Liber Ecclesiastes, 4
1. verti me ad alia et vidi calumnias quæ sub sole geruntur et lacrimas innocentum et consolatorem neminem nec posse resistere eorum violentiæ cunctorum auxilio destitutos
1. Verti me ad alia et vidi calumnias, quae sub sole geruntur, et ecce lacrimae oppressorum, et nemo consolator; et ex parte opprimentium violentia, et nemo consolator.
2. et laudavi magis mortuos quam viventes
2. Et laudavi magis mortuos, qui iam defuncti sunt, quam viventes, qui adhuc vitam agunt,
3. et feliciorem utroque judicavi qui necdum natus est nec vidit mala quæ sub sole fiunt
3. et feliciorem utroque iudicavi, qui necdum natus est nec vidit opera mala, quae sub sole fiunt.
4. rursum contemplatus omnes labores hominum et industrias animadverti patere invidiæ proximi et in hoc ergo vanitas et cura superflua est
4. Rursum contemplatus sum omnes labores et omnem successum operis, et hoc esse zelum in proximum suum. Et in hoc ergo vanitas et afflictio spiritus.
5. stultus conplicat manus suas et comedit carnes suas dicens
5. Stultus complicat manus suas et comedit carnes suas.
6. melior est pugillus cum requie quam plena utraque manus cum labore et adflictione animi
6. Melior est pugillus cum requie quam plena utraque manus cum labore et afflictione spiritus.
7. considerans repperi et aliam vanitatem sub sole
7. Iterum repperi et aliam vanitatem sub sole:
8. unus est et secundum non habet non filium non fratrem et tamen laborare non cessat nec satiantur oculi ejus divitiis nec recogitat dicens cui laboro et fraudo animam meam bonis in hoc quoque vanitas est et adflictio pessima
8. unus est et secundum non habet, non filium, non fratrem, et tamen laborare non cessat, nec satiantur oculi eius divitiis, nec recogitat dicens: “Cui laboro et fraudo animam meam bonis?”. In hoc quoque vanitas est et occupatio pessima.
9. melius ergo est duos simul esse quam unum habent enim emolumentum societatis suæ
9. Melius est duos esse simul quam unum: habent enim emolumentum in labore suo,
10. si unus ceciderit ab altero fulcietur væ soli quia cum ruerit non habet sublevantem
10. quia si unus ceciderit, ab altero fulcietur. Vae soli! Cum ceciderit, non habet sublevantem se.
11. et si dormierint duo fovebuntur mutuo unus quomodo calefiet
11. Insuper, si dormierint duo, fovebuntur mutuo; unus quomodo calefiet?
12. et si quispiam prævaluerit contra unum duo resistent ei funiculus triplex difficile rumpitur
12. Et, si quispiam praevaluerit contra unum, duo resistent ei. Et fu niculus triplex non cito rumpitur.
13. melior est puer pauper et sapiens rege sene et stulto qui nescit providere in posterum
13. Melior est puer pauper et sapiens rege sene et stulto, qui iam nescit erudiri.
14. quod et de carcere catenisque interdum quis egrediatur ad regnum et alius natus in regno inopia consumatur
14. Ille enim de domo carceris exivit, ut regnaret, etiamsi in regno istius natus sit pauper.
15. vidi cunctos viventes qui ambulant sub sole cum adulescente secundo qui consurgit pro eo
15. Vidi cunctos viventes, qui ambulant sub sole, cum adulescente illo secundo, qui consurgebat pro eo. 16 Infinitus numerus erat populi, omnium, quos ipse praecedebat; sed qui postea futuri sunt, non laetabuntur in eo. Et hoc vanitas et afflictio spiritus.
17. infinitus numerus est populi omnium qui fuerunt ante eum et qui postea futuri sunt non lætabuntur in eo sed et hoc vanitas et adflictio spiritus
17. Custodi pedem tuum ingrediens domum Dei, nam accedere, ut audias, melius est quam cum stulti offerunt victimas: multo enim melior est oboedientia quam stultorum victimae, qui nesciunt se malum facere.
