Liber I Regum, 6

1. factum est igitur quadringentesimo et octogesimo anno egressionis filiorum Israël de terra Ægypti in anno quarto mense zio ipse est mensis secundus regis Salomonis super Israël ædificare cœpit domum Domino

1. Factum est igitur quadringente simo et octogesimo anno egres sionis filiorum Israel de terra Aegypti, in anno quarto, mense Ziv — ipse est mensis secundus — regni Salomonis super Israel, aedificare coepit domum Domino.

2. domus autem quam ædificabat rex Salomon Domino habebat sexaginta cubitos in longitudine et viginti cubitos in latitudine et triginta cubitos in altitudine

2. Domus autem, quam aedificabat rex Salomon Domino, habebat sexaginta cubitos in longitudine et viginti cubitos in latitudine et triginta cubitos in altitudine.

3. et porticus erat ante templum viginti cubitorum longitudinis juxta mensuram latitudinis templi et habebat decem cubitos latitudinis ante faciem templi

3. Et porticus erat ante templum viginti cubitorum longitudinis iuxta mensuram latitudinis templi et habebat decem cubitos latitudinis ante faciem templi.

4. fecitque in templo fenestras obliquas

4. Fecitque in templo fenestras cum marginibus et cancellis.

5. et ædificavit super parietem templi tabulata per gyrum in parietibus domus per circuitum templi et oraculi et fecit latera in circuitu

5. Et aedificavit contra parietem templi tabulata per gyrum in parietibus domus per circuitum templi et Dabir et fecit latera in circuitu.

6. tabulatum quod subter erat quinque cubitos habebat latitudinis et medium tabulatum sex cubitorum latitudinis et tertium tabulatum septem habens cubitos latitudinis trabes autem posuit in domo per circuitum forinsecus ut non hererent muris templi

6. Tabulatum, quod subter erat, quinque cubitos habebat latitudinis et medium tabulatum sex cubitorum latitudinis et tertium tabulatum septem habens cubitos latitudinis; gradus enim posuit in domo per circuitum forinsecus, ut non ingrederentur trabes in muros templi.

7. domus autem cum ædificaretur lapidibus dedolatis atque perfectis ædificata est et malleus et securis et omne ferramentum non sunt audita in domo cum ædificaretur

7. Domus autem cum aedificaretur, lapidibus dedolatis atque perfectis aedificata est; et malleus et securis et omne ferramentum non sunt audita in domo, cum aedificaretur.

8. ostium lateris medii in parte erat domus dexteræ et per cocleam ascendebant in medium cenaculum et a medio in tertium

8. Ostium lateris inferioris in parte erat domus dextrae, et per cochleam ascendebant in medium latus et a medio in tertium.

9. et ædificavit domum et consummavit eam texit quoque domum laquearibus cedrinis

9. Et aedificavit domum et consummavit eam; texit quoque domum laquearibus cedrinis.

10. et ædificavit tabulatum super omnem domum quinque cubitis altitudinis et operuit domum lignis cedrinis

10. Aedificavit ergo stratum contra omnem domum quinque cubitis altitudinis et iunxit domui lignis cedrinis.

11. et factus est sermo Domini ad Salomonem dicens

11. Et factus est sermo Domini ad Salomonem dicens:

12. domus hæc quam ædificas si ambulaveris in præceptis meis et judicia mea feceris et custodieris omnia mandata mea gradiens per ea firmabo sermonem meum tibi quem locutus sum ad David patrem tuum

12. “Domus haec, quam aedificas, si ambulaveris in praeceptis meis et iudicia mea feceris et custodieris omnia mandata mea gradiens per ea, firmabo sermonem meum tibi, quem locutus sum ad David patrem tuum;

13. et habitabo in medio filiorum Israël et non derelinquam populum meum Israël

13. et habitabo in medio filiorum Israel et non derelinquam populum meum Israel”.

14. igitur ædificavit Salomon domum et consummavit eam

14. Igitur aedificavit Salomon domum et consummavit eam.

15. et ædificavit parietes domus intrinsecus tabulatis cedrinis a pavimento domus usque ad summitatem parietum et usque ad laquearia operuit lignis intrinsecus et texit pavimentum domus tabulis abiegnis

15. Et aedificavit parietes domus intrinsecus tabulis cedrinis; a pavimento domus usque ad summitatem parietum et usque ad laquearia operuit lignis intrinsecus et texit pavimentum domus tabulis abiegnis.

16. ædificavitque viginti cubitorum ad posteriorem partem templi tabulata cedrina a pavimento usque ad superiora et fecit interiorem domum oraculi in sanctum sanctorum

16. Aedificavitque viginti cubitorum a posteriore parte templi tabulis cedrinis a pavimento usque ad superiora; et fecit ei intrinsecus Dabir, id est sancta sanctorum.

