Evangelium secundum Marcum, 14

1. erat autem pascha et azyma post biduum et quærebant summi sacerdotes et scribæ quomodo eum dolo tenerent et occiderent

1. Erat autem Pascha et Azy ma post biduum. Et quaerebant summi sacerdotes et scribae, quomodo eum dolo tenerent et occiderent;

2. dicebant enim non in die festo ne forte tumultus fieret populi

2. dicebant enim: “Non in die festo, ne forte tumultus fieret populi”.

3. et cum esset Bethaniæ in domo Simonis leprosi et recumberet venit mulier habens alabastrum unguenti nardi spicati pretiosi et fracto alabastro effudit super caput ejus

3. Et cum esset Bethaniae in domo Simonis leprosi et recumberet, venit mulier habens alabastrum unguenti nardi puri pretiosi; fracto alabastro, effudit super caput eius.

4. erant autem quidam indigne ferentes intra semet ipsos et dicentes ut quid perditio ista unguenti facta est

4. Erant autem quidam indigne ferentes intra semetipsos: “Ut quid perditio ista unguenti facta est?

5. poterat enim unguentum istud veniri plus quam trecentis denariis et dari pauperibus et fremebant in eam

5. Poterat enim unguentum istud veniri plus quam trecentis denariis et dari pauperibus”. Et fremebant in eam.

6. Jesus autem dixit sinite eam quid illi molesti estis bonum opus operata est in me

6. Iesus autem dixit: “Sinite eam; quid illi molesti estis? Bonum opus operata est in me.

7. semper enim pauperes habetis vobiscum et cum volueritis potestis illis benefacere me autem non semper habetis

7. Semper enim pauperes habetis vobiscum et, cum volueritis, potestis illis bene facere; me autem non semper habetis.

8. quod habuit hæc fecit prævenit unguere corpus meum in sepulturam

8. Quod habuit, operata est: praevenit ungere corpus meum in sepulturam.

9. amen dico vobis ubicumque prædicatum fuerit evangelium istud in universum mundum et quod fecit hæc narrabitur in memoriam ejus

9. Amen autem dico vobis: Ubicumque praedicatum fuerit evangelium in universum mundum, et, quod fecit haec, narrabitur in memoriam eius”.

10. et Judas Scariotis unus de duodecim abiit ad summos sacerdotes ut proderet eum illis

10. Et Iudas Iscarioth, unus de Duodecim, abiit ad summos sacerdotes, ut proderet eum illis.

11. qui audientes gavisi sunt et promiserunt ei pecuniam se daturos et quærebat quomodo illum oportune traderet

11. Qui audientes gavisi sunt et promiserunt ei pecuniam se daturos. Et quaerebat quomodo illum opportune traderet.

12. et primo die azymorum quando pascha immolabant dicunt ei discipuli quo vis eamus et paremus tibi ut manduces pascha

12. Et primo die Azymorum, quando Pascha immolabant, dicunt ei discipuli eius: “Quo vis eamus et paremus, ut manduces Pascha?”.

13. et mittit duos ex discipulis suis et dicit eis ite in civitatem et occurret vobis homo laguenam aquæ bajulans sequimini eum

13. Et mittit duos ex discipulis suis et dicit eis: “Ite in civitatem, et occurret vobis homo lagoenam aquae baiulans; sequimini eum

14. et quocumque introjerit dicite domino domus quia magister dicit ubi est refectio mea ubi pascha cum discipulis meis manducem

14. et, quocumque introierit, dicite domino domus: “Magister dicit: Ubi est refectio mea, ubi Pascha cum discipulis meis manducem?”.

