Liber Ieremiae, 48

1. ad Moab hæc dicit Dominus exercituum Deus Israël væ super Nabo quoniam vastata est et confusa capta est Cariathaim confusa est fortis et tremuit

1. Ad Moab. Haec dicit Dominus exercituum, Deus Israel: “Vae super Nabo, quoniam vastata est et confusa! Capta est Cariathaim, confusa est arx et tremuit.

2. non est ultra exultatio in Moab contra Esebon cogitaverunt malum venite et disperdamus eam de gente ergo silens conticesces sequeturque te gladius

2. Non est ultra exsultatio in Moab; in Hesebon cogitaverunt malum contra eam: “Venite et disperdamus eam de gente”. Tu quoque, Madmen, conticesces, sequeturque te gladius.

3. vox clamoris de Oronaim vastitas et contritio magna

3. Vox clamoris de Oronaim: “Vastitas et contritio magna”.

4. contrita est Moab adnuntiate clamorem parvulis ejus

4. Contrita est Moab, auditum fecerunt clamorem usque ad Segor.

5. per ascensum enim Luaith plorans ascendet in fletu quoniam in descensu Oronaim hostes ululatum contritionis audierunt

5. Per ascensum enim Luith plorans ascendit in fletu, quoniam in descensu Oronaim hostes ululatum contritionis audierunt:

6. fugite salvate animas vestras et eritis quasi myrice in deserto

6. “Fugite, salvate animas vestras et eritis quasi myricae in deserto”.

7. pro eo enim quod habuisti fiduciam in munitionibus tuis et in thesauris tuis tu quoque capieris et ibit Chamos in transmigrationem sacerdotes ejus et principes ejus simul

7. Pro eo enim quod habuisti fiduciam in operibus tuis et in thesauris tuis, tu quoque capieris; et ibit Chamos in transmigrationem, sacerdotes eius et principes eius simul.

8. et veniet prædo ad omnem urbem et urbs nulla salvabitur et peribit vallis et dissipabuntur campestria quoniam dixit Dominus

8. Et veniet praedo ad omnem urbem, et urbs nulla salvabitur; et peribit vallis, et dissipabuntur campestria, quoniam dixit Dominus.

9. date florem Moab quia floriens egredietur et civitates ejus desertæ erunt et inhabitabiles

9. Date pennas ad volandum; et civitates eius desertae erunt et inhabitabiles.

10. maledictus qui facit opus Domini fraudulenter et maledictus qui prohibet gladium suum a sanguine

10. Maledictus, qui facit opus Domini neglegenter, et maledictus, qui prohibet gladium suum a sanguine.

11. fertilis fuit Moab ab adulescentia sua et requievit in fecibus suis nec transfusus est de vase in vas et in transmigrationem non abiit idcirco permansit gustus ejus in eo et odor ejus non est inmutatus

11. Securus fuit Moab ab adulescentia sua et requievit in faecibus suis nec transfusus est de vase in vas et in transmigrationem non abiit; idcirco permansit gustus eius in eo, et odor eius non est immutatus.

12. propterea ecce dies veniunt dicit Dominus et mittam ei ordinatores et stratores laguncularum et sternent eum et vasa ejus exhaurient et lagœnas eorum conlident

12. Propterea, ecce, dies veniunt, dicit Dominus, et mittam ei stratores laguncularum; et sternent eum et vasa eius exhaurient et lagunculas eorum collident.

13. et confundetur Moab a Chamos sicut confusa est domus Israël a Bethel in qua habebat fiduciam

13. Et confundetur Moab a Chamos, sicut confusa est domus Israel a Bethel, in qua habebat fiduciam.

14. quomodo dicitis fortes sumus et viri robusti ad prœliandum

14. Quomodo dicitis: “Fortes sumus et viri robusti ad proeliandum”?

15. vastata est Moab et civitates illius ascenderunt et electi juvenes ejus descenderunt in occisionem ait Rex Dominus exercituum nomen ei

15. Vastata est Moab, et ascenderunt civitates illius, et electi iuvenes eius descenderunt in occisionem, ait rex, Dominus exercituum nomen eius.

