Liber Proverbiorum, 17
1. melior est buccella sicca cum gaudio quam domus plena victimis cum jurgio
1. Melior est buccella sicca cum pace quam domus plena victimis cum iurgio.
2. servus sapiens dominabitur filiis stultis et inter fratres hereditatem dividet
2. Servus sapiens dominabitur filiis inhonestis et inter fratres hereditatem dividet.
3. sicut igne probatur argentum et aurum camino ita corda probat Dominus
3. Sicut igne probatur argentum et aurum camino, ita corda probat Dominus.
4. malus obœdit linguæ iniquæ et fallax obtemperat labiis mendacibus
4. Malus oboedit labio iniquo, et fallax obtemperat linguae mendaci.
5. qui despicit pauperem exprobrat factori ejus et qui in ruina lætatur alterius non erit inpunitus
5. Qui despicit pauperem, exprobrat Factori eius; et, qui in ruina laetatur alterius, non erit impunitus.
6. corona senum filii filiorum et gloria filiorum patres sui
6. Corona senum filii filiorum, et gloria filiorum patres eorum.
7. non decent stultum verba conposita nec principem labium mentiens
7. Non decent stultum verba composita, nec principem labium mentiens.
8. gemma gratissima expectatio præstolantis quocumque se verterit prudenter intellegit
8. Gemma gratissima munus in oculis domini eius; quocumque se verterit, prospere aget.
9. qui celat delictum quærit amicitias qui altero sermone repetit separat fœderatos
9. Qui celat delictum, quaerit amicitias; qui sermone repetit, separat foederatos.
10. plus proficit correptio apud prudentem quam centum plagæ apud stultum
10. Plus proficit correptio apud prudentem quam centum plagae apud stultum.
11. semper jurgia quærit malus angelus autem crudelis mittetur contra eum
11. Semper iurgia quaerit malus; angelus autem crudelis mittetur contra eum.
12. expedit magis ursæ occurrere raptis fetibus quam fatuo confidenti sibi in stultitia sua
12. Expedit magis ursae occurrere, raptis fetibus, quam fatuo confidenti in stultitia sua.
13. qui reddit mala pro bonis non recedet malum de domo ejus
13. Qui reddit mala pro bonis, non recedet malum de domo eius.
14. qui dimittit aquam caput est jurgiorum et antequam patiatur contumeliam judicium deserit
14. Aquarum proruptio initium est iurgiorum; et, antequam exacerbetur contentio, desere.
15. et qui justificat impium et qui condemnat justum abominabilis est uterque apud Dominum
15. Qui iustificat impium et qui condemnat iustum, abominabilis est uterque apud Dominum.
16. quid prodest habere divitias stultum cum sapientiam emere non possit
16. Ad quid pretium in manu stulti? Ad emendam sapientiam, cum careat corde?
17. omni tempore diligit qui amicus est et frater in angustiis conprobatur
17. Omni tempore diligit, qui amicus est, et frater ad angustiam natus est.
18. homo stultus plaudet manibus cum spoponderit pro amico suo
18. Stultus homo iungit manus, cum spoponderit pro amico suo.
19. qui meditatur discordiam diligit rixas et qui exaltat ostium quærit ruinam
19. Qui diligit delictum, diligit rixas; et, qui exaltat ostium, quaerit effracturam.
20. qui perversi cordis est non inveniet bonum et qui vertit linguam incidet in malum
20. Qui perversi cordis est, non inveniet bonum; et, qui vertit linguam, incidet in malum.
21. natus est stultus in ignominiam suam sed nec pater in fatuo lætabitur
21. Qui generat stultum, maerorem generat sibi, sed nec pater in fatuo laetabitur.
22. animus gaudens ætatem floridam facit spiritus tristis exsiccat ossa
22. Animus gaudens aetatem floridam facit, spiritus tristis exsiccat ossa.
23. munera de sinu impius accipit ut pervertat semitas judicii
23. Munera de sinu impius accipit, ut pervertat semitas iudicii.
24. in facie prudentis lucet sapientia oculi stultorum in finibus terræ
24. In facie prudentis lucet sapientia, oculi stultorum in finibus terrae.
25. ira patris filius stultus et dolor matris quæ genuit eum
25. Ira patris filius stultus et dolor matris, quae genuit eum.
26. non est bonum damnum inferre justo nec percutere principem qui recta judicat
26. Non est bonum multam inferre iusto nec percutere principem contra rectitudinem.
27. qui moderatur sermones suos doctus et prudens est et pretiosi spiritus vir eruditus
27. Qui moderatur sermones suos, novit scientiam, et lenis spiritu est vir prudens.
28. stultus quoque si tacuerit sapiens putabitur et si conpresserit labia sua intellegens
28. Stultus quoque, si tacuerit, sapiens reputabitur et, si compresserit labia sua, intellegens.
