Epistula ad Hebraeos, 8

1. capitulum autem super ea quæ dicuntur talem habemus pontificem qui consedit in dextera sedis Magnitudinis in cælis

1. Caput autem super ea, quae dicuntur: talem habemus ponti ficem, qui consedit in dextera throni Maiestatis in caelis,

2. sanctorum minister et tabernaculi veri quod fixit Dominus et non homo

2. sanctorum minister et tabernaculi veri, quod fixit Dominus, non homo.

3. omnis enim pontifex ad offerenda munera et hostias constituitur unde necesse est et hunc habere aliquid quod offerat

3. Omnis enim pontifex ad offerenda munera et hostias constituitur; unde necesse erat et hunc habere aliquid, quod offerret.

4. si ergo esset super terram nec esset sacerdos cum essent qui offerrent secundum legem munera

4. Si ergo esset super terram, nec esset sacerdos, cum sint qui offerant secundum legem munera;

5. qui exemplari et umbræ deserviunt cælestium sicut responsum est Mosi cum consummaret tabernaculum vide inquit omnia facito secundum exemplar quod tibi ostensum est in monte

5. qui figurae et umbrae deserviunt caelestium, sicut responsum est Moysi, cum consummaturus esset tabernaculum: “Vide enim, inquit, omnia facies secundum exemplar, quod tibi ostensum est in monte”.

6. nunc autem melius sortitus est ministerium quanto et melioris testamenti mediator est quod in melioribus repromissionibus sanctum est

6. Nunc autem differentius sortitus est ministerium, quanto et melioris testamenti mediator est, quod in melioribus repromissionibus sancitum est.

7. nam si illud prius culpa vacasset non utique secundi locus inquireretur

7. Nam si illud prius culpa vacasset, non secundi locus inquireretur;

8. vituperans enim eos dicit ecce dies veniunt dicit Dominus et consummabo super domum Israël et super domum Juda testamentum novum

8. vituperans enim eos dicit: “Ecce dies veniunt, dicit Dominus, et consummabo super domum Israel et super domum Iudae testamentum novum;

9. non secundum testamentum quod feci patribus eorum in die qua adprehendi manum illorum ut educerem illos de terra Ægypti quoniam ipsi non permanserunt in testamento meo et ego neglexi eos dicit Dominus

9. non secundum testamentum, quod feci patribus eorum in die, qua apprehendi manum illorum, ut educerem illos de terra Aegypti; quoniam ipsi non permanserunt in testamento meo, et ego neglexi eos, dicit Dominus.

10. quia hoc testamentum quod disponam domui Israël post dies illos dicit Dominus dando leges meas in mentem eorum et in corde eorum superscribam eas et ero eis in Deum et ipsi erunt mihi in populum

10. Quia hoc est testamentum, quod testabor domui Israel post dies illos, dicit Dominus, dando leges meas in mentem eorum, et in corde eorum superscribam eas; et ero eis in Deum, et ipsi erunt mihi in populum.

11. et non docebit unusquisque proximum suum et unusquisque fratrem suum dicens cognosce Dominum quoniam omnes scient me a minore usque ad majorem eorum

11. Et non docebit unusquisque civem suum, et unusquisque fratrem suum dicens: “Cognosce Dominum”; quoniam omnes scient me, a minore usque ad maiorem eorum,

12. quia propitius ero iniquitatibus eorum et peccatorum illorum jam non memorabor

12. quia propitius ero iniquitatibus eorum et peccatorum illorum iam non memorabor”.

13. dicendo autem novum veteravit prius quod autem antiquatur et senescit prope interitum est

13. Dicendo “novum” veteravit prius; quod autem antiquatur et senescit, prope interitum est.