Liber Psalmorum, 7
1. psalmus David quem cantavit Domino pro verbis Chusi filii Jemini
1. Lamentatio David, quam cantavit Domino propter Chus Beniaminitam.
2. Domine Deus meus in te speravi salvum me fac ex omnibus persequentibus me et libera me
2. Domine Deus meus, in te speravi; salvum me fac ex omnibus persequentibus me et libera me,
3. nequando rapiat ut leo animam meam dum non est qui redimat neque qui salvum faciat
3. ne quando rapiat ut leo animam meam discerpens, dum non est qui salvum faciat.
4. Domine Deus meus si feci istud si est iniquitas in manibus meis
4. Domine Deus meus, si feci istud, si est iniquitas in manibus meis,
5. si reddidi retribuentibus mihi mala decidam merito ab inimicis meis inanis
5. si reddidi retribuenti mihi mala et exspoliavi inimicum meum dimittens inanem,
6. persequatur inimicus animam meam et conprehendat et conculcet in terra vitam meam et gloriam meam in pulverem deducat diapsalma
6. persequatur inimicus animam meam et comprehendat et conculcet in terra vitam meam et gloriam meam in pulverem deducat.
7. exsurge Domine in ira tua exaltare in finibus inimicorum meorum et exsurge Domine Deus meus in præcepto quod mandasti
7. Exsurge, Domine, in ira tua et exaltare contra indignationem inimicorum meorum et exsurge, Deus meus, in iudicio, quod mandasti.
8. et synagoga populorum circumdabit te et propter hanc in altum regredere
8. Et synagoga populorum circumdabit te, et super hanc in altum regredere:
9. Dominus judicat populos judica me Domine secundum justitiam meam et secundum innocentiam meam super me
9. Dominus iudicat populos. Iudica me, Domine, secundum iustitiam meam et secundum innocentiam meam, quae est in me.
10. consummetur nequitia peccatorum et diriges justum et scrutans corda et renes Deus
10. Consumatur nequitia peccatorum; et iustum confirma: scrutans corda et renes Deus iustus.
11. justum adiutorium meum a Deo qui salvos facit rectos corde
11. Adiutorium meum apud Deum, qui salvos facit rectos corde.
12. Deus judex justus et fortis et patiens numquid irascitur per singulos dies
12. Deus iudex iustus, fortis, irascens per singulos dies.
13. nisi conversi fueritis gladium suum vibrabit arcum suum tetendit et paravit illum
13. Nonne iterum gladium suum exacuit, arcum suum tetendit et paravit illum?
14. et in eo paravit vasa mortis sagittas suas ardentibus effecit
14. Et paravit sibi vasa mortis, sagittas suas ardentes effecit.
15. ecce parturiit iniustitiam et concepit dolorem et peperit iniquitatem
15. Ecce parturiit iniustitiam, concepit dolorem et peperit iniquitatem;
16. lacum aperuit et effodit eum et incidet in foveam quam fecit
16. lacum aperuit et effodit eum et incidit in foveam, quam fecit.
17. convertetur dolor ejus in caput ejus et in verticem ipsius iniquitas ejus descendet
17. Convertetur dolor eius in caput eius, et in verticem ipsius iniquitas eius descendet.
18. confitebor Domino secundum justitiam ejus et psallam nomini Domini altissimi
18. Confitebor Domino secundum iustitiam eius et psallam nomini Domini Altissimi.
