Evangelium secundum Ioannem, 8

1. Jesus autem perrexit in montem Oliveti

1. Iesus autem perrexit in montem Oliveti.

2. et diluculo iterum venit in templum et omnis populus venit ad eum et sedens docebat eos

2. Diluculo autem iterum venit in templum, et omnis populus veniebat ad eum, et sedens docebat eos.

3. adducunt autem scribæ et Pharisæi mulierem in adulterio deprehensam et statuerunt eam in medio

3. Adducunt autem scribae et pharisaei mulierem in adulterio deprehensam et statuerunt eam in medio

4. et dixerunt ei magister hæc mulier modo deprehensa est in adulterio

4. et dicunt ei: “Magister, haec mulier manifesto deprehensa est in adulterio.

5. in lege autem Moses mandavit nobis hujusmodi lapidare tu ergo quid dicis

5. In lege autem Moyses mandavit nobis huiusmodi lapidare; tu ergo quid dicis?”.

6. hæc autem dicebant temptantes eum ut possent accusare eum Jesus autem inclinans se deorsum digito scribebat in terra

6. Hoc autem dicebant tentantes eum, ut possent accusare eum. Iesus autem inclinans se deorsum digito scribebat in terra.

7. cum autem perseverarent interrogantes eum erexit se et dixit eis qui sine peccato est vestrum primus in illam lapidem mittat

7. Cum autem perseverarent interrogantes eum, erexit se et dixit eis: “Qui sine peccato est vestrum, primus in illam lapidem mittat”;

8. et iterum se inclinans scribebat in terra

8. et iterum se inclinans scribebat in terra.

9. audientes autem unus post unum exiebant incipientes a senioribus et remansit solus et mulier in medio stans

9. Audientes autem unus post unum exibant, incipientes a senioribus, et remansit solus, et mulier in medio stans.

10. erigens autem se Jesus dixit ei mulier ubi sunt nemo te condemnavit

10. Erigens autem se Iesus dixit ei: “Mulier, ubi sunt? Nemo te condemnavit?”.

11. quæ dixit nemo Domine dixit autem Jesus nec ego te condemnabo vade et amplius jam noli peccare

11. Quae dixit: “Nemo, Domine”. Dixit autem Iesus: “Nec ego te condemno; vade et amplius iam noli peccare”.

12. iterum ergo locutus est eis Jesus dicens ego sum lux mundi qui sequitur me non ambulabit in tenebris sed habebit lucem vitæ

12. Iterum ergo locutus est eis Iesus dicens: “Ego sum lux mundi; qui sequitur me, non ambulabit in tenebris, sed habebit lucem vitae”.

13. dixerunt ergo ei Pharisæi tu de te ipso testimonium perhibes testimonium tuum non est verum

13. Dixerunt ergo ei pharisaei: “Tu de teipso testimonium perhibes; testimonium tuum non est verum”.

14. respondit Jesus et dixit eis et si ego testimonium perhibeo de me ipso verum est testimonium meum quia scio unde veni et quo vado vos autem nescitis unde venio aut quo vado

14. Respondit Iesus et dixit eis: “Et si ego testimonium perhibeo de meipso, verum est testimonium meum, quia scio unde veni et quo vado; vos autem nescitis unde venio aut quo vado.

15. vos secundum carnem judicatis ego non judico quemquam

15. Vos secundum carnem iudicatis, ego non iudico quemquam.

16. et si judico ego judicium meum verum est quia solus non sum sed ego et qui me misit Pater

16. Et si iudico ego, iudicium meum verum est, quia solus non sum, sed ego et, qui me misit, Pater.

17. et in lege vestra scriptum est quia duorum hominum testimonium verum est

17. Sed et in lege vestra scriptum est, quia duorum hominum testimonium verum est.

18. ego sum qui testimonium perhibeo de me ipso et testimonium perhibet de me qui misit me Pater

18. Ego sum, qui testimonium perhibeo de meipso, et testimonium perhibet de me, qui misit me, Pater”.

19. dicebant ergo ei ubi est Pater tuus respondit Jesus neque me scitis neque Patrem meum si me sciretis forsitan et Patrem meum sciretis

19. Dicebant ergo ei: “Ubi est Pater tuus?”. Respondit Iesus: “Neque me scitis neque Patrem meum; si me sciretis, forsitan et Patrem meum sciretis”.

20. hæc verba locutus est in gazofilacio docens in templo et nemo adprehendit eum quia necdum venerat hora ejus

20. Haec verba locutus est in gazophylacio docens in templo; et nemo apprehendit eum, quia necdum venerat hora eius.

21. dixit ergo iterum eis Jesus ego vado et quæretis me et in peccato vestro moriemini quo ego vado vos non potestis venire

21. Dixit ergo iterum eis: “Ego vado, et quaeretis me et in peccato vestro moriemini! Quo ego vado, vos non potestis venire”.

