Liber II Samuelis, 22

1. locutus est autem David Domino verba carminis hujus in die qua liberavit eum Dominus de manu omnium inimicorum suorum et de manu Saul

1. Locutus est autem David Domino verba carminis huius in die, qua liberavit eum Dominus de manu omnium inimicorum suorum et de manu Saul,

2. et ait Dominus petra mea et robur meum et salvator meus

2. et ait: “Dominus petra mea et arx mea et salvator meus;

3. Deus meus fortis meus sperabo in eum scutum meum et cornu salutis meæ elevator meus et refugium meum salvator meus de iniquitate liberabis me

3. Deus meus, rupes mea, in quam confugiam, scutum meum et cornu salutis meae! Munimentum meum et refugium meum. Salvator meus, de violentia liberabis me.

4. laudabilem invocabo Dominum et ab inimicis meis salvus ero

4. Laudabilem invocabo Dominum et ab inimicis meis salvus ero.

5. quia circumdederunt me contritiones mortis torrentes Belial terruerunt me

5. Quia circumdederunt me fluctus mortis, torrentes Belial terruerunt me;

6. funes inferi circumdederunt me prævenerunt me laquei mortis

6. praeoccupaverunt me laquei mortis.

7. in tribulatione mea invocabo Dominum et ad Deum meum clamabo et exaudiet de templo suo vocem meam et clamor meus veniet ad aures ejus

7. In tribulatione mea invocavi Dominum et ad Deum meum clamavi; et exaudivit de templo suo vocem meam, et clamor meus venit ad aures eius.

8. commota est et contremuit terra fundamenta montium concussa sunt et conquassata quoniam iratus est

8. Commota est et contremuit terra; fundamenta caelorum concussa sunt et conquassata, quoniam iratus est.

9. ascendit fumus de naribus ejus et ignis de ore ejus voravit carbones incensi sunt ab eo

9. Ascendit fumus de naribus eius, et ignis de ore eius vorabat; carbones incensi sunt ab eo.

10. et inclinavit cælos et descendit et caligo sub pedibus ejus

10. Et inclinavit caelos et descendit, et caligo sub pedibus eius.

11. et ascendit super cherubin et volavit et lapsus est super pinnas venti

11. Et ascendit super cherub et volavit et devolavit super pennas venti.

12. posuit tenebras in circuitu suo latibulum cribrans aquas de nubibus cælorum

12. Posuit tenebras in circuitu suo tabernaculum suum, tenebrosas aquas, nubes densissimas.

13. præ fulgore in conspectu ejus succensi sunt carbones ignis

13. Prae fulgore in conspectu eius incensi sunt carbones ignis.

14. tonabit de cælis Dominus et Excelsus dabit vocem suam

14. Intonuit de caelo Dominus, et Excelsus dedit vocem suam.

15. misit sagittas et dissipavit eos fulgur et consumpsit eos

15. Misit sagittas et dissipavit eos, fulguravit fulmina et conturbavit eos.

16. et apparuerunt effusiones maris et revelata sunt fundamenta orbis ab increpatione Domini ab inspiratione spiritus furoris ejus

16. Et apparuerunt effusiones maris, et revelata sunt fundamenta orbis ab increpatione Domini, ab inspiratione spiritus furoris eius.

17. misit de excelso et adsumpsit me extraxit me de aquis multis

17. Misit de excelso et assumpsit me, traxit me de aquis multis;

18. liberavit me ab inimico meo potentissimo ab his qui oderant me quoniam robustiores me erant

18. liberavit me ab inimico meo potentissimo, ab his, qui oderant me, qui robustiores me erant.

19. prævenit me in die adflictionis meæ et factus est Dominus firmamentum meum

19. Praevenerunt me in die afflictionis meae, et factus est Dominus firmamentum meum;

20. et eduxit me in latitudinem liberavit me quia placuit ei

20. et eduxit me in latitudinem, liberavit me, quia complacui ei.

21. retribuet mihi Dominus secundum justitiam meam et secundum munditiam manuum mearum reddet mihi

21. Retribuit mihi Dominus secundum iustitiam meam et secundum munditiam manuum mearum reddit mihi,

22. quia custodivi vias Domini et non egi impie a Deo meo

22. quia custodivi vias Domini et non egi impie a Deo meo.

23. omnia enim judicia ejus in conspectu meo et præcepta ejus non amovi a me

23. Omnia enim iudicia eius in conspectu meo, et a praeceptis eius non recessi;

24. et ero perfectus cum eo et custodiam me ab iniquitate mea

24. et fui immaculatus cum eo et custodivi me ab iniquitate mea.

