Liber Proverbiorum, 2
1. fili mi si susceperis sermones meos et mandata mea absconderis penes te
1. Fili mi, si susceperis sermones meos et mandata mea absconderis penes te,
2. ut audiat sapientiam auris tua inclina cor tuum ad noscendam prudentiam
2. intendens ad sapientiam aurem tuam, inclinans cor tuum ad cognoscendam prudentiam;
3. si enim sapientiam invocaveris et inclinaveris cor tuum prudentiæ
3. si enim sapientiam invocaveris et dederis vocem tuam prudentiae,
4. si quæsieris eam quasi pecuniam et sicut thesauros effoderis illam
4. si quaesieris eam quasi pecuniam et sicut thesauros conquisieris illam,
5. tunc intelleges timorem Domini et scientiam Dei invenies
5. tunc intelleges timorem Domini et scientiam Dei invenies.
6. quia Dominus dat sapientiam et ex ore ejus scientia et prudentia
6. Quia Dominus dat sapientiam, et ex ore eius scientia et prudentia.
7. custodiet rectorum salutem et proteget gradientes simpliciter
7. Thesaurizabit rectis sollertiam et clipeus erit gradientibus simpliciter
8. servans semitas justitiæ et vias sanctorum custodiens
8. servans semitas iustitiae et vias sanctorum custodiens.
9. tunc intelleges justitiam et judicium et æquitatem et omnem semitam bonam
9. Tunc intelleges iustitiam et iudicium et aequitatem et omnem semitam bonam,
10. si intraverit sapientia cor tuum et scientia animæ tuæ placuerit
10. quia intrabit sapientia cor tuum, et scientia animae tuae placebit.
11. consilium custodiet te prudentia servabit te
11. Consilium custodiet te, et prudentia servabit te,
12. ut eruaris de via mala ab homine qui perversa loquitur
12. ut eruaris a via mala et ab homine, qui perversa loquitur;
13. qui relinquunt iter rectum et ambulant per vias tenebrosas
13. qui relinquunt iter rectum, ut ambulent per vias tenebrosas;
14. qui lætantur cum malefecerint et exultant in rebus pessimis
14. qui laetantur, cum malefecerint, et exsultant in rebus pessimis:
15. quorum viæ perversæ et infames gressus eorum
15. quorum viae perversae sunt, et pravi gressus eorum.
16. ut eruaris a muliere aliena et ab extranea quæ mollit sermones suos
16. Ut eruaris a muliere aliena et ab extranea, quae mollit sermones suos
17. et relinquit ducem pubertatis suæ
17. et relinquit ducem pubertatis suae et pacti Dei sui oblita est.
18. et pacti Dei sui oblita est inclinata est enim ad mortem domus ejus et ad impios semitæ ipsius
18. Inclinata est enim ad mortem domus eius, et ad inferos semitae ipsius;
19. omnes qui ingrediuntur ad eam non revertentur nec adprehendent semitas vitæ
19. omnes, qui ingrediuntur ad eam, non revertentur nec apprehendent semitas vitae.
20. ut ambules in via bona et calles justorum custodias
20. Ut ambules in via bonorum et calles iustorum custodias:
21. qui enim recti sunt habitabunt in terra et simplices permanebunt in ea
21. qui enim recti sunt, habitabunt in terra, et simplices permanebunt in ea;
22. impii vero de terra perdentur et qui inique agunt auferentur ex ea
22. impii vero de terra perdentur, et, qui inique agunt, auferentur ex ea.
