Liber Proverbiorum, 8
1. numquid non sapientia clamitat et prudentia dat vocem suam
1. Numquid non sapientia clamitat, et prudentia dat vocem suam?
2. in summis excelsisque verticibus super viam in mediis semitis stans
2. In summis verticibus supra viam in mediis semitis stans,
3. juxta portas civitatis in ipsis foribus loquitur dicens
3. iuxta portas ad introitum civitatis, in ipsis foribus conclamat:
4. o viri ad vos clamito et vox mea ad filios hominum
4. “O viri, ad vos clamito, et vox mea ad filios hominum.
5. intellegite parvuli astutiam et insipientes animadvertite
5. Intellegite, parvuli, astutiam; et insipientes, animadvertite.
6. audite quoniam de rebus magnis locutura sum et aperientur labia mea ut recta prædicent
6. Audite, quoniam de rebus magnis locutura sum, et aperientur labia mea, ut recta praedicent.
7. veritatem meditabitur guttur meum et labia mea detestabuntur impium
7. Veritatem meditabitur guttur meum, et labia mea detestabuntur impium.
8. justi sunt omnes sermones mei non est in eis pravum quid neque perversum
8. Iusti sunt omnes sermones oris mei, non est in eis pravum quid neque perversum;
9. recti sunt intellegentibus et æqui invenientibus scientiam
9. omnes recti sunt intellegentibus et aequi invenientibus scientiam.
10. accipite disciplinam meam et non pecuniam doctrinam magis quam aurum eligite
10. Accipitc disciplinam meam et non pecuniam, doctrinam magis quam aurum electum.
11. melior est enim sapientia cunctis pretiosissimis et omne desiderabile ei non potest conparari
11. Melior est enim sapientia gemmis, et omne desiderabile ei non potest comparari”.
12. ego sapientia habito in consilio et eruditis intersum cogitationibus
12. Ego sapientia habito cum prudentia et artem excogitandi invenio.
13. timor Domini odit malum arrogantiam et superbiam et viam pravam et os bilingue detestor
13. Timor Domini odisse malum; arrogantiam et superbiam et viam pravam et os bilingue detestor.
14. meum est consilium et æquitas mea prudentia mea est fortitudo
14. Meum est consilium et prudentia, mea est intellegentia, mea est fortitudo.
15. per me reges regnant et legum conditores justa decernunt
15. Per me reges regnant, et principes iusta decernunt;
16. per me principes imperant et potentes decernunt justitiam
16. per me duces imperant, et potentes decernunt iustitiam.
17. ego diligentes me diligo et qui mane vigilant ad me invenient me
17. Ego diligentes me diligo; et, qui mane vigilant ad me, invenient me.
18. mecum sunt divitiæ et gloria opes superbæ et justitia
18. Mecum sunt divitiae et gloria, opes superbae et iustitia.
19. melior est fructus meus auro et pretioso lapide et genimina mea argento electo
19. Melior est enim fructus meus auro et obryzo, et genimina mea argento electo.
20. in viis justitiæ ambulo in medio semitarum judicii
20. In viis iustitiae ambulo, in medio semitarum iudicii,
21. ut ditem diligentes me et thesauros eorum repleam
21. ut ditem diligentes me et thesauros eorum repleam.
22. Dominus possedit me initium viarum suarum antequam quicquam faceret a principio
22. Dominus possedit me in initio viarum suarum, antequam quidquam faceret a principio;
23. ab æterno ordita sum et ex antiquis antequam terra fieret
23. ab aeterno ordinata sum et ex antiquis, antequam terra fieret.
24. necdum erant abyssi et ego jam concepta eram necdum fontes aquarum eruperant
24. Nondum erant abyssi, et ego iam concepta eram, necdum fontes graves aquis,
25. necdum montes gravi mole constiterant ante colles ego parturiebar
25. priusquam montes demergerentur, ante colles ego parturiebar.
26. adhuc terram non fecerat et flumina et cardines orbis terræ
26. Adhuc terram non fecerat et campos et initium glebae orbis terrae.
27. quando præparabat cælos aderam quando certa lege et gyro vallabat abyssos
27. Quando praeparabat caelos, aderam, quando certa lege et gyro vallabat abyssos,
28. quando æthera firmabat sursum et librabat fontes aquarum
28. quando nubes firmabat sursum, et praevaluerunt fontes abyssi,
29. quando circumdabat mari terminum suum et legem ponebat aquis ne transirent fines suos quando adpendebat fundamenta terræ
29. quando circumdabat mari terminum suum et aquis, ne transirent fines suos, quando iecit fundamenta terrae,
30. cum eo eram cuncta conponens et delectabar per singulos dies ludens coram eo omni tempore
30. cum eo eram ut artifex: delectatio eius per singulos dies, ludens coram eo omni tempore,
31. ludens in orbe terrarum et deliciæ meæ esse cum filiis hominum
31. ludens in orbe terrarum, et deliciae meae esse cum filiis hominum.
32. nunc ergo filii audite me beati qui custodiunt vias meas
32. Nunc ergo, filii, audite me: beati, qui custodiunt vias meas;
33. audite disciplinam et estote sapientes et nolite abicere eam
33. audite disciplinam et estote sapientes et nolite abicere eam.
34. beatus homo qui audit me qui vigilat ad fores meas cotidie et observat ad postes ostii mei
34. Beatus homo, qui audit me et qui vigilat ad fores meas cotidie et observat ad postes ostii mei.
35. qui me invenerit inveniet vitam et hauriet salutem a Domino
35. Qui me invenerit, inveniet vitam et hauriet delicias a Domino.
36. qui autem in me peccaverit lædet animam suam omnes qui me oderunt diligunt mortem
36. Qui autem in me peccaverit, laedet animam suam: omnes, qui me oderunt, diligunt mortem.
