Liber Ecclesiasticus, 2
1. fili accedens servituti Dei sta in justitia et timore et præpara animam tuam ad temptationem
1. Fili, accedens ad servitutem Dei sta in iustitia et timore et praepara animam tuam ad tentationem.
2. deprime cor tuum et sustine declina aurem et excipe verba intellectus et ne festines in tempus obductionis
2. Dirige cor tuum et sustine, inclina aurem tuam et suscipe verba intellectus et ne sollicitus sis in tempore calamitatis.
3. sustine sustentationes Dei coniungere Deo et sustine ut crescat in novissimo vita tua
3. Sustine sustentationes Dei, coniungere Deo et ne laxes, ut sapiens fias in viis tuis.
4. omne quod tibi adplicitum fuerit accipe et in dolore sustine et in humilitate tua habe patientiam
4. Omne, quod tibi applicitum fuerit, accipe et in dolore sustine et in humilitate tua patientiam habe,
5. quoniam in igne probatur aurum et argentum homines vero receptibiles in camino humiliationis
5. quoniam in igne probatur aurum et argentum, homines vero receptibiles in camino humiliationis.
6. crede Deo et recuperabit te et dirige viam tuam et spera in illum serva timorem illius et in illo veteresce
6. Crede Deo, et recuperabit te, et spera in illum, et diriget viam tuam; serva timorem illius et in illo veterasce.
7. metuentes Deum sustinete misericordiam ejus et non deflectatis ab illo ne cadatis
7. Metuentes Dominum, sustinete misericordiam eius et non deflectatis ab illo, ne cadatis.
8. qui timetis Deum credite illi et non evacuabitur merces vestra
8. Qui timetis Dominum, credite illi, et non evacuabitur merces vestra.
9. qui timetis Deum sperate in illum et in oblectatione veniet vobis misericordia
9. Qui timetis Dominum, sperate in bona et in oblectationem aevi et in misericordiam.
10. qui timetis Deum diligite illum et inluminabuntur corda vestra
10. Qui timetis Dominum, diligite illum, et illuminabuntur corda vestra.
11. respicite filii nationes hominum et scitote quis speravit in Dominum et confusus est
11. Respicite, filii, generationes antiquas et videte: quis speravit in Domino et confusus est?
12. permansit in mandatis ejus et derelictus est et quis invocavit illum et despexit illum
12. Aut quis permansit in mandatis eius et derelictus est? Aut quis invocavit eum, et despexit illum?
13. quoniam pius et misericors Deus et remittit in tempore tribulationis peccata omnibus exquirentibus se in veritate
13. Quoniam pius et misericors est Dominus et remittet in die tribulationis peccata et protector est omnibus exquirentibus se in veritate.
14. væ duplici corde et labiis scelestis et manibus malefacientibus et peccatori terram ingredienti duabus viis
14. Vae duplici corde et labiis scelestis et manibus dissolutis et peccatori terram ingredienti duabus viis!
15. væ dissolutis corde qui non credunt Deo ideo non protegentur ab eo
15. Vae dissolutis corde, qui non credunt, et ideo non protegentur!
16. væ his qui perdiderunt sustinentiam qui dereliquerunt vias rectas et deverterunt in vias pravas
16. Vae vobis, qui perdidistis sustinentiam et qui dereliquistis vias rectas et divertistis in vias pravas!
17. et quid facietis cum inspicere cœperit Deus
17. Et quid facietis, cum inspicere coeperit Dominus?
18. qui timent Dominum non erunt incredibiles verbo illius et qui diligunt illum conservabunt viam illius
18. Qui timent Dominum, non erunt incredibiles verbo illius; et, qui diligunt illum, conservabunt viam illius.
19. qui timent Dominum inquirent quæ beneplacita sunt illi et qui diligunt eum replebuntur lege ipsius
19. Qui timent Dominum, inquirent quae beneplacita sunt ei; et, qui diligunt eum, replebuntur lege ipsius.
20. qui timent Dominum parabunt corda sua et in conspectu illius sanctificabunt animas suas
20. Qui timent Dominum, praeparabunt corda sua et in conspectu illius sanctificabunt animas suas.
21. qui timent Dominum custodiunt mandata illius et patientiam habebunt usque ad inspectionem illius
21. Qui timent Dominum, custodiunt mandata illius et patientiam habebunt usque ad inspectionem illius
22. dicentes si pænitentiam non egerimus incidemus in Dei manus et non in manus hominum
22. dicentes: “Si paenitentiam non egerimus, incidemus in manus Domini et non in manus hominum;
23. secundum enim magnitudinem illius sic et misericordia ipsius cum ipso
23. secundum enim magnitudinem ipsius, sic et misericordia illius”.
