Liber Numeri, 30
1. narravitque Moses filiis Israël omnia quæ ei Dominus imperarat
1. Narravitque Moyses filiis Israel omnia, quae ei Dominus imperarat,
2. et locutus est ad principes tribuum filiorum Israël iste est sermo quem præcepit Dominus
2. et locutus est ad principes tribuum filiorum Israel: “Iste est sermo, quem praecepit Dominus:
3. si quis virorum votum Domino voverit aut se constrinxerit juramento non faciet irritum verbum suum sed omne quod promisit implebit
3. Si quis virorum votum Domino voverit aut se constrinxerit iuramento, non faciet irritum verbum suum, sed omne, quod promisit, implebit.
4. mulier si quippiam voverit et se constrinxerit juramento quæ est in domo patris sui et in ætate adhuc puellari si cognoverit pater votum quod pollicita est et juramentum quo obligavit animam suam et tacuerit voti rea erit
4. Mulier, si quippiam voverit Domino aut se constrinxerit iuramento, quae est in domo patris sui et in aetate adhuc puellari,
5. quicquid pollicita est et juravit opere conplebit
5. si cognoverit pater votum, quod pollicita est, aut iuramentum, quo ligavit animam suam, et tacuerit, voti rea erit; quidquid pollicita est aut iuravit, opere complebit.
6. sin autem statim ut audierit contradixerit pater et vota et juramenta ejus irrita erunt nec obnoxia tenebitur sponsioni eo quod contradixerit pater
6. Sin autem, quo die audierit contradixerit pater, et vota et iuramenta eius irrita erunt; et propitius erit ei Dominus, eo quod contradixerit pater.
7. si maritum habuerit et voverit aliquid et semel verbum de ore ejus egrediens animam illius obligaverit juramento
7. Si maritum habuerit et voverit aliquid, aut semel de ore eius verbum egrediens animam eius ligaverit iuramento,
8. quo die audierit vir et non contradixerit voti rea erit reddet quodcumque promiserat
8. quo die audierit vir eius et non contradixerit, voti rea erit reddetque, quodcumque promiserat.
9. sin autem audiens statim contradixerit et irritas fecerit pollicitationes ejus verbaque quibus obstrinxerat animam suam propitius ei erit Dominus
9. Sin autem, quo die audierit contradixerit, irritas facit pollicitationes eius verbaque, quibus obstrinxerat animam suam; et propitius erit ei Dominus.
10. vidua et repudiata quicquid voverint reddent
10. Vidua et repudiata, quidquid voverint, reddent.
11. uxor in domo viri cum se voto constrinxerit et juramento
11. Uxor in domo viri cum se voto constrinxerit aut iuramento,
12. si audierit vir et tacuerit nec contradixerit sponsioni reddet quodcumque promiserat
12. si audierit vir et tacuerit nec contradixerit sponsioni, reddet, quodcumque promiserat.
13. sin autem extemplo contradixerit non tenebitur promissionis rea quia maritus contradixit et Dominus ei propitius erit
13. Sin autem extemplo contradixerit, non tenebitur promissionis rea, quia maritus contradixit, et Dominus ei propitius erit.
14. si voverit et juramento se constrinxerit ut per jejunium vel ceterarum rerum abstinentiam adfligat animam suam in arbitrio viri erit ut faciat sive non faciat
14. Si voverit aut iuramento se constrinxerit, ut per ieiunium affligat animam suam, in arbitrio viri erit, ut faciat sive non faciat.
15. quod si audiens vir tacuerit et in alteram diem distulerit sententiam quicquid voverat atque promiserat reddet quia statim ut audivit tacuit
15. Quod si audiens vir tacuerit et de die in diem distulerit sententiam, quidquid voverat atque promiserat, reddet, quia, quo die audierat, tacuit.
16. sin autem contradixerit postquam rescivit portabit ipse iniquitatem ejus
16. Sin autem contradixerit, postquam rescivit, portabit ipse iniquitatem eius”.
17. istæ sunt leges quas constituit Dominus Mosi inter virum et uxorem inter patrem et filiam quæ in puellari adhuc ætate est vel quæ manet in parentis domo
17. Istae sunt leges, quas constituit Dominus Moysi inter virum et uxorem, inter patrem et filiam, quae in puellari adhuc aetate manet in parentis domo.
