Liber Isaiae, 14

1. prope est ut veniat tempus ejus et dies ejus non elongabuntur miserebitur enim Dominus Jacob et eliget adhuc de Israël et requiescere eos faciet super humum suam adiungetur advena ad eos et adherebit domui Jacob

1. Miserebitur enim Dominus Iacob et eliget adhuc de Israel et requiescere eos faciet super humum suam; adiungetur advena ad eos et adhaerebit domui Iacob.

2. et tenebunt eos populi et adducent eos in locum suum et possidebit eos domus Israël super terram Domini in servos et ancillas et erunt capientes eos qui se ceperant et subicient exactores suos

2. Et tenebunt eos populi et adducent eos in locum suum; et possidebit eos domus Israel super terram Domini in servos et ancillas; et erunt capientes eos, qui se ceperant, et subicient exactores suos.

3. et erit in die illa cum requiem dederit tibi Deus a labore tuo et a concussione tua et a servitute dura qua ante servisti

3. Et erit in die illa: cum requiem dederit tibi Dominus a labore tuo et a concussione tua et a servitute dura, qua ante servisti,

4. sumes parabolam istam contra regem Babylonis et dices quomodo cessavit exactor quievit tributum

4. proferes parabolam istam contra regem Babylonis et dices: “Quomodo cessavit exactor, quievit oppressio?

5. contrivit Dominus baculum impiorum virgam dominantium

5. Contrivit Dominus baculum impiorum, virgam dominantium,

6. cædentem populos in indignatione plaga insanabili subicientem in furore gentes persequentem crudeliter

6. caedentem populos in indignatione plaga sine remissione, subicientem in furore gentes persecutione sine fine.

7. conquievit et siluit omnis terra gavisa est et exultavit

7. Conquievit et siluit omnis terra, gavisa est, et exsultaverunt.

8. abietes quoque lætatæ sunt super te et cedri Libani ex quo dormisti non ascendit qui succidat nos

8. Abietes quoque laetatae sunt super te, et cedri Libani: “Ex quo dormisti, non ascendit, qui succidat nos”.

9. infernus subter conturbatus est in occursum adventus tui suscitavit tibi gigantas omnes principes terræ surrexerunt de soliis suis omnes principes nationum

9. Infernus subter conturbatus est in occursum adventus tui; suscitat tibi umbras, omnes principes terrae surgere fecit de soliis suis, omnes reges nationum.

10. universi respondebunt et dicent tibi et tu vulneratus es sicut nos nostri similis effectus es

10. Universi respondebunt et dicent tibi: “Et tu vulneratus es sicut nos, nostri similis effectus es”.

11. detracta est ad inferos superbia tua concidit cadaver tuum subter te sternetur tinea et operimentum tuum erunt vermes

11. Detracta est ad inferos superbia tua, sonitus nablorum tuorum; subter te sternitur tinea, et operimentum tuum sunt vermes.

12. quomodo cecidisti de cælo lucifer qui mane oriebaris corruisti in terram qui vulnerabas gentes

12. Quomodo cecidisti de caelo, lucifer, fili aurorae? Deiectus es in terram, qui deiciebas gentes,

13. qui dicebas in corde tuo in cælum conscendam super astra Dei exaltabo solium meum sedebo in monte testamenti in lateribus aquilonis

13. qui dicebas in corde tuo: “In caelum conscendam, super astra Dei exaltabo solium meum, sedebo in monte conventus in lateribus aquilonis;

14. ascendam super altitudinem nubium ero similis Altissimo

14. ascendam super altitudinem nubium, similis ero Altissimo”.

15. verumtamen ad infernum detraheris in profundum laci

15. Verumtamen ad infernum detractus es, in profundum laci.

16. qui te viderint ad te inclinabuntur teque prospicient numquid iste est vir qui conturbavit terram qui concussit regna

16. Qui te viderint, te intuentur teque prospicient: “Numquid iste est vir, qui conturbavit terram, qui concussit regna,

17. qui posuit orbem desertum et urbes ejus destruxit vinctis ejus non aperuit carcerem

17. qui posuit orbem desertum et urbes eius destruxit, vinctis eius non aperuit carcerem?

