Liber Proverbiorum, 3

1. fili mi ne obliviscaris legis meæ et præcepta mea custodiat cor tuum

1. Fili mi, ne obliviscaris legis meae, et praecepta mea cor tuum custodiat;

2. longitudinem enim dierum et annos vitæ et pacem adponent tibi

2. longitudinem enim dierum et annos vitae et pacem apponent tibi.

3. misericordia et veritas non te deserant circumda eas gutturi tuo et describe in tabulis cordis tui

3. Misericordia et veritas te non deserant; circumda eas gutturi tuo et describe in tabulis cordis tui,

4. et invenies gratiam et disciplinam bonam coram Deo et hominibus

4. et invenies gratiam et successum bonum coram Deo et hominibus.

5. habe fiduciam in Domino ex toto corde tuo et ne innitaris prudentiæ tuæ

5. Habe fiduciam in Domino ex toto corde tuo et ne innitaris prudentiae tuae.

6. in omnibus viis tuis cogita illum et ipse diriget gressus tuos

6. In omnibus viis tuis cogita illum, et ipse diriget gressus tuos.

7. ne sis sapiens apud temet ipsum time Dominum et recede a malo

7. Ne sis sapiens apud temetipsum; time Dominum et recede a malo.

8. sanitas quippe erit umbilico tuo et inrigatio ossuum tuorum

8. Sanitas quippe erit umbilico tuo, et irrigatio ossibus tuis.

9. honora Dominum de tua substantia et de primitiis omnium frugum tuarum

9. Honora Dominum de tua substantia et de primitiis omnium frugum tuarum,

10. et implebuntur horrea tua saturitate et vino torcularia redundabunt

10. et implebuntur horrea tua frumento, et vino torcularia tua redundabunt.

11. disciplinam Domini fili mi ne abicias nec deficias cum ab eo corriperis

11. Disciplinam Domini, fili mi, ne abicias nec asperneris, cum ab eo corriperis:

12. quem enim diligit Dominus corripit et quasi pater in filio conplacet sibi

12. quem enim diligit, Dominus corripit et quasi pater in filio complacet sibi.

13. beatus homo qui invenit sapientiam et qui affluit prudentia

13. Beatus homo, qui invenit sapientiam et qui affluit prudentia:

14. melior est adquisitio ejus negotiatione argenti et auro primo fructus ejus

14. melior est acquisitio eius negotiatione argenti, et auro primo fructus eius.

15. pretiosior est cunctis opibus et omnia quæ desiderantur huic non valent conparari

15. Pretiosior est cunctis gemmis, et omnia pretiosa tua huic non valent comparari;

16. longitudo dierum in dextera ejus in sinistra illius divitiæ et gloria

16. longitudo dierum in dextera eius, et in sinistra illius divitiae et gloria.

17. viæ ejus viæ pulchræ et omnes semitæ illius pacificæ

17. Viae eius viae pulchrae, et omnes semitae illius pacificae.

18. lignum vitæ est his qui adprehenderint eam et qui tenuerit eam beatus

18. Lignum vitae est his, qui apprehenderint eam; et, qui tenuerit eam, beatus.

19. Dominus sapientia fundavit terram stabilivit cælos prudentia

19. Dominus sapientia fundavit terram, stabilivit caelos prudentia;

20. sapientia illius eruperunt abyssi et nubes rore concrescunt

20. sapientia illius eruperunt abyssi, et nubes rorem stillant.

21. fili mi ne effluant hæc ab oculis tuis custodi legem atque consilium

21. Fili mi, ne effluant haec ab oculis tuis; custodi prudentiam atque consilium,

22. et erit vita animæ tuæ et gratia faucibus tuis

22. et erit vita animae tuae, et gratia collo tuo;

23. tunc ambulabis fiducialiter in via tua et pes tuus non inpinget

23. tunc ambulabis fiducialiter in via tua, et pes tuus non impinget.

24. si dormieris non timebis quiesces et suavis erit somnus tuus

24. Si dormieris, non timebis; quiesces, et suavis erit somnus tuus.

25. ne paveas repentino terrore et inruentes tibi potentias impiorum

25. Ne paveas repentino terrore et irruentem tibi turbinem impiorum, cum venerit.

26. Dominus enim erit in latere tuo et custodiet pedem tuum ne capiaris

26. Dominus enim erit in latere tuo et custodiet pedem tuum, ne capiaris.

27. noli prohibere benefacere eum qui potest si vales et ipse benefac

27. Noli prohibere beneficium ab eo, cui debetur, si in potestate manus tuae est, ut facias.

28. ne dicas amico tuo vade et revertere et cras dabo tibi cum statim possis dare

28. Ne dicas amico tuo: “Vade et revertere, cras dabo tibi”, cum statim possis dare.

29. ne moliaris amico tuo malum cum ille in te habeat fiduciam

29. Ne moliaris amico tuo malum, cum ille apud te sedeat cum fiducia.

30. ne contendas adversus hominem frustra cum ipse tibi nihil mali fecerit

30. Ne contendas adversus hominem frustra, cum ipse tibi nihil mali fecerit.

31. ne æmuleris hominem iniustum nec imiteris vias ejus

31. Ne aemuleris hominem iniustum nec imiteris omnes vias eius,

32. quia abominatio Domini est omnis inlusor et cum simplicibus sermocinatio ejus

32. quia abominatio Domini est omnis pravus, et cum simplicibus societas eius.

33. egestas a Domino in domo impii habitacula autem justorum benedicentur

33. Maledictio a Domino in domo impii, habitacula autem iustorum benedicentur.

34. inlusores ipse deludet et mansuetis dabit gratiam

34. Ipse deludet illusores et mansuetis dabit gratiam;

35. gloriam sapientes possidebunt stultorum exaltatio ignominia

35. gloriam sapientes possidebunt, stultorum exaltatio ignominia.