Liber Isaiae, 10

1. væ qui condunt leges iniquas et scribentes iniustitiam scripserunt

1. Vae, qui condunt leges iniquas et scribentes iniustitiam scribunt,

2. ut opprimerent in judicio pauperes et vim facerent causæ humilium populi mei ut essent viduæ præda eorum et pupillos diriperent

2. ut opprimant in iudicio pauperes et vim faciant causae humilium populi mei, ut fiant viduae praeda eorum, et pupillos diripiant!

3. quid facietis in die visitationis et calamitatis de longe venientis ad cujus fugietis auxilium et ubi derelinquetis gloriam vestram

3. Quid facietis in die visitationis et calamitatis de longe venientis? Ad cuius confugietis auxilium et ubi derelinquetis gloriam vestram?

4. ne incurvemini sub vinculo et cum interfectis cadatis super omnibus his non est aversus furor ejus sed adhuc manus ejus extenta

4. Nam incurvabimini subter captivos et infra occisos cadetis. In omnibus his non est aversus furor eius, sed adhuc manus eius extenta.

5. væ Assur virga furoris mei et baculus ipse in manu eorum indignatio mea

5. Vae Assur, virga furoris mei et baculus in manu mea, indignatio mea!

6. ad gentem fallacem mittam eum et contra populum furoris mei mandabo illi ut auferat spolia et diripiat prædam et ponat illum in conculcationem quasi lutum platearum

6. Ad gentem impiam mitto eum et contra populum furoris mei mando illi, ut auferat spolia et diripiat praedam et ponat illum in conculcationem quasi lutum platearum.

7. ipse autem non sic arbitrabitur et cor ejus non ita æstimabit sed ad conterendum erit cor ejus et ad internicionem gentium non paucarum

7. Ipse autem non sic arbitratur, et cor eius non ita existimat; sed in corde suo ad conterendum et ad internecionem gentium non paucarum.

8. dicet enim

8. Dicet enim: “Numquid non principes mei omnes reges sunt?

9. numquid non principes mei simul reges sunt numquid non ut Charchamis sic Chalanno et ut Arfad sic Emath numquid non ut Damascus sic Samaria

9. Numquid non ut Charcamis sic Chalano? Numquid non ut Arphad sic Emath? Numquid non ut Damascus sic Samaria?

10. quomodo invenit manus mea regna idoli sic et simulacra eorum de Hierusalem et de Samaria

10. Quomodo apprehendit manus mea regna idololatra, quorum simulacra plura sunt quam in Ierusalem et in Samaria,

11. numquid non sicut feci Samariæ et idolis ejus sic faciam Hierusalem et simulacris ejus

11. numquid non sicut feci Samariae et idolis eius, sic faciam Ierusalem et simulacris eius?”.

12. et erit cum impleverit Dominus cuncta opera sua in monte Sion et in Hierusalem visitabo super fructum magnifici cordis regis Assur et super gloriam altitudinis oculorum ejus

12. Et erit: cum impleverit Dominus cuncta opera sua in monte Sion et in Ierusalem, visitabo super fructum superbiae cordis regis Assyriae et super arrogantiam altitudinis oculorum eius.

13. dixit enim in fortitudine manus meæ feci et in sapientia mea intellexi et abstuli terminos populorum et principes eorum deprædatus sum et detraxi quasi potens in sublime residentes

13. Dixit enim: “In fortitudine manus meae feci et in sapientia mea, prudens sum enim; et abstuli terminos populorum et scrinia eorum depraedatus sum et detraxi quasi potens in sublimi sedentes;

14. et invenit quasi nidum manus mea fortitudinem populorum et sicut colliguntur ova quæ derelicta sunt sic universam terram ego congregavi et non fuit qui moveret pinnam et aperiret os et ganniret

14. et apprehendit quasi nidum manus mea fortitudinem populorum; et sicut colliguntur ova derelicta, sic universam terram ego congregavi, et non fuit qui moveret pennam aut aperiret os et ganniret”.

15. numquid gloriabitur securis contra eum qui secat in ea aut exaltabitur serra contra eum a quo trahitur quomodo si elevetur virga contra levantem se et exaltetur baculus qui utique lignum est

15. Numquid gloriabitur securis contra eum, qui secat in ea? Aut exaltabitur serra contra eum, qui trahit eam? Quomodo si agitet virga elevantem eam, et exaltet baculus eum, qui non est lignum.