18. omnes reges gentium universi dormierunt in gloria vir in domo sua

18. Omnes reges gentium universi dormiunt in gloria, vir in domo sua;

19. tu autem projectus es de sepulchro tuo quasi stirps inutilis pollutus et obvolutus qui interfecti sunt gladio et descenderunt ad fundamenta laci quasi cadaver putridum

19. tu autem proiectus es de sepulcro tuo quasi stirps abominabilis, obvolutus cum his, qui interfecti sunt gladio et descenderunt ad lapides sepulcri, quasi cadaver conculcatum.

20. non habebis consortium neque cum eis in sepultura tu enim terram disperdisti tu populum occidisti non vocabitur in æternum semen pessimorum

20. Non habebis consortium cum eis in sepultura; tu enim terram tuam disperdidisti, tu populum tuum occidisti: non vocabitur in aeternum semen malefactorum.

21. præparate filios ejus occisioni in iniquitate patrum eorum non consurgent nec hereditabunt terram neque implebunt faciem orbis civitatum

21. Praeparate filios eius occisioni ob iniquitatem patrum suorum; ne consurgant, ut hereditent terram, neque impleant faciem orbis civitatum””.

22. et consurgam super eos dicit Dominus exercituum et perdam Babylonis nomen et reliquias et germen et progeniem ait Dominus

22. “Et consurgam contra eos, dicit Dominus exercituum; et perdam Babylonis nomen et reliquias et germen et progeniem, dicit Dominus;

23. et ponam eam in possessionem ericii et in paludes aquarum et scopabo eam in scopa terens dicit Dominus exercituum

23. et ponam eam in possessionem ericii et in paludes aquarum, et scopabo eam in scopa destructionis”, dicit Dominus exercituum.

24. juravit Dominus exercituum dicens si non ut putavi ita erit et quomodo mente tractavi

24. Iuravit Dominus exercituum dicens: “Profecto, ut putavi, ita erit; et quomodo mente tractavi, sic eveniet.

25. sic eveniet ut conteram Assyrium in terra mea et in montibus meis conculcem eum et auferetur ab eis jugum ejus et onus illius ab umero eorum tolletur

25. Conteram Assyrium in terra mea et in montibus meis conculcabo eum; et auferetur ab eis iugum eius, et onus illius ab umero eorum tolletur”.

26. hoc consilium quod cogitavi super omnem terram et hæc est manus extenta super universas gentes

26. Hoc consilium, quod initum est super omnem terram, et haec est manus extenta super universas gentes.

27. Dominus enim exercituum decrevit et quis poterit infirmare et manus ejus extenta et quis avertet eam

27. Dominus enim exercituum decrevit, et quis poterit infirmare? Et manus eius extenta, et quis avertet eam?

28. in anno quo mortuus est rex Ahaz factum est onus istud

28. In anno, quo mortuus est rex Achaz, factum est oraculum istud:

29. ne læteris Philisthea omnis tu quoniam comminuta est virga percussoris tui de radice enim colubri egredietur regulus et semen ejus absorbens volucrem

29. “Ne laeteris, Philisthaea omnis tu, quoniam comminuta est virga percussoris tui; de radice enim colubri egredietur regulus, et semen eius draco volans.

30. et pascentur primogeniti pauperum et pauperes fiducialiter requiescent et interire faciam in fame radicem tuam et reliquias tuas interficiam

30. Et pascentur primogeniti egenorum, et pauperes fiducialiter requiescent; et interire faciam in fame radicem tuam et reliquias tuas interficiam.

31. ulula porta clama civitas prostrata est Philisthea omnis ab aquilone enim fumus venit et non est qui effugiat agmen ejus

31. Ulula, porta! Clama, civitas! Contremisce, Philisthaea omnis; ab aquilone enim fumus venit, et non est fugitivus in agminibus eius”.

32. et quid respondebitur nuntiis gentis quia Dominus fundavit Sion et in ipsa sperabunt pauperes populi ejus

32. Et quid respondebitur nuntiis gentis? “Quia Dominus fundavit Sion, et in ipsam confugiunt pauperes populi eius”.