22. dicebant ergo Judæi numquid interficiet semet ipsum quia dicit quo ego vado vos non potestis venire

22. Dicebant ergo Iudaei: “Numquid interficiet semetipsum, quia dicit: “Quo ego vado, vos non potestis venire”?”.

23. et dicebat eis vos de deorsum estis ego de supernis sum vos de mundo hoc estis ego non sum de hoc mundo

23. Et dicebat eis: “Vos de deorsum estis, ego de supernis sum; vos de mundo hoc estis, ego non sum de hoc mundo.

24. dixi ergo vobis quia moriemini in peccatis vestris si enim non credideritis quia ego sum moriemini in peccato vestro

24. Dixi ergo vobis quia moriemini in peccatis vestris; si enim non credideritis quia ego sum, moriemini in peccatis vestris”.

25. dicebant ergo ei tu quis es dixit eis Jesus principium quia et loquor vobis

25. Dicebant ergo ei: “Tu quis es?”. Dixit eis Iesus: “In principio: id quod et loquor vobis!

26. multa habeo de vobis loqui et judicare sed qui misit me verax est et ego quæ audivi ab eo hæc loquor in mundo

26. Multa habeo de vobis loqui et iudicare; sed, qui misit me, verax est, et ego, quae audivi ab eo, haec loquor ad mundum”.

27. et non cognoverunt quia Patrem eis dicebat

27. Non cognoverunt quia Patrem eis dicebat.

28. dixit ergo eis Jesus cum exaltaveritis Filium hominis tunc cognoscetis quia ego sum et a me ipso facio nihil sed sicut docuit me Pater hæc loquor

28. Dixit ergo eis Iesus: “Cum exaltaveritis Filium hominis, tunc cognoscetis quia ego sum et a meipso facio nihil, sed, sicut docuit me Pater, haec loquor.

29. et qui me misit mecum est non reliquit me solum quia ego quæ placita sunt ei facio semper

29. Et qui me misit, mecum est; non reliquit me solum, quia ego, quae placita sunt ei, facio semper”.

30. hæc illo loquente multi crediderunt in eum

30. Haec illo loquente, multi crediderunt in eum.

31. dicebat ergo Jesus ad eos qui crediderunt ei Judæos si vos manseritis in sermone meo vere discipuli mei eritis

31. Dicebat ergo Iesus ad eos, qui crediderunt ei, Iudaeos: “Si vos manseritis in sermone meo, vere discipuli mei estis

32. et cognoscetis veritatem et veritas liberabit vos

32. et cognoscetis veritatem, et veritas liberabit vos”.

33. responderunt ei semen Abrahæ sumus et nemini servivimus umquam quomodo tu dicis liberi eritis

33. Responderunt ei: “Semen Abrahae sumus et nemini servivimus umquam! Quomodo tu dicis: “Liberi fietis”?”.

34. respondit eis Jesus amen amen dico vobis quia omnis qui facit peccatum servus est peccati

34. Respondit eis Iesus: “Amen, amen dico vobis: Omnis, qui facit peccatum, servus est peccati.

35. servus autem non manet in domo in æternum filius manet in æternum

35. Servus autem non manet in domo in aeternum; filius manet in aeternum.

36. si ergo Filius vos liberaverit vere liberi eritis

36. Si ergo Filius vos liberaverit, vere liberi eritis.

37. scio quia filii Abrahæ estis sed quæritis me interficere quia sermo meus non capit in vobis

37. Scio quia semen Abrahae estis; sed quaeritis me interficere, quia sermo meus non capit in vobis.

38. ego quod vidi apud Patrem loquor et vos quæ vidistis apud patrem vestrum facitis

38. Ego, quae vidi apud Patrem, loquor; et vos ergo, quae audivistis a patre, facitis”.

39. responderunt et dixerunt ei pater noster Abraham est dicit eis Jesus si filii Abrahæ estis opera Abrahæ facite

39. Responderunt et dixerunt ei: “Pater noster Abraham est”. Dicit eis Iesus: “Si filii Abrahae essetis, opera Abrahae faceretis.

40. nunc autem quæritis me interficere hominem qui veritatem vobis locutus sum quam audivi a Deo hoc Abraham non fecit

40. Nunc autem quaeritis me interficere, hominem, qui veritatem vobis locutus sum, quam audivi a Deo; hoc Abraham non fecit.

