Liber Proverbiorum, 1
1. parabolæ Salomonis filii David regis Israël
1. Parabolae Salomonis filii David regis Israel
2. ad sciendam sapientiam et disciplinam
2. ad sciendam sapientiam et disciplinam, ad intellegenda verba prudentiae;
3. ad intellegenda verba prudentiæ et suscipiendam eruditionem doctrinæ justitiam et judicium et æquitatem
3. ad suscipiendam eruditionem doctrinae, iustitiam et iudicium et aequitatem,
4. ut detur parvulis astutia adulescenti scientia et intellectus
4. ut detur parvulis astutia, adulescenti scientia et recogitatio.
5. audiens sapiens sapientior erit et intellegens gubernacula possidebit
5. Audiat sapiens et addet doctrinam, et intellegens dispositiones possidebit:
6. animadvertet parabolam et interpretationem verba sapientium et enigmata eorum
6. animadvertet parabolam et allegoriam, verba sapientium et aenigmata eorum.
7. timor Domini principium scientiæ sapientiam atque doctrinam stulti despiciunt
7. Timor Domini principium scientiae. Sapientiam atque doctrinam stulti despiciunt.
8. audi fili mi disciplinam patris tui et ne dimittas legem matris tuæ
8. Audi, fili mi, disciplinam patris tui et ne reicias legem matris tuae,
9. ut addatur gratia capiti tuo et torques collo tuo
9. quia diadema gratiae sunt capiti tuo, et torques collo tuo.
10. fili mi si te lactaverint peccatores ne adquiescas
10. Fili mi, si te lactaverint peccatores, ne acquiescas eis.
11. si dixerint veni nobiscum insidiemur sanguini abscondamus tendiculas contra insontem frustra
11. Si dixerint: “Veni nobiscum, insidiemur sanguini, abscondamus tendiculas contra insontem frustra;
12. degluttiamus eum sicut infernus viventem et integrum quasi descendentem in lacum
12. deglutiamus eos sicut infernus viventes et integros quasi descendentes in lacum:
13. omnem pretiosam substantiam repperiemus implebimus domos nostras spoliis
13. omnem pretiosam substantiam reperiemus, implebimus domos nostras spoliis;
14. sortem mitte nobiscum marsuppium unum sit omnium nostrum
14. sortem mitte nobiscum, marsupium unum sit omnium nostrum”;
15. fili mi ne ambules cum eis prohibe pedem tuum a semitis eorum
15. fili mi, ne ambules cum eis, prohibe pedem tuum a semitis eorum.
16. pedes enim illorum ad malum currunt et festinant ut effundant sanguinem
16. Pedes enim illorum ad malum currunt et festinant, ut effundant sanguinem.
17. frustra autem jacitur rete ante oculos pinnatorum
17. Frustra autem iacitur rete ante oculos pinnatorum.
18. ipsique contra sanguinem suum insidiantur et moliuntur fraudes contra animas suas
18. Ipsique contra sanguinem suum insidiantur et moliuntur fraudes contra animas suas.
19. sic semitæ omnis avari animas possidentium rapiunt
19. Sic semitae omnis ad rapinam intenti: animam ipsius possidentis rapiunt.
20. sapientia foris prædicat in plateis dat vocem suam
20. Sapientia foris praedicat, in plateis dat vocem suam,
21. in capite turbarum clamitat in foribus portarum urbis profert verba sua dicens
21. in capite viarum frequentium clamitat, in foribus portarum urbis profert verba sua:
22. usquequo parvuli diligitis infantiam et stulti ea quæ sibi sunt noxia cupiunt et inprudentes odibunt scientiam
22. “Usquequo, parvuli, diligitis infantiam, et derisores sibi derisionem cupient, et imprudentes odibunt scientiam?
23. convertimini ad correptionem meam en proferam vobis spiritum meum et ostendam verba mea
23. Convertimini ad correptionem meam; en proferam vobis spiritum meum et ostendam vobis verba mea.
24. quia vocavi et rennuistis extendi manum meam et non fuit qui aspiceret
24. Quia vocavi, et renuistis, extendi manum meam, et non fuit qui aspiceret;
25. despexistis omne consilium meum et increpationes meas neglexistis
25. despexistis omne consilium meum et increpationes meas neglexistis.
26. ego quoque in interitu vestro ridebo et subsannabo cum vobis quod timebatis advenerit
26. Ego quoque in interitu vestro ridebo et subsannabo, cum terror vobis advenerit,
27. cum inruerit repentina calamitas et interitus quasi tempestas ingruerit quando venerit super vos tribulatio et angustia
27. cum irruerit ut procella terror, et interitus quasi tempestas ingruerit, quando venerit super vos tribulatio et angustia”.
28. tunc invocabunt me et non exaudiam mane consurgent et non invenient me
28. Tunc invocabunt me, et non exaudiam, instanter quaerent me et non invenient me,
29. eo quod exosam habuerint disciplinam et timorem Domini non susceperint
29. eo quod exosam habuerint disciplinam et timorem Domini non elegerint
30. nec adquieverint consilio meo et detraxerint universæ correptioni meæ
30. nec acquieverint consilio meo et despexerint universam correptionem meam.
31. comedent igitur fructus viæ suæ suisque consiliis saturabuntur
31. Comedent igitur fructus viae suae suisque consiliis saturabuntur.
32. aversio parvulorum interficiet eos et prosperitas stultorum perdet illos
32. Aversio parvulorum interficiet eos, et securitas stultorum perdet illos.
33. qui autem me audierit absque terrore requiescet et abundantia perfruetur malorum timore sublato
33. Qui autem me audierit, absque terrore requiescet et tranquillus erit timore malorum sublato.