Liber Ecclesiasticus, 39

1. sapientiam omnium antiquorum exquiret et in prophetiis vacabit

1. Qui autem accommodat animam suam ad timorem Dei et in lege Altissimi meditatur, sapientiam omnium antiquorum exquiret et in prophetiis vacabit.

2. narrationem virorum nominatorum conservabit et in versutias parabolarum simul introibit

2. Narrationem virorum nominatorum conservabit et in versutias parabolarum simul introibit.

3. occulta proverbiorum exquiret et in absconditis parabolarum conversabitur

3. Occulta proverbiorum exquiret et in absconditis parabolarum conversabitur.

4. in medio magnatorum ministrabit et in conspectu præsidis apparebit

4. In medio magnatorum ministrabit et in conspectu principum apparebit.

5. in terram alienarum gentium pertransiet bona enim et mala in hominibus temptavit

5. In terram alienigenarum gentium pertransiet; bona enim et mala in hominibus tentabit.

6. cor suum tradet ad vigilandum diluculo ad Dominum qui fecit illum et in conspectu Altissimi deprecabitur

6. Cor suum tradet ad vigilandum diluculo ad Dominum, qui fecit illum, et in conspectu Altissimi deprecabitur.

7. aperiet os suum in oratione et pro delictis suis deprecabitur

7. Aperiet os suum in oratione et pro delictis suis deprecabitur.

8. si enim Dominus magnus voluerit spiritu intellegentiæ replebit illum

8. Si enim Dominus magnus voluerit, spiritu intellegentiae replebitur.

9. et ipse tamquam imbres mittet eloquia sapientiæ suæ et in oratione confitebitur Domino

9. Ipse tamquam imbres mittet eloquia sapientiae suae et in oratione confitebitur Domino.

10. ipse diriget consilium ejus et disciplinam et in absconditis suis consiliabitur

10. Et ipse diriget consilium et disciplinam et in absconditis eius considerabit.

11. ipse palam faciet disciplinam doctrinæ suæ et in lege testamenti Domini gloriabitur

11. Ipse palam faciet disciplinam doctrinae suae et in lege testamenti Domini gloriabitur.

12. conlaudabunt multi sapientiam ejus et usque in sæculum non delebitur

12. Collaudabunt multi sapientiam eius, et usque in saeculum non delebitur.

13. non recedet memoria ejus et nomen ejus requiretur a generatione in generationem

13. Non recedet memoria eius, et nomen eius requiretur a generatione in generationem;

14. sapientiam ejus enarrabunt gentes et laudem ejus nuntiabit ecclesia

14. sapientiam eius enarrabunt gentes, et laudem eius enuntiabit ecclesia.

15. si inmanserit nomen derelinquet mille et si requieverit proderit illi

15. Si permanserit, nomen derelinquet plus quam mille, et, si requieverit, proderit sibi.

16. adhuc consiliabor ut enarrem ut furore enim repletus sum

16. Adhuc meditabor et enarrabo; ut luna die duodecimo repletus sum.

17. in voce dicit obaudite me divini fructus et quasi rosa plantata super rivum aquarum fructificate

17. Obaudite me, filii pii, et quasi rosa plantata super rivos aquarum florebit caro vestra;

18. quasi libanus odorem suavitatis habete

18. quasi libanus odorem suavitatis habete,

19. florete flores quasi lilium date odorem et frondete in gratiam et conlaudate canticum et benedicite Dominum in operibus suis

19. florete flores quasi lilium. Date vocem et collaudate canticum et benedicite Dominum in omnibus operibus suis.

20. date nomini ejus magnificentiam et confitemini illi in voce labiorum vestrorum in canticis labiorum et cinyris et sic dicetis in confessione

20. Date nomini eius magnificentiam et confitemini illi in laudatione eius et in canticis labiorum et citharis; et sic dicetis in confessione:

21. opera Domini universa bona valde

21. “Opera Domini universa bona valde, et omne, quod praecepit, tempore suo erit!”. Non est dicere: “Quid est hoc?” aut “Ad quid istud?”; omnia enim in tempore suo conquirentur.

