Liber Ecclesiasticus, 6

1. noli fieri pro amico inimicus proximo inproperium enim et contumeliam malus hereditabit et omnis peccator invidus et bilinguis

1. Nec pusillum nec multum noceas et noli fieri pro amico inimicus. Nomen enim malum et improperium et contumeliam hereditabis; sic omnis peccator invidus et bilinguis.

2. non te extollas in cogitatione animæ tuæ velut taurus ne forte elidatur virtus tua per stultitiam

2. Non te extollas in cogitatione animae tuae velut taurus, ne forte elidatur virtus tua per stultitiam,

3. et folia tua comedet et fructus tuos perdet et relinqueris velut lignum aridum in heremo

3. et folia tua comedat et fructus tuos perdat, et relinquaris velut lignum aridum in eremo.

4. anima enim nequa disperdet qui se habet et in gaudium inimici dat illum et deducit in sortem impiorum

4. Anima enim nequam disperdet eum, qui se habet, et in gaudium inimicis dat illum et deducet in sortem impiorum.

5. verbum dulce multiplicat amicos et mitigat inimicos et lingua eucharis in bono homine abundat

5. Os dulce multiplicat amicos et mitigat inimicos; et lingua eucharis salutem dicit.

6. multi pacifici sint tibi et consiliarii tibi sint unus de mille

6. Multi pacifici sint tibi, et consiliarius sit tibi unus de mille.

7. si possides amicum in temptatione posside eum et non facile credas illi

7. Si possides amicum, in tentatione posside eum et ne facile credas ei.

8. est enim amicus secundum tempus suum et non permanebit in die tribulationis

8. Est enim amicus secundum opportunitatem suam et non permanebit in die tribulationis.

9. et est amicus qui egreditur ad inimicitiam et est amicus qui odium et rixam et convicia denudabit

9. Et est amicus, qui convertitur ad inimicitiam et rixam convicii tui denudabit.

10. est autem amicus socius mensæ et non permanet in die necessitatis

10. Est autem amicus socius mensae et non permanebit in die necessitatis;

11. amicus si permanserit fixus erit tibi quasi coæqualis et in domesticis tuis fiducialiter aget

11. in prosperis erit tibi quasi coaequalis et in domesticis tuis fiducialiter aget.

12. si humiliaverit se contra te et a facie tua abscondet se unianimem habebis amicitiam bonam

12. Si humiliatus fueris, convertetur contra te et a facie tua abscondet se.

13. ab inimicis tuis separare et ab amicis tuis adtende

13. Ab inimicis tuis separare et de amicis tuis attende.

14. amicus fidelis protectio fortis qui autem invenit illum invenit thesaurum

14. Amicus fidelis protectio fortis; qui autem invenit illum, invenit thesaurum.

15. amico fideli nulla est conparatio et non est digna ponderatio auri et argenti contra bonitatem fidei illius

15. Amico fideli nulla est comparatio, et non est ponderatio contra bonitatem illius.

16. amicus fidelis medicamentum vitæ et inmortalitatis et qui metuunt Dominum inveniunt illum

16. Amicus fidelis medicamentum vitae, et, qui metuunt Dominum, invenient illum.

17. qui timet Deum æque habebit amicitiam bonam quoniam secundum illum erit amicus illius

17. Qui timet Deum, aeque habebit amicitiam eius, quoniam secundum illum erit amicus illius.

18. fili a juventute tua excipe doctrinam et usque ad canos invenies sapientiam

18. Fili, a iuventute tua excipe doctrinam et usque ad canos invenies sapientiam.

19. quasi is qui arat et seminat accede ad illam et sustine bonos fructus illius

19. Quasi is qui arat et seminat, accede ad eam et sustine bonos fructus illius.

20. in opere enim ipsius exiguum laborabis et cito edes de generationibus illius

20. In opere enim ipsius exiguum laborabis et cito edes de generationibus illius.

21. quam aspera est nimium sapientia indoctis hominibus et non permanet in illa excors

21. Quam aspera est nimium sapientia indoctis hominibus, et non permanebit in illa excors.

22. quasi lapidis virtus probatio erit in illis et non demorabuntur proicere illum

22. Quasi lapis probationis gravis erit super illum, et non demorabitur proicere illam.

23. sapientia enim doctrinæ secundum nomen est ejus et non multis est manifesta quibus autem agnita est permanet usque ad conspectum Dei

23. Doctrina est enim secundum nomen eius et non est multis manifesta; quibus autem cognita est, permanet usque ad conspectum Dei.

24. audi fili et accipe consilium intellectus et ne abicias consilium meum

24. Audi, fili, et accipe sententiam meam et ne abicias consilium meum.

25. inice pedem tuum in conpedes illius et in torques ejus tuum collum

25. Inice pedem tuum in compedes illius et in torques illius collum tuum;

26. subice umerum tuum et porta illam et ne acedieris vinculis ejus

26. subice umerum tuum et porta illam et ne acedieris vinculis eius.

27. in omni animo tuo accede ad illam et in omni virtute tua serva vias ejus

27. In omni animo tuo accede ad illam et in omni virtute tua conserva vias eius.

28. investiga illam et manifestabitur tibi et continens factus ne derelinqueris eam

28. Investiga et scrutare, exquire et invenies, et continens factus ne derelinquas eam.

29. in novissimis enim invenies requiem in ea et convertetur tibi in oblectationem

29. In novissimis enim invenies requiem in ea, et convertetur tibi in oblectationem.

30. et erunt tibi conpedes in protectionem fortitudinis et bases virtutis et torques illius in stolam gloriæ

30. Et erunt tibi compedes eius in protectionem fortitudinis, et torques illius in stolam gloriae;

31. decor enim vitæ est in illa et vincula illius netura salutaris

31. decor enim aureus est in illa, et vincula illius alligatura hyacinthina.

32. stolam gloriæ indues eam et coronam gratulationis superpones tibi

32. Stolam gloriae indues eam et coronam gratulationis superpones tibi.

33. fili si adtenderis mihi disces et si adcommodaveris animam tuam sapiens eris

33. Fili, si attenderis, disces; et, si accommodaveris animum tuum, prudens eris.

34. et si inclinaveris aurem tuam excipies doctrinam et si dilexeris audire sapiens eris

34. Si dilexeris audire, excipies doctrinam; et, si inclinaveris aurem tuam, sapiens eris.

35. in multitudine presbyterorum prudentium sta et sapientiæ illorum ex corde coniungere ut omnem narrationem Dei possis audire et proverbia laudis non effugiant te

35. In multitudine presbyterorum sta et sapientiae illorum ex corde coniungere, ut omnem narrationem Dei velis audire, et proverbia intellectus non effugiant a te.

36. et si videris sensatum evigila ad illum et gradus ostiorum illius exterat pes tuus

36. Et, si videris sensatum, evigila ad eum, et gradus ostiorum illius exterat pes tuus.

37. cogitatum habe in præceptis Dei et in mandatis illius maxime adsiduus esto et ipse dabit cor tibi et concupiscentia sapientiæ dabitur tibi

37. Cogitatum tuum habe in praeceptis Dei et in mandatis illius maxime assiduus esto; et ipse firmabit tibi cor, et concupiscentia sapientiae dabitur tibi.