gentis stultitiam
27. et dereliquit post se de semine suo gentis stultitiam
28. et mutum prudentia Roboam qui avertit gentem consilio suo
28. et imminutum prudentia, Roboam, qui avertit gentem consilio suo.
29. et Hieroboam filium Nabath qui peccare fecit Israël et dedit Efraim viam peccandi et plurima redundaverunt peccata ipsorum
29. Et Ieroboam filius Nabat, qui peccare fecit Israel et dedit viam peccandi Ephraim; et plurima redundaverunt peccata ipsorum valde,
30. valde averterunt illos a terra sua
30. ita ut expelleret illos a terra sua.
31. et quæsivit omnes nequitias usque dum perveniret ad illos defensio et ab omnibus peccatis liberavit eos
31. Et exquisierunt omnes nequitias, usque dum perveniret super illos vindicta.
