Liber Ecclesiasticus, 49
1. memoria Josiæ in conpositione odoris facti opus pigmentarii
1. Memoria Iosiae in compositionem odoris facta opere pigmentarii;
2. in omni ore quasi mel indulcabitur ejus memoria et ut musica in convivio vini
2. in omni ore quasi mel indulcabitur eius memoria et ut musica in convivio vini.
3. ipse est directus divinitus in pænitentia gentis et tulit abominationes impietatis
3. Ipse est directus divinitus in paenitentia gentis et tulit abominationes impietatis;
4. et gubernavit ad Dominum cor ipsius in diebus peccatorum corroboravit pietatem
4. et gubernavit ad Dominum cor suum et in diebus peccatorum corroboravit pietatem.
5. præter David et Ezechiam et Josiam omnes peccatum commiserunt
5. Praeter David et Ezechiam et Iosiam, omnes peccatum commiserunt;
6. nam reliquerunt legem Potentis reges Judæ et contempserunt timorem Dei
6. nam reliquerunt legem Altissimi reges Iudae et contempserunt timorem Dei;
7. dederunt enim regnum suum aliis et gloriam suam alienæ genti
7. dederunt enim regnum suum aliis et gloriam suam alienae genti;
8. incenderunt electam sanctitatis civitatem et desertas fecerunt vias ipsius in manu Hieremiæ
8. incenderunt electam sanctuarii civitatem et desertas fecerunt vias ipsius in manu Ieremiae.
9. nam male tractaverunt illum qui a ventre matris consecratus est propheta evertere et eruere et perdere et iterum ædificare et renovare
9. Nam male tractaverunt illum, ipse autem a ventre matris consecratus est propheta evertere et eruere et perdere et iterum aedificare et plantare et renovare.
10. Ezechihel qui vidit conspectum gloriæ quam ostendit illi in curru cherubin
10. Ezechiel, qui vidit visionem gloriae, quam ostendit illi in curru cherubim.
11. nam commemoratus est inimicorum in imbri et benefacere illis qui ostenderunt rectas vias
11. Nam et commemoratus est inimicorum in imbre et benefacere illis, qui ostenderunt rectas vias.
12. et duodecim prophetarum ossa pullulent de loco suo nam rogaverunt Jacob et redimerunt se in fide virtutis
12. Et duodecim prophetarum ossa pullulent de loco suo; nam corroboraverunt Iacob et redemerunt eos in fide virtutis.
13. quomodo amplificemus Zorobabel nam et ipse quasi signum in dextera manu in Israël
13. Quomodo amplificemus Zorobabel? Nam et ipse quasi signum in dextera manu;
14. et Jesum Josedec qui in diebus suis ædificaverunt domum et exaltaverunt templum sanctum Domino paratum in gloria sempiterna
14. sic et Iesua filius Iosedec. Qui in diebus suis aedificaverunt domum et exaltaverunt templum sanctum Domino paratum in gloriam sempiternam.
15. et Neemia in memoria multi temporis qui erexit nobis muros eversos et stare fecit portas et seras qui erexit domos nostras
15. Et Nehemias: in memoria multi temporis, qui erexit nobis muros eversos et stare fecit portas et seras; qui erexit domos nostras.
16. nemo natus est in terra qualis Enoch nam et ipse receptus est a terra
16. Nemo creatus est in terra qualis Henoch; nam et ipse assumptus est a terra.
17. et Joseph natus est homo princeps fratrum firmamentum gentis rector fratrum stabilimentum populi
17. Neque ut Ioseph natus est homo, princeps fratrum, firmamentum gentis;
18. et ossa ipsius visitata sunt et post mortem prophetaverunt
18. et ossa ipsius visitata sunt et post mortem prophetaverunt.
19. Seth et Sem apud homines gloriam adepti sunt et super omnem animam in origine Adam
19. Seth et Sem apud homines gloriam adepti sunt et super omnem animam in origine Adam.