15. et ipse vobis demonstrabit cenaculum grande stratum et illic parate nobis

15. Et ipse vobis demonstrabit cenaculum grande stratum paratum; et illic parate nobis”.

16. et abierunt discipuli ejus et venerunt in civitatem et invenerunt sicut dixerat illis et præparaverunt pascha

16. Et abierunt discipuli et venerunt in civitatem et invenerunt, sicut dixerat illis, et paraverunt Pascha.

17. vespere autem facto venit cum duodecim

17. Et vespere facto, venit cum Duodecim.

18. et discumbentibus eis et manducantibus ait Jesus amen dico vobis quia unus ex vobis me tradet qui manducat mecum

18. Et discumbentibus eis et manducantibus, ait Iesus: “Amen dico vobis: Unus ex vobis me tradet, qui manducat mecum”.

19. at illi cœperunt contristari et dicere ei singillatim numquid ego

19. Coeperunt contristari et dicere ei singillatim: “Numquid ego?”.

20. qui ait illis unus ex duodecim qui intinguit mecum in catino

20. Qui ait illis: “Unus ex Duodecim, qui intingit mecum in catino.

21. et Filius quidem hominis vadit sicut scriptum est de eo væ autem homini illi per quem Filius hominis traditur bonum ei si non esset natus homo ille

21. Nam Filius quidem hominis vadit, sicut scriptum est de eo. Vae autem homini illi, per quem Filius hominis traditur! Bonum est ei, si non esset natus homo ille”.

22. et manducantibus illis accepit Jesus panem et benedicens fregit et dedit eis et ait sumite hoc est corpus meum

22. Et manducantibus illis, accepit panem et benedicens fregit et dedit eis et ait: “Sumite: hoc est corpus meum”.

23. et accepto calice gratias agens dedit eis et biberunt ex illo omnes

23. Et accepto calice, gratias agens dedit eis; et biberunt ex illo omnes.

24. et ait illis hic est sanguis meus novi testamenti qui pro multis effunditur

24. Et ait illis: “Hic est sanguis meus novi testamenti, qui pro multis effunditur.

25. amen dico vobis quod jam non bibam de genimine vitis usque in diem illum cum illud bibam novum in regno Dei

25. Amen dico vobis: Iam non bibam de genimine vitis usque in diem illum, cum illud bibam novum in regno Dei”.

26. et hymno dicto exierunt in montem Olivarum

26. Et hymno dicto, exierunt in montem Olivarum.

27. et ait eis Jesus omnes scandalizabimini in nocte ista quia scriptum est percutiam pastorem et dispergentur oves

27. Et ait eis Iesus: “Omnes scandalizabimini, quia scriptum est: “Percutiam pastorem, et dispergentur oves”.

28. sed posteaquam resurrexero præcedam vos in Galilæam

28. Sed posteaquam resurrexero, praecedam vos in Galilaeam”.

29. Petrus autem ait ei et si omnes scandalizati fuerint sed non ego

29. Petrus autem ait ei: “Et si omnes scandalizati fuerint, sed non ego”.

30. et ait illi Jesus amen dico tibi quia tu hodie in nocte hac priusquam bis gallus vocem dederit ter me es negaturus

30. Et ait illi Iesus: “Amen dico tibi: Tu hodie, in nocte hac, priusquam bis gallus vocem dederit, ter me es negaturus”.

31. at ille amplius loquebatur et si oportuerit me simul conmori tibi non te negabo similiter autem et omnes dicebant

31. At ille amplius loquebatur: “Et si oportuerit me commori tibi, non te negabo”. Similiter autem et omnes dicebant.

32. et veniunt in prædium cui nomen Gethsemani et ait discipulis suis sedete hic donec orem

32. Et veniunt in praedium, cui nomen Gethsemani; et ait discipulis suis: “Sedete hic, donec orem”.

33. et adsumit Petrum et Jacobum et Johannem secum et cœpit pavere et tædere

33. Et assumit Petrum et Iacobum et Ioannem secum et coepit pavere et taedere;

34. et ait illis tristis est anima mea usque ad mortem sustinete hic et vigilate

34. et ait illis: “Tristis est anima mea usque ad mortem; sustinete hic et vigilate”.

35. et cum processisset paululum procidit super terram et orabat ut si fieri posset transiret ab eo hora

35. Et cum processisset paululum, procidebat super terram et orabat, ut, si fieri posset, transiret ab eo hora;

36. et dixit Abba Pater omnia possibilia tibi sunt transfer calicem hunc a me sed non quod ego volo sed quod tu

36. et dicebat: “Abba, Pater! Omnia tibi possibilia sunt. Transfer calicem hunc a me; sed non quod ego volo, sed quod tu”.

