Prophetia Ezechielis, 10

1. et vidi et ecce in firmamento quod erat super caput cherubin quasi lapis sapphyrus quasi species similitudinis solii apparuit super ea

1. Et vidi: et ecce super fir mamentum, quod erat super caput cherubim, quasi lapis sapphirus, quasi species similitudinis solii apparuit super ea.

2. et dixit ad virum qui indutus erat lineis et ait ingredere in medio rotarum quæ sunt subtus cherub et imple manum tuam prunis ignis quæ sunt inter cherubin et effunde super civitatem ingressusque est in conspectu meo

2. Et dixit ad virum, qui indutus erat lineis, et ait: “Ingredere in medio rotarum, quae sunt subtus cherub, et imple manus tuas prunis ignis, quae sunt inter cherubim, et effunde super civitatem”. Ingressusque est in conspectu meo.

3. cherubin autem stabant a dextris domus cum ingrederetur vir et nubes implevit atrium interius

3. Cherubim autem stabant a dextris domus, cum ingrederetur vir, et nubes implevit atrium interius.

4. et elevata est gloria Domini desuper cherub ad limen domus et repleta est domus nube et atrium repletum est splendore gloriæ Domini

4. Et elevata est gloria Domini desuper cherub ad limen domus, et repleta est domus nube, et atrium repletum est splendore gloriae Domini.

5. et sonitus alarum cherubin audiebatur usque ad atrium exterius quasi vox Dei omnipotentis loquentis

5. Et sonitus alarum cherubim audiebatur usque ad atrium exterius, quasi vox Dei omnipotentis loquentis.

6. cumque præcepisset viro qui indutus erat lineis dicens sume ignem de medio rotarum quæ sunt inter cherubin ingressus ille stetit juxta rotam

6. Cumque praecepisset viro, qui indutus erat lineis, dicens: “Sume ignem de medio rotarum, de medio cherubim”, ingressus ille stetit iuxta rotam;

7. et extendit cherub manum de medio cherubin ad ignem qui erat inter cherubin et sumpsit et dedit in manus ejus qui indutus erat lineis qui accipiens egressus est

7. et extendit cherub manum de medio cherubim ad ignem, qui erat inter cherubim, et sumpsit et dedit in manus eius, qui indutus erat lineis; qui accipiens egressus est.

8. et apparuit in cherubin similitudo manus hominis subtus pinnas eorum

8. Et apparuit in cherubim similitudo manus hominis subtus pennas eorum,

9. et vidi et ecce quattuor rotæ juxta cherubin rota una juxta cherub unum et rota alia juxta cherub unum species autem erat rotarum quasi visio lapidis chrysoliti

9. et vidi: et ecce quattuor rotae iuxta cherubim; rota una iuxta cherub unum, et rota alia iuxta cherub unum, species autem rotarum erat quasi species lapidis chrysolithi,

10. et aspectus earum similitudo una quattuor quasi sit rota in medio rotæ

10. et aspectus earum similitudo una illis quattuor, quasi sit rota in medio rotae.

11. cumque ambularent in quattuor partes gradiebantur non revertebantur ambulantes sed ad locum ad quem ire declinabat quæ prima erat sequebantur et ceteræ nec convertebantur

11. Cumque ambularent in quattuor partes, gradiebantur et non convertebantur ambulantes, sed ad locum, ad quem ire declinabat quae prima erat, sequebantur et ceterae nec convertebantur, cum ambularent.

12. et omne corpus earum et colla et manus et pinnæ et circuli plena erant oculis in circuitu quattuor rotarum

12. Et omne corpus eorum et terga et manus et pennae et rotae plena erant oculis in circuitu illis quattuor;

13. et rotas istas vocavit volubiles audiente me

13. et rotae istae vocatae sunt Volubiles, audiente me.

14. quattuor autem facies habebat unum facies una facies cherub et facies secunda facies hominis et in tertio facies leonis et in quarto facies aquilæ

14. Quattuor autem facies habebat unumquodque: facies prima facies cherub, et facies secunda facies hominis, et tertia facies leonis, et quarta facies aquilae.

15. et elevata sunt cherubin ipsum est animal quod videram juxta flumen Chobar

15. Et elevati sunt cherubim: ipsum est animal, quod videram iuxta fluvium Chobar.

16. cumque ambularent cherubin ibant pariter et rotæ juxta ea et cum levarent cherubin alas suas ut exaltarentur de terra non residebant rotæ sed et ipsæ juxta erant

16. Cumque ambularent, cherubim ibant pariter, et rotae iuxta ea; et cum elevarent cherubim alas suas, ut exaltarentur de terra, non convertebantur rotae, sed et ipsae iuxta erant.

17. stantibus illis stabant et cum elevatis elevabantur spiritus enim vitæ erat in eis

17. Stantibus illis, stabant et cum elevatis elevabantur; spiritus enim animalium erat in eis.

18. et egressa est gloria Domini a limine templi et stetit super cherubin

18. Et egressa est gloria Domini a limine templi et stetit super cherubim;

19. et elevantia cherubin alas suas exaltata sunt a terra coram me et illis egredientibus rotæ quoque subsecutæ sunt et stetit in introitu portæ domus Domini orientalis et gloria Dei Israël erat super ea

19. et elevantes cherubim alas suas exaltata sunt a terra coram me, et, illis egredientibus, rotae quoque subsecutae sunt; et stetit in introitu portae domus Domini orientalis, et gloria Dei Israel erat super eos.

20. ipsum est animal quod vidi subter Deum Israël juxta fluvium Chobar et intellexi quia cherubin essent

20. Ipsum est animal, quod vidi subter Deum Israel iuxta fluvium Chobar, et intellexi quia cherubim essent.

21. quattuor per quattuor vultus uni et quattuor alæ uni et similitudo manus hominis sub alis eorum

21. Quattuor per quattuor vultus unicuique, et quattuor alae unicuique, et similitudo manus hominis sub alis eorum;

22. et similitudo vultuum eorum ipsi vultus quos videram juxta fluvium Chobar et intuitus eorum et impetus singulorum ante faciem suam ingredi

22. et similitudo vultuum eorum, ipsi vultus quorum aspectum videram iuxta fluvium Chobar. Et singuli ante faciem suam gradiebantur.