41. vos facitis opera patris vestri dixerunt itaque ei nos ex fornicatione non sumus nati unum patrem habemus Deum

41. Vos facitis opera patris vestri”. Dixerunt itaque ei: “Nos ex fornicatione non sumus nati; unum patrem habemus Deum!”.

42. dixit ergo eis Jesus si Deus pater vester esset diligeretis utique me ego enim ex Deo processi et veni neque enim a me ipso veni sed ille me misit

42. Dixit eis Iesus: “Si Deus pater vester esset, diligeretis me; ego enim ex Deo processi et veni; neque enim a meipso veni, sed ille me misit.

43. quare loquellam meam non cognoscitis quia non potestis audire sermonem meum

43. Quare loquelam meam non cognoscitis? Quia non potestis audire sermonem meum.

44. vos ex patre diabolo estis et desideria patris vestri vultis facere ille homicida erat ab initio et in veritate non stetit quia non est veritas in eo cum loquitur mendacium ex propriis loquitur quia mendax est et pater ejus

44. Vos ex patre Diabolo estis et desideria patris vestri vultis facere. Ille homicida erat ab initio et in veritate non stabat, quia non est veritas in eo. Cum loquitur mendacium, ex propriis loquitur, quia mendax est et pater eius.

45. ego autem quia veritatem dico non creditis mihi

45. Ego autem quia veritatem dico, non creditis mihi.

46. quis ex vobis arguit me de peccato si veritatem dico quare vos non creditis mihi

46. Quis ex vobis arguit me de peccato? Si veritatem dico, quare vos non creditis mihi?

47. qui est ex Deo verba Dei audit propterea vos non auditis quia ex Deo non estis

47. Qui est ex Deo, verba Dei audit; propterea vos non auditis, quia ex Deo non estis”.

48. responderunt igitur Judæi et dixerunt ei nonne bene dicimus nos quia Samaritanus es tu et dæmonium habes

48. Responderunt Iudaei et dixerunt ei: “Nonne bene dicimus nos, quia Samaritanus es tu et daemonium habes?”.

49. respondit Jesus ego dæmonium non habeo sed honorifico Patrem meum et vos inhonoratis me

49. Respondit Iesus: “Ego daemonium non habeo, sed honorifico Patrem meum, et vos inhonoratis me.

50. ego autem non quæro gloriam meam est qui quærit et judicat

50. Ego autem non quaero gloriam meam; est qui quaerit et iudicat.

51. amen amen dico vobis si quis sermonem meum servaverit mortem non videbit in æternum

51. Amen, amen dico vobis: Si quis sermonem meum servaverit, mortem non videbit in aeternum”.

52. dixerunt ergo Judæi nunc cognovimus quia dæmonium habes Abraham mortuus est et prophetæ et tu dicis si quis sermonem meum servaverit non gustabit mortem in æternum

52. Dixerunt ergo ei Iudaei: “Nunc cognovimus quia daemonium habes. Abraham mortuus est et prophetae, et tu dicis: “Si quis sermonem meum servaverit, non gustabit mortem in aeternum”.

53. numquid tu major es patre nostro Abraham qui mortuus est et prophetæ mortui sunt quem te ipsum facis

53. Numquid tu maior es patre nostro Abraham, qui mortuus est? Et prophetae mortui sunt! Quem teipsum facis?”.

54. respondit Jesus si ego glorifico me ipsum gloria mea nihil est est Pater meus qui glorificat me quem vos dicitis quia Deus noster est

54. Respondit Iesus: “Si ego glorifico meipsum, gloria mea nihil est; est Pater meus, qui glorificat me, quem vos dicitis: “Deus noster est!”,

55. et non cognovistis eum ego autem novi eum et si dixero quia non scio eum ero similis vobis mendax sed scio eum et sermonem ejus servo

55. et non cognovistis eum. Ego autem novi eum. Et si dixero: Non scio eum, ero similis vobis, mendax; sed scio eum et sermonem eius servo.

56. Abraham pater vester exultavit ut videret diem meum et vidit et gavisus est

56. Abraham pater vester exsultavit, ut videret diem meum; et vidit et gavisus est”.

57. dixerunt ergo Judæi ad eum quinquaginta annos nondum habes et Abraham vidisti

57. Dixerunt ergo Iudaei ad eum: “Quinquaginta annos nondum habes et Abraham vidisti?”.

58. dixit eis Jesus amen amen dico vobis antequam Abraham fieret ego sum

58. Dixit eis Iesus: “Amen, amen dico vobis: Antequam Abraham fieret, ego sum”.

59. tulerunt ergo lapides ut jacerent in eum Jesus autem abscondit se et exivit de templo

59. Tulerunt ergo lapides, ut iacerent in eum; Iesus autem abscondit se et exivit de templo.