37. et venit et invenit eos dormientes et ait Petro Simon dormis non potuisti una hora vigilare

37. Et venit et invenit eos dormientes; et ait Petro: “Simon, dormis? Non potuisti una hora vigilare?

38. vigilate et orate ut non intretis in temptationem spiritus quidem promptus caro vero infirma

38. Vigilate et orate, ut non intretis in tentationem; spiritus quidem promptus, caro vero infirma”.

39. et iterum abiens oravit eundem sermonem dicens

39. Et iterum abiens oravit, eundem sermonem dicens.

40. et reversus denuo invenit eos dormientes erant enim oculi illorum ingravati et ignorabant quid responderent ei

40. Et veniens denuo invenit eos dormientes; erant enim oculi illorum ingravati, et ignorabant quid responderent ei.

41. et venit tertio et ait illis dormite jam et requiescite sufficit venit hora ecce traditur Filius hominis in manus peccatorum

41. Et venit tertio et ait illis: “Dormite iam et requiescite? Sufficit, venit hora: ecce traditur Filius hominis in manus peccatorum.

42. surgite eamus ecce qui me tradit prope est

42. Surgite, eamus; ecce, qui me tradit, prope est”.

43. et adhuc eo loquente venit Judas Scarioth unus ex duodecim et cum illo turba cum gladiis et lignis a summis sacerdotibus et a scribis et a senioribus

43. Et confestim, adhuc eo loquente, venit Iudas unus ex Duodecim, et cum illo turba cum gladiis et lignis a summis sacerdotibus et scribis et senioribus.

44. dederat autem traditor ejus signum eis dicens quemcumque osculatus fuero ipse est tenete eum et ducite

44. Dederat autem traditor eius signum eis dicens: “Quemcumque osculatus fuero, ipse est; tenete eum et ducite caute”.

45. et cum venisset statim accedens ad eum ait rabbi et osculatus est eum

45. Et cum venisset, statim accedens ad eum ait: “Rabbi”; et osculatus est eum.

46. at illi manus iniecerunt in eum et tenuerunt eum

46. At illi manus iniecerunt in eum et tenuerunt eum.

47. unus autem quidam de circumstantibus educens gladium percussit servum summi sacerdotis et amputavit illi auriculam

47. Unus autem quidam de circumstantibus educens gladium percussit servum summi sacerdotis et amputavit illi auriculam.

48. et respondens Jesus ait illis tamquam ad latronem existis cum gladiis et lignis conprehendere me

48. Et respondens Iesus ait illis: “Tamquam ad latronem existis cum gladiis et lignis comprehendere me?

49. cotidie eram apud vos in templo docens et non me tenuistis sed ut adimpleantur scripturæ

49. Cotidie eram apud vos in templo docens, et non me tenuistis; sed adimpleantur Scripturae”.

50. tunc discipuli ejus relinquentes eum omnes fugerunt

50. Et relinquentes eum omnes fugerunt.

51. adulescens autem quidam sequebatur illum amictus sindone super nudo et tenuerunt eum

51. Et adulescens quidam sequebatur eum amictus sindone super nudo, et tenent eum;

52. at ille rejecta sindone nudus profugit ab eis

52. at ille, reiecta sindone, nudus profugit.

53. et adduxerunt Jesum ad summum sacerdotem et conveniunt omnes sacerdotes et scribæ et seniores

53. Et adduxerunt Iesum ad summum sacerdotem; et conveniunt omnes summi sacerdotes et seniores et scribae.

54. Petrus autem a longe secutus est eum usque intro in atrium summi sacerdotis et sedebat cum ministris et calefaciebat se ad ignem

54. Et Petrus a longe secutus est eum usque intro in atrium summi sacerdotis et sedebat cum ministris et calefaciebat se ad ignem.

55. summi vero sacerdotes et omne concilium quærebant adversum Jesum testimonium ut eum morti traderent nec inveniebant

55. Summi vero sacerdotes et omne concilium quaerebant adversus Iesum testimonium, ut eum morte afficerent, nec inveniebant.

