Liber Genesis, 30
1. cernens autem Raël quod infecunda esset invidit sorori et ait marito suo da mihi liberos alioquin moriar
2. cui iratus respondit Jacob num pro Deo ego sum qui privavit te fructu ventris tui
3. at illa habeo inquit famulam Balam ingredere ad eam ut pariat super genua mea et habeam ex ea filios
4. deditque illi Balam in coniugium quæ
5. ingresso ad se viro concepit et peperit filium
6. dixitque Raël judicavit mihi Dominus et exaudivit vocem meam dans mihi filium et idcirco appellavit nomen illius Dan
7. rursumque Bala concipiens peperit alterum
8. pro quo ait Raël conparavit me Deus cum sorore mea et invalui vocavitque eum Nepthalim
9. sentiens Lia quod parere desisset Zelpham ancillam suam marito tradidit
10. qua post conceptum edente filium
11. dixit feliciter et idcirco vocavit nomen ejus Gad
12. peperit quoque Zelpha alterum
13. dixitque Lia hoc pro beatitudine mea beatam quippe me dicent mulieres propterea appellavit eum Aser
14. egressus autem Ruben tempore messis triticeæ in agro repperit mandragoras quos matri Liæ detulit dixitque Raël da mihi partem de mandragoris filii tui
15. illa respondit parumne tibi videtur quod præripueris maritum mihi nisi etiam mandragoras filii mei tuleris ait Raël dormiat tecum hac nocte pro mandragoris filii tui
16. redeuntique ad vesperam de agro Jacob egressa est in occursum Lia et ad me inquit intrabis quia mercede conduxi te pro mandragoris filii mei dormivit cum ea nocte illa
17. et exaudivit Deus preces ejus concepitque et peperit filium quintum
18. et ait dedit Deus mercedem mihi quia dedi ancillam meam viro meo appellavitque nomen illius Isachar
19. rursum Lia concipiens peperit sextum filium
20. et ait ditavit me Deus dote bona etiam hac vice mecum erit maritus meus eo quod genuerim ei sex filios et idcirco appellavit nomen ejus Zabulon
21. post quem peperit filiam nomine Dinam
22. recordatus quoque Dominus Rahelis exaudivit eam et aperuit vulvam illius
23. quæ concepit et peperit filium dicens abstulit Deus obprobrium meum
24. et vocavit nomen illius Joseph dicens addat mihi Dominus filium alterum
25. nato autem Joseph dixit Jacob socero suo dimitte me ut revertar in patriam et ad terram meam
26. da mihi uxores et liberos meos pro quibus servivi tibi ut abeam tu nosti servitutem qua servivi tibi
27. ait ei Laban inveniam gratiam in conspectu tuo experimento didici quod benedixerit mihi Deus propter te
28. constitue mercedem tuam quam dem tibi
29. at ille respondit tu nosti quomodo servierim tibi et quanta in manibus meis fuerit possessio tua
30. modicum habuisti antequam venirem et nunc dives effectus es benedixitque tibi Dominus ad introitum meum justum est igitur ut aliquando provideam etiam domui meæ
31. dixitque Laban quid dabo tibi at ille ait nihil volo sed si feceris quod postulo iterum pascam et custodiam pecora tua
32. gyra omnes greges tuos et separa cunctas oves varias et sparso vellere et quodcumque furvum et maculosum variumque fuerit tam in ovibus quam in capris erit merces mea
33. respondebitque mihi cras justitia mea quando placiti tempus advenerit coram te et omnia quæ non fuerint varia et maculosa et furva tam in ovibus quam in capris furti me arguent
34. dixit Laban gratum habeo quod petis
35. et separavit in die illo capras et oves hircos et arietes varios atque maculosos cunctum autem gregem unicolorem id est albi et nigri velleris tradidit in manu filiorum suorum
36. et posuit spatium itineris inter se et generum dierum trium qui pascebat reliquos greges ejus
37. tollens ergo Jacob virgas populeas virides et amigdalinas et ex platanis ex parte decorticavit eas detractisque corticibus in his quæ spoliata fuerant candor apparuit illa vero quæ integra erant viridia permanserunt atque in hunc modum color effectus est varius
38. posuitque eas in canalibus ubi effundebatur aqua ut cum venissent greges ad bibendum ante oculos haberent virgas et in aspectu earum conciperent
39. factumque est ut in ipso calore coitus oves intuerentur virgas et parerent maculosa et varia et diverso colore respersa
40. divisitque gregem Jacob et posuit virgas ante oculos arietum erant autem alba quæque et nigra Laban cetera vero Jacob separatis inter se gregibus
41. igitur quando primo tempore ascendebantur oves ponebat Jacob virgas in canalibus aquarum ante oculos arietum et ovium ut in earum contemplatione conciperent
42. quando vero serotina admissura erat et conceptus extremus non ponebat eas factaque sunt ea quæ erant serotina Laban et quæ primi temporis Jacob
43. ditatusque est homo ultra modum et habuit greges multos ancillas et servos camelos et asinos