16. prope est interitus Moab ut veniat et malum ejus velociter adcurret nimis

16. Prope est interitus Moab ut veniat, et malum eius velociter accurret nimis.

17. consolamini eum omnes qui estis in circuitu ejus et universi qui scitis nomen ejus dicite quomodo confracta est virga fortis baculus gloriosus

17. Lugete super eum, omnes, qui estis in circuitu eius; et universi, qui scitis nomen eius, dicite: “Quomodo confracta est virga fortis, baculus gloriosus?”.

18. descende de gloria et sede in siti habitatio filiæ Dibon quoniam vastator Moab ascendet ad te dissipabit munitiones tuas

18. Descende de gloria et sede in siti, habitatrix filia Dibon, quoniam vastator Moab ascendit ad te, dissipavit munitiones tuas.

19. in via sta et prospice habitatio Arœr interroga fugientem et eum qui evasit dic quid accidit

19. Ad viam sta et prospice, habitatrix Aroer; interroga fugientem et eam, quae evasit. Dic: “Quid accidit?”.

20. confusus est Moab quoniam victus est ululate et clamate adnuntiate in Arnon quoniam vastata est Moab

20. Confusus est Moab, quoniam victus est. Ululate et clamate; annuntiate in Arnon, quoniam vastatus est Moab.

21. et judicium venit ad terram campestrem super Helon et super Jæsa et super Mefath

21. Et iudicium venit ad terram campestrem super Helon et super Iasa et super Mephaath

22. et super Dibon et super Nabo et super domum Deblathaim

22. et super Dibon et super Nabo et super Bethdeblathaim,

23. et super Cariathaim et super Bethgamul et super Bethmaon

23. et super Cariathaim et super Bethgamul et super Bethmaon

24. et super Carioth et super Bosra et super omnes civitates terræ Moab quæ longe et quæ prope sunt

24. et super Carioth et super Bosra et super omnes civitates terrae Moab, quae longe et quae prope sunt.

25. abscisum est cornu Moab et brachium ejus contritum est ait Dominus

25. Abscissum est cornu Moab, et brachium eius contritum est, ait Dominus.

26. inebriate eum quoniam contra Dominum erectus est et adlidet manum Moab in vomitu suo et erit in derisum etiam ipse

26. Inebriate eum, quoniam contra Dominum erectus est; et allidet manum Moab in vomitu suo, et erit in derisum etiam ipse.

27. fuit enim in derisum tibi Israël quasi inter fures repperisses eum propter verba ergo tua quæ adversum illum locutus es captivus duceris

27. Nonne in derisum tibi fuit Israel? Num inter fures repertus est? Quotiescumque enim adversum illum loquebaris, caput movebas.

28. relinquite civitates et habitate in petra habitatores Moab et estote quasi columba nidificans in summo ore foraminis

28. Relinquite civitates et habitate in petra, habitatores Moab, et estote quasi columba nidificans in parietibus apertae voraginis.

29. audivimus superbiam Moab superbus est valde sublimitatem ejus et arrogantiam et superbiam et altitudinem cordis illius

29. Audivimus superbiam Moab, superbus est valde; sublimitatem eius et arrogantiam et superbiam et altitudinem cordis eius.

30. ego scio ait Dominus jactantiam ejus et quod non sit juxta eam virtus ejus nec juxta quod poterat conata sit facere

30. Ego scio, ait Dominus, iactantiam eius, et quod non sint rectae fabulationes, nec recta fecerint.

31. ideo super Moab hejulabo et ad Moab universam clamabo ad viros muri fictilis lamentantes

31. Ideo super Moab eiulabo et super Moab universam clamabo, super viros Cirhareseth plorabitur.

32. de planctu Jazer plorabo tibi vinea Sobema propagines tuæ transierunt mare usque ad mare Jazer pervenerunt super messem tuam et vindemiam tuam prædo inruit

32. Plus quam in planctu Iazer plorabo tibi, vinea Sabama; propagines tuae transierunt mare, usque ad Iazer pervenerunt. Super messem tuam et vindemiam tuam praedo irruit.