22. in verbo ejus stetit aqua sicut congeries et in sermone oris ejus sicut exceptoria aquarum

22. In verbo eius stetit aqua sicut congeries, et in sermone oris illius exceptoria aquarum;

23. quoniam in præcepto ipsius placor fit et non est minoratio in salute illius

23. quoniam in praecepto ipsius placor fit, et non est minoratio in salutare ipsius.

24. opera omnis carnis coram illo et non est quicquam absconditum ab oculis ejus

24. Opera omnis carnis coram illo, et non est quidquam absconditum ab oculis eius.

25. a sæculo usque in sæculum respicit et nihil est mirabile in conspectu ejus

25. A saeculo usque in saeculum respicit, et nihil est mirabile in conspectu eius.

26. non est dicere quid est hoc aut quid est illud omnia enim in tempore suo quærentur

26. Non est dicere: “Quid est hoc!” aut “Ad quid istud?”; omnia enim in usum suum creata sunt.

27. benedictio illius quasi fluvius inundavit

27. Benedictio illius quasi fluvius inundavit

28. et quomodo cataclysmus aridam inebriavit sic ira ipsius gentes quæ non exquisierunt eum hereditabit

28. et sicut cataclysmus aridam inebriavit. Sic ira ipsius gentes, quae non exquisierunt eum, disperdet,

29. quomodo convertit aquas et siccata est terra et viæ illius viis illorum directæ sunt sic peccatoribus offensiones in ira ejus

29. quomodo convertit aquas in salsuginem. Viae illius sanctis directae sunt; sic peccatoribus offensiones in ira eius.

30. bona bonis creata sunt ab initio sic nequissimis bona et mala

30. Bona bonis creata sunt ab initio, sic peccatoribus bona et mala.

31. initium necessariæ rei vitæ hominum aqua ignis et ferrum lac et panis similagineus et mel et botrus uvæ et oleum et vestimentum

31. Primum necessaria vitae hominum aqua, ignis et ferrum, sal, lac et panis similagineus et mel et sanguis uvae et oleum et vestimentum:

32. hæc omnia sanctis in bona sic et impiis et peccatoribus in mala convertentur

32. haec omnia sanctis in bona, sic et impiis et peccatoribus in mala convertentur.

33. sunt spiritus qui ad vindictam creati sunt et in furore suo confirmaverunt tormenta sua

33. Sunt spiritus, qui ad vindictam creati sunt et in furore suo confirmaverunt tormenta sua;

34. in tempore consummationis effundent virtutem et furorem ejus qui fecit illos confundent

34. in tempore consummationis effundent virtutem et furorem eius, qui fecit illos, placabunt:

35. ignis grando famis et mors omnia hæc ad vindictam creata sunt

35. ignis, grando, fames et mors, omnia haec ad vindictam creata sunt;

36. bestiarum dentes et scorpii et serpentes et romphea vindicans in exterminium impios

36. bestiarum dentes et scorpii et serpentes et romphaea vindicans in exterminium impios:

37. in mandatis ejus epulabuntur et super terram in necessitatem præparabuntur et in temporibus suis non præterient verbum

37. in mandatis eius gaudebunt et super terram in necessitates praeparabuntur et in temporibus suis non praeterient verbum.

38. propterea ab initio confirmatus et consiliatus sum et cogitavi et in scripta dimisi

38. Propterea ab initio confirmatus et consiliatus sum et cogitavi et scriptis mandavi:

39. omnia opera Domini bona et omne opus hora sua subministrabit

39. “Opera Domini omnia bona, et omnem usum hora sua subministrabit”.

40. non est dicere hoc illo nequius est omnia enim in tempore suo conprobabuntur

40. Non est dicere: “Hoc illo nequius est”: omnia enim in tempore suo comprobabuntur.

41. et nunc in omni corde et ore conlaudate et benedicite nomen Domini

41. Et nunc in omni corde et ore collaudate et benedicite nomen Domini.