Liber Proverbiorum, 10
1. parabolæ Salomonis filius sapiens lætificat patrem filius vero stultus mæstitia est matris suæ
1. Parabolae Salomonis. Filius sapiens laetificat pa trem, filius vero stultus maestitia est matris suae.
2. non proderunt thesauri impietatis justitia vero liberabit a morte
2. Nil proderunt thesauri impietatis, iustitia vero liberabit a morte.
3. non adfliget Dominus fame animam justi et insidias impiorum subvertet
3. Non affliget Dominus fame animam iusti et cupiditatem impiorum subvertet.
4. egestatem operata est manus remissa manus autem fortium divitias parat
4. Egestatem operata est manus remissa, manus autem fortium divitias parat.
5. qui congregat in messe filius sapiens est qui autem stertit æstate filius confusionis
5. Qui congregat in messe, filius sapiens est; qui autem stertit aestate, filius confusionis.
6. benedictio super caput justi os autem impiorum operit iniquitatem
6. Benedictiones Domini super caput iusti, os autem impiorum operit violentiam.
7. memoria justi cum laudibus et nomen impiorum putrescet
7. Memoria iusti in benedictione erit, et nomen impiorum putrescet.
8. sapiens corde præcepta suscipiet stultus cæditur labiis
8. Sapiens corde praecepta suscipit, et stultus labiis corruet.
9. qui ambulat simpliciter ambulat confidenter qui autem depravat vias suas manifestus erit
9. Qui ambulat simpliciter, ambulat confidenter; qui autem depravat vias suas, manifestus erit.
10. qui annuit oculo dabit dolorem stultus labiis verberabitur
10. Qui annuit oculo, dabit dolorem, et stultus labiis corruet.
11. vena vitæ os justi et os impiorum operiet iniquitatem
11. Vena vitae os iusti, et os impiorum operit violentiam.
12. odium suscitat rixas et universa delicta operit caritas
12. Odium suscitat rixas, et universa delicta operit caritas.
13. in labiis sapientis invenietur sapientia et virga in dorso ejus qui indiget corde
13. In labiis sapientis invenitur sapientia, et virga in dorso eius, qui indiget corde.
14. sapientes abscondunt scientiam os autem stulti confusioni proximum est
14. Sapientes recondunt scientiam, os autem stulti ruinae proximum est.
15. substantia divitis urbs fortitudinis ejus pavor pauperum egestas eorum
15. Substantia divitis urbs fortitudinis eius, ruina pauperum egestas eorum.
16. opus justi ad vitam fructus impii ad peccatum
16. Opus iusti ad vitam, fructus autem impii ad peccatum.
17. via vitæ custodienti disciplinam qui autem increpationes relinquit errat
17. Graditur ad vitam, qui custodit disciplinam; qui autem increpationes relinquit, errat.
18. abscondunt odium labia mendacia qui profert contumeliam insipiens est
18. Abscondunt odium labia mendacia; qui profert contumeliam, insipiens est.
19. in multiloquio peccatum non deerit qui autem moderatur labia sua prudentissimus est
19. In multiloquio non deerit peccatum; qui autem moderatur labia sua, prudentissimus est.
20. argentum electum lingua justi cor impiorum pro nihilo
20. Argentum electum lingua iusti, cor autem impiorum pro nihilo.
21. labia justi erudiunt plurimos qui autem indocti sunt in cordis egestate morientur
21. Labia iusti erudiunt plurimos; qui autem indocti sunt, in cordis egestate morientur.
22. benedictio Domini divites facit nec sociabitur ei adflictio
22. Benedictio Domini divites facit, nec addet ei labor quidquam.
23. quasi per risum stultus operatur scelus sapientia autem est viro prudentia
23. Quasi per risum stultus operatur scelus, sapientia autem est viro prudentiae.
24. quod timet impius veniet super eum desiderium suum justis dabitur
24. Quod timet impius, veniet super eum; desiderium suum iustis dabitur.
25. quasi tempestas transiens non erit impius justus autem quasi fundamentum sempiternum
25. Quasi tempestas transiens non erit impius, iustus autem quasi fundamentum sempiternum.
26. sicut acetum dentibus et fumus oculis sic piger his qui miserunt eum
26. Sicut acetum dentibus et fumus oculis, sic piger his, qui miserunt eum.
27. timor Domini adponet dies et anni impiorum breviabuntur
27. Timor Domini apponet dies, et anni impiorum breviabuntur.
28. expectatio justorum lætitia spes autem impiorum peribit
28. Exspectatio iustorum laetitia, spes autem impiorum peribit.
29. fortitudo simplicis via Domini et pavor his qui operantur malum
29. Fortitudo simplici via Domini et ruina his, qui operantur malum.
30. justus in æternum non commovebitur impii autem non habitabunt in terram
30. Iustus in aeternum non commovebitur, impii autem non habitabunt super terram.
31. os justi parturiet sapientiam lingua pravorum peribit
31. Os iusti germinabit sapientiam, lingua prava abscindetur.
32. labia justi considerant placita et os impiorum perversa
32. Labia iusti considerant placita, et os impiorum perversa.