16. propter hoc mittet Dominator Deus exercituum in pinguibus ejus tenuitatem et subtus gloriam ejus succensa ardebit quasi conbustio ignis

16. Propter hoc mittet Dominator, Dominus exercituum, in pingues eius tenuitatem; et subtus gloriam eius ardor ardebit quasi combustio ignis.

17. et erit lumen Israël in igne et Sanctus ejus in flamma et succendetur et devorabitur spina ejus et vepres in die una

17. Et erit Lumen Israel ignis, et Sanctus eius flamma; et succendetur et devorabit spinas eius et vepres in die una.

18. et gloria saltus ejus et Carmeli ejus ab anima usque ad carnem consumetur et erit terrore profugus

18. Et gloriam saltus eius et horti eius ab anima usque ad carnem consumet, et erit sicut aeger tabescens;

19. et reliquiæ ligni saltus ejus pro paucitate numerabuntur et puer scribet eos

19. et reliquiae ligni saltus eius tam paucae erunt, ut puer scribat ea.

20. et erit in die illa non adiciet residuum Israël et hii qui fugerint de domo Jacob inniti super eo qui percutit eos sed innitetur super Dominum Sanctum Israël in veritate

20. Et erit in die illa: non adiciet residuum Israel et, qui effugerint de domo Iacob, inniti super eo, qui percutit eos, sed innitentur super Dominum, Sanctum Israel, in veritate.

21. reliquiæ convertentur reliquiæ inquam Jacob ad Deum fortem

21. Reliquiae revertentur, reliquiae, inquam, Iacob, ad Deum fortem.

22. si enim fuerit populus tuus Israël quasi harena maris reliquiæ convertentur ex eo consummatio adbreviata inundabit justitiam

22. Si enim fuerit populus tuus, Israel, quasi arena maris, reliquiae revertentur ex eo; consummatio decreta redundat in iustitia:

23. consummationem enim et adbreviationem Dominus Deus exercituum faciet in medio omnis terræ

23. interitum enim, qui decretus est, Dominus, Deus exercituum, faciet in medio omnis terrae.

24. propter hoc hæc dicit Dominus Deus exercituum noli timere populus meus habitator Sion ab Assur in virga percutiet te et baculum suum levabit super te in via Ægypti

24. Propter hoc haec dicit Dominus, Deus exercituum: “Noli timere, populus meus habitator Sion, ab Assur; in virga percutiet te et baculum suum levabit super te sicut Aegyptus.

25. adhuc enim paululum modicumque et consummabitur indignatio et furor meus super scelus eorum

25. Adhuc enim paululum modicumque, et consummabitur indignatio et furor meus ad destructionem eorum”.

26. et suscitabit super eum Dominus exercituum flagellum juxta plagam Madian in petra Oreb et virgam suam super mare et levabit eam in via Ægypti

26. Et suscitabit super eum Dominus exercituum flagellum iuxta plagam Madian in Petra Oreb et virgam suam super mare et levabit eam sicut in Aegypto.

27. et erit in die illa auferetur onus ejus de umero tuo et jugum ejus de collo tuo et conputrescet jugum a facie olei

27. Et erit in die illa: auferetur onus eius de umero tuo, et iugum eius de collo tuo. Et vastator ascendit a Remmon.

28. veniet in Ajath transibit in Magron apud Machmas commendabit vasa sua

28. Veniet in Aiath, transibit per Magron, apud Machmas deponit sarcinas suas;

29. transierunt cursim Gabee sedes nostra obstipuit Rama Gabaath Saulis fugit

29. transeunt vadum cursim; in Geba pernoctabimus; trepidat Rama, Gabaa Saulis fugit.

30. hinni voce tua filia Gallim adtende Laisa paupercula Anathoth

30. Hinni voce tua, Bathgallim; attende, Laisa; responde, Anathoth.

31. migravit Medemena habitatores Gebim confortamini

31. Migrat Medemena, habitatores Gabim fugiunt;

32. adhuc dies est ut in Nob stetur agitabit manum suam super montem filiæ Sion collem Hierusalem

32. hodie in Nob stabit: agitabit manum suam ad montem filiae Sion, collem Ierusalem.

33. ecce Dominator Dominus exercituum confringet lagunculam in terrore et excelsi statura succidentur et sublimes humiliabuntur

33. Ecce Dominator, Dominus exercituum, amputat ramos in terrore, et extrema acumina succiduntur, et sublimes humiliantur;

34. et subvertentur condensa saltus ferro et Libanus cum excelsis cadet

34. et caeduntur condensa saltus ferro, et Libanus cum excelsis suis cadet.