25. et restituet Dominus mihi secundum justitiam meam et secundum munditiam manuum mearum in conspectu oculorum suorum

25. Et retribuet mihi Dominus secundum iustitiam meam et secundum munditiam meam in conspectu oculorum suorum.

26. cum sancto sanctus eris et cum robusto perfectus

26. Cum sancto sanctus eris et cum viro innocente innocens eris;

27. cum electo electus eris et cum perverso perverteris

27. cum electo electus eris et cum perverso callidus eris.

28. et populum pauperem salvum facies oculisque tuis excelsos humiliabis

28. Et populum pauperem salvum facies et oculos superborum humiliabis,

29. quia tu lucerna mea Domine et Domine inluminabis tenebras meas

29. quia tu lucerna mea, Domine, et Deus meus illuminat tenebras meas.

30. in te enim curram accinctus in Deo meo transiliam murum

30. In te enim aggrediar hostium turmas, in Deo meo transiliam murum.

31. Deus inmaculata via ejus eloquium Domini igne examinatum scutum est omnium sperantium in se

31. Deus, immaculata via eius, eloquium Domini igne examinatum; scutum est omnium sperantium in se.

32. quis est deus præter Dominum et quis fortis præter Deum nostrum

32. Quoniam quis est Deus praeter Dominum? Et quae rupes praeter Deum nostrum?

33. Deus qui accingit me fortitudine et conplanavit perfectam viam meam

33. Deus, qui accinxit me fortitudine et complanavit perfectam viam meam,

34. coæquans pedes meos cervis et super excelsa mea statuens me

34. coaequans pedes meos cervis et super excelsa statuens me;

35. docens manus meas ad prœlium et conponens quasi arcum æreum brachia mea

35. docens manus meas ad proelium, et tendunt arcum aereum brachia mea.

36. dedisti mihi clypeum salutis tuæ et mansuetudo mea multiplicavit me

36. Dedisti mihi clipeum salutis tuae, et exauditio tua magnificavit me.

37. dilatabis gressus meos subtus me et non deficient tali mei

37. Dilatasti gressus meos subtus me, et non sunt infirmati tali mei.

38. persequar inimicos meos et conteram et non revertar donec consumam eos

38. Persequebar inimicos meos et conterebam et non convertebar, donec consumerem eos.

39. consumam eos et confringam ut non consurgant cadent sub pedibus meis

39. Consumpsi eos et confregi, ut non consurgerent: ceciderunt sub pedibus meis.

40. accinxisti me fortitudine ad prœlium incurvabis resistentes mihi sub me

40. Accinxisti me fortitudine ad proelium, incurvasti insurgentes in me subtus me.

41. inimicos meos dedisti mihi dorsum odientes me et disperdam eos

41. Inimicos meos dedisti mihi dorsum, odientes me, et disperdidi eos.

42. clamabunt et non erit qui salvet ad Dominum et non exaudiet eos

42. Clamaverunt, et non erat qui salvaret, ad Dominum, et non exaudivit eos.

43. delebo eos ut pulverem terræ quasi lutum platearum comminuam eos atque conpingam

43. Contrivi eos ut pulverem terrae, quasi lutum platearum comminui eos.

44. salvabis me a contradictionibus populi mei custodies in caput gentium populus quem ignoro serviet mihi

44. Salvasti me a contradictionibus populi mei, constituisti me in caput gentium. Populus, quem ignorabam, servit mihi,

45. filii alieni resistent mihi auditu auris obœdient mihi

45. filii alieni blandiuntur mihi, auditu auris oboediunt mihi.

46. filii alieni defluxerunt et contrahentur in angustiis suis

46. Filii alieni defluunt et contremiscunt ex arcibus suis.

47. vivit Dominus et benedictus Deus meus et exaltabitur Deus fortis salutis meæ

47. Vivit Dominus, et benedicta petra mea, et exaltetur Deus, petra salutis meae.

48. Deus qui das vindictas mihi et deicis populos sub me

48. Deus, qui das vindictas mihi et deicis populos sub me.

49. qui educis me ab inimicis meis et a resistentibus mihi elevas me a viro iniquo liberabis me

49. Qui educis me ab inimicis meis et ab insurgentibus in me elevas me; a viro iniquo liberas me.

50. propterea confitebor tibi Domine in gentibus et nomini tuo cantabo

50. Propterea confitebor tibi, Domine, in gentibus, et nomini tuo cantabo:

51. magnificanti salutes regis sui et facienti misericordiam christo suo David et semini ejus in sempiternum

51. Magnificat salutes regis sui et facit misericordiam christo suo David et semini eius in sempiternum”.