33. ablata est lætitia et exultatio de Carmelo et de terra Moab et vinum de torcularibus sustuli nequaquam calcator uvæ solitum celeuma cantabit

33. Ablata est laetitia et exsultatio de horto et de terra Moab, et vinum de torcularibus sustuli; nequaquam calcator uvae solitum celeuma cantabit.

34. de clamore Esebon usque Eleale et Jæsa dederunt vocem suam a Segor usque ad Oronaim vitula conternante aquæ quoque Namrim pessimæ erunt

34. De clamore Hesebon usque Eleale et Iasa dederunt vocem suam, a Segor usque ad Oronaim, ad Eglatselisiam; aquae quoque Nemrim pessimae erunt.

35. et auferam de Moab ait Dominus offerentem in excelsis et sacrificantem diis ejus

35. Et auferam de Moab, ait Dominus, offerentem in excelsis et sacrificantem diis eius.

36. propterea cor meum ad Moab quasi tibiæ resonabit et cor meum ad viros muri fictilis dabit sonitum tibiarum quia plus fecit quam potuit idcirco perierunt

36. Propterea cor meum ad Moab quasi tibia resonabit, et cor meum ad viros Cirhareseth dabit sonitum tibiarum; quia depositum, quod acquisierunt, periit.

37. omne enim caput calvitium et omnis barba rasa erit in cunctis manibus conligatio et super omne dorsum cilicium

37. Omne enim caput calvitium et omnis barba rasa erit, in cunctis manibus incisiones et super lumbos cilicium.

38. super omnia tecta Moab et in plateis ejus omnis planctus quia contrivi Moab sicut vas inutile ait Dominus

38. Super omnia tecta Moab et in plateis eius omnis planctus, quoniam contrivi Moab sicut vas, quod nemini placet, ait Dominus.

39. quomodo victa est et ululaverunt quomodo dejecit cervicem Moab et confusus est eritque Moab in derisum et in exemplum omnibus in circuitu suo

39. Quomodo victa est, et ululaverunt? Quomodo vertit dorsum Moab et confusus est? Eritque Moab in derisum et in terrorem omnibus in circuitu suo.

40. hæc dicit Dominus ecce quasi aquila evolabit et extendet alas suas ad Moab

40. Haec dicit Dominus: Ecce quasi aquila volabit et extendet alas suas ad Moab.

41. capta est Carioth et munitiones conprehensæ sunt et erit cor fortium Moab in die illa sicut cor mulieris parturientis

41. Capta sunt oppida, et munitiones comprehensae sunt, et erit cor fortium Moab in die illa sicut cor mulieris parturientis.

42. et cessabit Moab esse populus quoniam contra Dominum gloriatus est

42. Et cessabit Moab esse populus, quoniam contra Dominum gloriatus est.

43. pavor et fovea et laqueus super te o habitator Moab ait Dominus

43. Pavor et fovea et laqueus super te, o habitator Moab, dicit Dominus.

44. qui fugit a facie pavoris cadet in foveam et qui conscenderit de fovea capietur laqueo adducam enim super Moab annum visitationis eorum dicit Dominus

44. Qui fugerit a facie pavoris, cadet in foveam, et, qui conscenderit de fovea, capietur laqueo; adducam enim super Moab annum visitationis eorum, ait Dominus.

45. in umbra Esebon steterunt de laqueo fugientes quia ignis egressus est de Esebon et flamma de medio Seon et devorabit partem Moab et verticem filiorum tumultus

45. In umbra Hesebon steterunt sine viribus fugientes, sed ignis egressus est de Hesebon, et flamma de medio Sehon, et devoravit tempora Moab et verticem filiorum tumultus.

46. væ tibi Moab peristi popule Chamos quia conprehensi sunt filii tui et filiæ tuæ in captivitatem

46. Vae tibi, Moab! Periit populus Chamos, quia comprehensi sunt filii tui et filiae tuae in captivitatem.

47. et convertam captivitatem Moab in novissimis diebus ait Dominus hucusque judicia Moab

47. Et convertam sortem Moab in novissimis diebus”, ait Dominus. Hucusque iudicia Moab.