Liber Ieremiae, 13

1. hæc dicit Dominus ad me vade et posside tibi lumbare lineum et pones illud super lumbos tuos et in aquam non inferes illud

1. Haec dixit Dominus ad me: “Vade et posside tibi lumba re lineum et pones illud super lumbos tuos et in aquam non inferes illud”.

2. et possedi lumbare juxta verbum Domini et posui circa lumbos meos

2. Et possedi lumbare iuxta verbum Domini et posui circa lumbos meos.

3. et factus est sermo Domini ad me secundo dicens

3. Et factus est sermo Domini ad me secundo dicens:

4. tolle lumbare quod possedisti quod est circa lumbos tuos et surgens vade ad Eufraten et absconde illud ibi in foramine petræ

4. “Tolle lumbare, quod possedisti, quod est circa lumbos tuos, et surgens vade ad Euphraten et absconde ibi illud in foramine petrae”.

5. et abii et abscondi illud in Eufraten sicut præceperat mihi Dominus

5. Et abii et abscondi illud ad Euphraten, sicut praeceperat mihi Dominus.

6. et factum est post dies plurimos dixit Dominus ad me surge vade ad Eufraten et tolle inde lumbare quod præcepi tibi ut absconderes illud ibi

6. Et factum est, post dies plurimos dixit Dominus ad me: “Surge, vade ad Euphraten et tolle inde lumbare, quod praecepi tibi, ut absconderes ibi”.

7. et abii ad Eufraten et fodi et tuli lumbare de loco ubi absconderam illud et ecce conputruerat lumbare ita ut nullo usui aptum esset

7. Et abii ad Euphraten et fodi et tuli lumbare de loco, ubi absconderam illud; et ecce, computruerat lumbare, ita ut nulli usui aptum esset.

8. et factum est verbum Domini ad me dicens

8. Et factum est verbum Domini ad me dicens:

9. hæc dicit Dominus sic putrescere faciam superbiam Juda et superbiam Hierusalem multam

9. “Haec dicit Dominus: Sic putrescere faciam superbiam Iudae et superbiam Ierusalem multam;

10. populum istum pessimum qui nolunt audire verba mea et ambulant in pravitate cordis sui abieruntque post deos alienos ut servirent eis et adorarent eos et erunt sicut lumbare istud quod nullo usui aptum est

10. populus iste pessimus — qui nolunt audire verba mea et ambulant in pravitate cordis sui abieruntque post deos alienos, ut servirent eis et adorarent eos — erit sicut lumbare istud, quod nulli usui aptum est.

11. sicut enim adheret lumbare ad lumbos viri sic adglutinavi mihi omnem domum Israël et omnem domum Juda dicit Dominus ut esset mihi in populum et in nomen et in laudem et in gloriam et non audierunt

11. Sicut enim adhaeret lumbare ad lumbos viri, sic agglutinavi mihi omnem domum Israel et omnem domum Iudae, dicit Dominus, ut esset mihi in populum et in nomen et in laudem et in gloriam, et non audierunt.

12. dices ergo ad eos sermonem istum hæc dicit Dominus Deus Israël omnis laguncula implebitur vino et dicent ad te numquid ignoramus quia omnis laguncula implebitur vino

12. Dices ergo ad eos sermonem istum: Haec dicit Dominus, Deus Israel: Omnis laguncula implebitur vino. Et dicent ad te: “Numquid ignoramus quia omnis laguncula implebitur vino?”.

13. et dices ad eos hæc dicit Dominus ecce ego implebo omnes habitatores terræ hujus et reges qui sedent de stirpe David super thronum ejus et sacerdotes et prophetas et omnes habitatores Hierusalem ebrietate

13. Et dices ad eos: Haec dicit Dominus: Ecce ego implebo omnes habitatores terrae huius et reges, qui sedent de stirpe David super thronum eius, et sacerdotes et prophetas et omnes habitatores Ierusalem ebrietate;

14. et dispergam eos virum a fratre suo et patres et filios pariter ait Dominus non parcam et non concedam neque miserebor ut non disperdam eos

14. et collidam eos, virum in fratrem suum et patres et filios pariter, ait Dominus; non parcam et non concedam neque miserebor, ut non disperdam eos”.

