Liber Ecclesiasticus, 48
1. et surrexit Helias propheta quasi ignis et verbum ipsius quasi fax ardebat
1. Et surrexit Elias propheta quasi ignis, et verbum ipsius quasi facula ardebat.
2. qui induxit in illos famem et imitantes illum invidia sua pauci facti sunt non poterant enim sustinere præcepta Domini
2. Qui induxit in illos famem et zelo suo paucos fecit eos.
3. verbo Domini exaltavit cælum et dejecit a se ignem terræ
3. Verbo Domini continuit caelum et deiecit de caelo ignem ter.
4. sic amplificatus est Helias in mirabilibus suis et quis potest similiter gloriari tibi
4. Quam amplificatus es, Elias, in mirabilibus tuis! Et quis potest similiter gloriari tibi?
5. qui sustulisti mortuum ab inferis de sorte mortis in verbo Domini Dei
5. Qui suscitasti mortuum de sorte mortis ab inferis in verbo Domini.
6. qui dejecisti reges ad perniciem et confregisti facile potentiam ipsorum et gloriosos de lecto suo
6. Qui deiecisti reges ad perniciem et gloriosos de lecto suo et confregisti facile potentiam ipsorum;
7. qui audis in Sina judicium et in Coreb judicia defensionis
7. qui audis in Sinai indicium et in Horeb iudicia vindictae.
8. qui ungues reges ad pænitentiam et prophetas facis successores post te
8. Qui ungis reges ad retributionem et prophetas facis successores post te;
9. qui receptus es in turbine ignis in curru equorum igneorum
9. qui receptus es in turbine ignis et in curru equorum igneorum;
10. qui inscriptus es indiciis temporum et lenis iracundiam Domini conciliare cor patris ad filium et restituere tribus Jacob
10. qui scriptus es paratus in tempora lenire iracundiam Domini ante furorem, convertere cor patris ad filium et restituere tribus Iacob.
11. beati sunt qui te viderunt et in amicitia tua decorati sunt
11. Beati sunt, qui te viderunt et in amicitia tua dormierunt!
12. nam nos vita vivimus tantum post mortem autem non erit tale nomen nostrum
12. Nam et nos vita quidem vivemus, post mortem autem non erit tale nomen nostrum.
13. Helias qui in turbine tectus est et in Heliseo conpletus est spiritus ejus in diebus suis non pertimuit principem et potentia nemo vicit illum
13. Elias quidem in turbine tectus est, et in Eliseo completus est spiritus eius. In diebus suis non pertimuit principem, et potentia nemo vicit illum;
14. nec superavit illum verbum aliquod et mortuum prophetavit corpus ejus
14. nec superavit illum verbum aliquod, et mortuum prophetavit corpus eius.
15. in vita sua fecit monstra et in morte mirabilia opera ipsius
15. In vita sua fecit monstra et in morte mirabilia operatus est.
16. in omnibus istis non pænituit populum et non recesserunt a peccatis suis usque dum dejecti sunt de terra sua et dispersi sunt in omnem terram
16. In omnibus istis non paenituit populum, et non recesserunt a peccatis suis, usque dum eiecti sunt de terra sua et dispersi sunt in omnem terram;
17. et relicta est gens perpauca et princeps in domo David
17. et relicta est gens perpauca, et princeps in domo David.
18. quidam ipsorum fecerunt quod placeret Deo alii autem multa commiserunt peccata
18. Quidam ipsorum fecerunt, quod placeret Deo; alii autem multiplicaverunt peccata.
19. Ezechias munivit civitatem suam et induxit in medium ipsius aquam et fodit ferro rupem et ædificavit ad aquam puteum
19. Ezechias munivit civitatem suam et induxit in medium ipsius aquam et fodit ferro rupem et aedificavit ad aquam puteum.
20. in diebus ipsius ascendit Sennacherim et misit Rapsacen et sustulit manum suam contra illos et extulit manum suam in Sion et superbus factus est potentia sua
20. In diebus ipsius ascendit Sennacherib et misit Rabsacen et discessit, et sustulit manum suam in Sion et superbus factus est in exaltatione sua.
21. tunc mota sunt corda et manus ipsorum et doluerunt quasi parturientes mulieres
21. Tunc mota sunt corda et manus ipsorum, et doluerunt quasi parturientes mulieres
22. et invocaverunt Dominum misericordem et patentes manus extulerunt ad cælum et sanctus Dominus Deus audivit cito vocem ipsorum
22. et invocaverunt Dominum misericordem et expandentes manus suas extulerunt ad eum, et Sanctus audivit cito vocem ipsorum.
23. non est commemoratus peccatorum illorum neque dedit illos inimicis suis sed purgavit illos in manu Esajæ sancti prophetæ
23. Non est commemoratus peccatorum illorum neque dedit illos inimicis suis, sed purgavit eos in manu Isaiae sancti prophetae;
24. subiecit castra Assyriorum et conteruit illos angelus Dei
24. percussit castra Assyriorum et contrivit illos angelus eius.
25. nam fecit Ezechias quod placuit Deo et fortiter ivit in via David patris sui quam mandavit illi Esajas propheta magnus et fidelis in conspectu Dei
25. Nam fecit Ezechias quod placuit Deo et fortiter ivit in via David patris sui, quam mandavit illi Isaias propheta, magnus et fidelis in visione sua.
26. in diebus ipsius retro rediit sol et addidit regi vitam
26. In diebus ipsius retro rediit sol, et addidit regi vitam.
27. spiritu magno vidit ultima et obsecratus est lugentes in Sion usque in sempiternum
27. Spiritu magno vidit ultima et consolatus est lugentes in Sion; usque in sempiternum ostendit futura
28. ostendit futura et abscondita antequam evenirent
28. et abscondita, antequam evenirent.