56. multi enim testimonium falsum dicebant adversus eum et convenientia testimonia non erant

56. Multi enim testimonium falsum dicebant adversus eum, et convenientia testimonia non erant.

57. et quidam surgentes falsum testimonium ferebant adversus eum dicentes

57. Et quidam surgentes falsum testimonium ferebant adversus eum dicentes:

58. quoniam nos audivimus eum dicentem ego dissolvam templum hoc manufactum et per triduum aliud non manufactum ædificabo

58. “Nos audivimus eum dicentem: “Ego dissolvam templum hoc manu factum et intra triduum aliud non manu factum aedificabo””.

59. et non erat conveniens testimonium illorum

59. Et ne ita quidem conveniens erat testimonium illorum.

60. et exsurgens summus sacerdos in medium interrogavit Jesum dicens non respondes quicquam ad ea quæ tibi obiciuntur ab his

60. Et exsurgens summus sacerdos in medium interrogavit Iesum dicens: “Non respondes quidquam ad ea, quae isti testantur adversum te?”.

61. ille autem tacebat et nihil respondit rursum summus sacerdos interrogabat eum et dicit ei tu es Christus Filius Benedicti

61. Ille autem tacebat et nihil respondit. Rursum summus sacerdos interrogabat eum et dicit ei: “Tu es Christus filius Benedicti?”.

62. Jesus autem dixit illi ego sum et videbitis Filium hominis a dextris sedentem Virtutis et venientem cum nubibus cæli

62. Iesus autem dixit: “Ego sum, et videbitis Filium hominis a dextris sedentem Virtutis et venientem cum nubibus caeli”.

63. summus autem sacerdos scindens vestimenta sua ait quid adhuc desideramus testes

63. Summus autem sacerdos scindens vestimenta sua ait: “Quid adhuc necessarii sunt nobis testes?

64. audistis blasphemiam quid vobis videtur qui omnes condemnaverunt eum esse reum mortis

64. Audistis blasphemiam. Quid vobis videtur?”. Qui omnes condemnaverunt eum esse reum mortis.

65. et cœperunt quidam conspuere eum et velare faciem ejus et colaphis eum cædere et dicere ei prophetiza et ministri alapis eum cædebant

65. Et coeperunt quidam conspuere eum et velare faciem eius et colaphis eum caedere et dicere ei: “Prophetiza”; et ministri alapis eum caedebant.

66. et cum esset Petrus in atrio deorsum venit una ex ancillis summi sacerdotis

66. Et cum esset Petrus in atrio deorsum, venit una ex ancillis summi sacerdotis

67. et cum vidisset Petrum calefacientem se aspiciens illum ait et tu cum Jesu Nazareno eras

67. et, cum vidisset Petrum calefacientem se, aspiciens illum ait: “Et tu cum hoc Nazareno, Iesu, eras!”.

68. at ille negavit dicens neque scio neque novi quid dicas et exiit foras ante atrium et gallus cantavit

68. At ille negavit dicens: “Neque scio neque novi quid tu dicas!”. Et exiit foras ante atrium, et gallus cantavit.

69. rursus autem cum vidisset illum ancilla cœpit dicere circumstantibus quia hic ex illis est

69. Et ancilla, cum vidisset illum, rursus coepit dicere circumstantibus: “Hic ex illis est!”.

70. at ille iterum negavit et post pusillum rursus qui adstabant dicebant Petro vere ex illis es nam et Galilæus es

70. At ille iterum negabat. Et post pusillum rursus, qui astabant, dicebant Petro: “Vere ex illis es, nam et Galilaeus es”.

71. ille autem cœpit anathematizare et jurare quia nescio hominem istum quem dicitis

71. Ille autem coepit anathematizare et iurare: “Nescio hominem istum, quem dicitis!”.

72. et statim iterum gallus cantavit et recordatus est Petrus verbi quod dixerat ei Jesus priusquam gallus cantet bis ter me negabis et cœpit flere

72. Et statim iterum gallus cantavit; et recordatus est Petrus verbi, sicut dixerat ei Iesus: “Priusquam gallus cantet bis, ter me negabis”. Et coepit flere.