15. audite et auribus percipite nolite elevari quia Dominus locutus est

15. Audite et auribus percipite; nolite elevari, quia Dominus locutus est.

16. date Domino Deo vestro gloriam antequam contenebrescat et antequam offendant pedes vestri ad montes caligosos expectabitis lucem et ponet eam in umbram mortis et in caliginem

16. Date Domino Deo vestro gloriam, antequam contenebrescat, et antequam offendant pedes vestri ad montes caliginosos; exspectabitis lucem, et ponet eam in umbram mortis et in caliginem.

17. quod si hoc non audieritis in abscondito plorabit anima mea a facie superbiæ plorans plorabit et deducet oculus meus lacrimam quia captus est grex Domini

17. Quod si hoc non audieritis, in abscondito plorabit anima mea a facie superbiae; plorans plorabit et deducet oculus meus lacrimam, quia captus est grex Domini.

18. dic regi et dominatrici humiliamini sedete quoniam descendit de capite vestro corona gloriæ vestræ

18. “Dic regi et dominatrici: In humo sedete, quoniam descendit de capite vestro corona gloriae vestrae.

19. civitates austri clausæ sunt et non est qui aperiat translata est omnis Judæa transmigratione perfecta

19. Civitates austri clausae sunt, et non est qui aperiat; translata est omnis Iuda transmigratione perfecta.

20. levate oculos vestros et videte qui venitis ab aquilone ubi est grex qui datus est tibi pecus inclitum tuum

20. Leva oculos tuos et vide venientes ab aquilone: Ubi est grex, qui datus est tibi, pecus inclitum tuum?

21. quid dices cum visitaverit te tu enim docuisti eos adversum te et erudisti in caput tuum numquid non dolores adprehendent te quasi mulierem parturientem

21. Quid dices, cum visitaverit te? Tu enim ipsa docuisti eos adversum te, amicos in caput tuum; numquid non dolores apprehendent te quasi mulierem parturientem?

22. quod si dixeris in corde tuo quare venerunt mihi hæc propter multitudinem iniquitatis tuæ revelata sunt verecundiora tua pollutæ sunt plantæ tuæ

22. Quod si dixeris in corde tuo: “Quare venerunt mihi haec?”. Propter multitudinem iniquitatis tuae revelatae sunt laciniae tuae, pollutae sunt plantae tuae.

23. si mutare potest Æthiops pellem suam aut pardus varietates suas et vos poteritis bene facere cum didiceritis malum

23. Numquid mutare potest Aethiops pellem suam aut pardus varietates suas? Tunc et vos poteritis benefacere, cum didiceritis malum.

24. et disseminabo eos quasi stipulam quæ vento raptatur in deserto

24. Et disseminabo eos quasi stipulam, quae raptatur in vento deserti.

25. hæc sors tua parsque mensuræ tuæ a me dicit Dominus quia oblita es mei et confisa es in mendacio

25. Haec sors tua parsque mensurae tuae a me, dicit Dominus, quia oblita es mei et confisa es in mendacio.

26. unde et ego nudavi femora tua contra faciem tuam et apparuit ignominia tua

26. Unde et ego sublevabo lacinias tuas super faciem tuam, et apparebit ignominia tua,

27. adulteria tua et hinnitus tuus scelus fornicationis tuæ super colles in agro vidi abominationes tuas væ tibi Hierusalem non mundaberis post me usquequo adhuc

27. adulteria tua et hinnitus tuus, scelus fornicationis tuae. Super colles in agro vidi abominationes tuas. Vae tibi, Ierusalem! Non mundaberis; usquequo adhuc?”.