17. porro quadraginta cubitorum erat ipsum templum pro foribus oraculi

17. Porro quadraginta cubitorum erat ipsum templum ante illud.

18. et cedro omnis domus intrinsecus vestiebatur habens tornaturas suas et juncturas fabrefactas et celaturas eminentes omnia cedrinis tabulis vestiebantur nec omnino lapis apparere poterat in pariete

18. Et cedrus in domo intrinsecus sculptas habebat colocynthidas et calices apertos florum. Omnia cedrinis tabulis vestiebantur, nec omnino lapis apparere poterat in pariete.

19. oraculum autem in medio domus in interiori parte fecerat ut poneret ibi arcam fœderis Domini

19. Dabir autem in medio domus in interiori parte fecerat, ut poneret ibi arcam foederis Domini.

20. porro oraculum habebat viginti cubitos longitudinis et viginti cubitos latitudinis et viginti cubitos altitudinis et operuit illud atque vestivit auro purissimo sed et altare vestivit cedro

20. Habebat viginti cubitos longitudinis et viginti cubitos latitudinis et viginti cubitos altitudinis; et vestivit illud auro purissimo et fecit altare cedrinum ante Dabir.

21. domum quoque ante oraculum operuit auro purissimo et adfixit lamminas clavis aureis

21. Domum quoque operuit Salomon intrinsecus auro purissimo et posuit catenas aureas ante Dabir.

22. nihilque erat in templo quod non auro tegeretur sed et totum altare oraculi texit auro

22. Nihilque erat in templo, quod non auro tegeretur; sed et totum altare Dabir texit auro.

23. et fecit in oraculo duo cherubin de lignis olivarum decem cubitorum altitudinis

23. Et fecit in Dabir duos cherubim de lignis oleastri decem cubitorum altitudinis.

24. quinque cubitorum ala cherub una et quinque cubitorum ala cherub altera id est decem cubitos habentes a summitate alæ usque ad alæ alterius summitatem

24. Quinque cubitorum ala cherub una et quinque cubitorum ala cherub altera, id est decem cubitos habentes a summitate alae unius usque ad alae alterius summitatem.

25. decem quoque cubitorum erat cherub secundus mensura pari et opus unum erat in duobus cherubin

25. Decem quoque cubitorum erat cherub secundus, mensura par et effigies una erat duobus cherubim;

26. id est altitudinem habebat unus cherub decem cubitorum et similiter cherub secundus

26. altitudinem habebat unus cherub decem cubitorum et similiter cherub secundus.

27. posuitque cherubin in medio templi interioris extendebant autem alas suas cherubin et tangebat ala una parietem et ala cherub secundi tangebat parietem alterum alæ autem alteræ in media parte templi se invicem contingebant

27. Posuitque cherubim in medio templi interioris; extendebant autem alas suas cherubim, et tangebat ala una parietem et ala cherub secundi tangebat parietem alterum; alae autem alterae in media parte templi se invicem contingebant.

28. texit quoque cherubin auro

28. Texit quoque cherubim auro.

29. et omnes parietes templi per circuitum scalpsit variis celaturis et torno et fecit in eis cherubin et palmas et picturas varias quasi prominentes de pariete et egredientes

29. Et omnes parietes templi per circuitum scalpsit variis caelaturis; et fecit in eis cherubim et palmas et calices apertos florum intrinsecus et foras.

30. sed et pavimentum domus texit auro intrinsecus et extrinsecus

30. Sed et pavimentum domus texit auro intrinsecus et extrinsecus.

31. et in ingressu oraculi fecit ostiola de lignis olivarum postesque angulorum quinque

31. Et pro ingressu Dabir fecit valvas de lignis oleastri postesque cum marginibus quinque.

32. et duo ostia de lignis olivarum et scalpsit in eis picturam cherubin et palmarum species et anaglyfa valde prominentia et texit ea auro et operuit tam cherubin quam palmas et cetera auro

32. Et in duabus valvis de lignis oleastri scalpsit cherubim et palmas et calices apertos florum et vestivit ea auro operiens tam cherubim quam palmas et cetera auro.

33. fecitque in introitum templi postes de lignis olivarum quadrangulatos

33. Fecitque eodem modo pro introitu templi postes cum quattuor marginibus de lignis oleastri

34. et duo ostia de lignis abiegnis altrinsecus et utrumque ostium duplex erat et se invicem tenens aperiebatur

34. et duas valvas de lignis abiegnis; et utraque valva duplex erat et versatilis.

35. et scalpsit cherubin et palmas et celaturas valde eminentes operuitque omnia lamminis aureis opere quadro ad regulam

35. Et scalpsit cherubim et palmas et calices apertos florum operuitque omnia laminis aureis.

36. et ædificavit atrium interius tribus ordinibus lapidum politorum et uno ordine lignorum cedri

36. Et aedificavit atrium interius tribus ordinibus lapidum politorum et uno ordine lignorum cedri.

37. anno quarto fundata est domus Domini in mense zio

37. Anno quarto fundata est domus Domini in mense Ziv;

38. et in anno undecimo mense bul ipse est mensis octavus perfecta est domus in omni opere suo et in universis utensilibus ædificavitque eam annis septem

38. et in anno undecimo, mense Bul — ipse est mensis octavus — perfecta est domus in omni opere suo et in universis utensilibus; aedificavitque eam annis septem.