Epistula ad Hebraeos, 12

1. ideoque et nos tantam habentes inpositam nubem testium deponentes omne pondus et circumstans nos peccatum per patientiam curramus propositum nobis certamen

1. Ideoque et nos tantam ha bentes circumpositam nobis nubem testium, deponentes omne pondus et circumstans nos peccatum, per patientiam curramus propositum nobis certamen,

2. aspicientes in auctorem fidei et consummatorem Jesum qui pro proposito sibi gaudio sustinuit crucem confusione contempta atque in dextera sedis Dei sedit

2. aspicientes in ducem fidei et consummatorem Iesum, qui pro gaudio sibi proposito sustinuit crucem, confusione contempta, atque in dextera throni Dei sedet.

3. recogitate enim eum qui talem sustinuit a peccatoribus adversum semet ipsos contradictionem ut ne fatigemini animis vestris deficientes

3. Recogitate enim eum, qui talem sustinuit a peccatoribus adversum semetipsum contradictionem, ut ne fatigemini animis vestris deficientes.

4. nondum usque ad sanguinem restitistis adversus peccatum repugnantes

4. Nondum usque ad sanguinem restitistis adversus peccatum repugnantes;

5. et obliti estis consolationis quæ vobis tamquam filiis loquitur dicens fili mi noli neglegere disciplinam Domini neque fatigeris dum ab eo argueris

5. et obliti estis exhortationis, quae vobis tamquam filiis loquitur: “Fili mi, noli neglegere disciplinam Domini neque deficias, dum ab eo argueris:

6. quem enim diligit Dominus castigat flagellat autem omnem filium quem recipit

6. quem enim diligit, Dominus castigat, flagellat autem omnem filium, quem recipit”.

7. in disciplina perseverate tamquam filiis vobis offert Deus quis enim filius quem non corripit pater

7. Ad disciplinam suffertis; tamquam filios vos tractat Deus. Quis enim filius, quem non corripit pater?

8. quod si extra disciplinam estis cujus participes facti sunt omnes ergo adulteri et non filii estis

8. Quod si extra disciplinam estis, cuius participes facti sunt omnes, ergo adulterini et non filii estis!

9. deinde patres quidem carnis nostræ habuimus eruditores et reverebamur non multo magis obtemperabimus Patri spirituum et vivemus

9. Deinde patres quidem carnis nostrae habebamus eruditores et reverebamur; non multo magis obtemperabimus Patri spirituum et vivemus?

10. et illi quidem in tempore paucorum dierum secundum voluntatem suam erudiebant nos hic autem ad id quod utile est in recipiendo sanctificationem ejus

10. Et illi quidem ad tempus paucorum dierum, secundum quod videbatur illis, castigabant; hic autem ad id, quod utile est ad participandam sanctitatem eius.

11. omnis autem disciplina in præsenti quidem videtur non esse gaudii sed mæroris postea autem fructum pacatissimum exercitatis per eam reddit justitiæ

11. Omnis autem disciplina in praesenti quidem videtur non esse gaudii sed maeroris; postea autem fructum pacificum exercitatis per eam reddit iustitiae.

12. propter quod remissas manus et soluta genua erigite

12. Propter quod remissas manus et soluta genua erigite

13. et gressus rectos facite pedibus vestris ut non claudicans erret magis autem sanetur

13. et gressus rectos facite pedibus vestris, ut, quod claudum est, non extorqueatur, magis autem sanetur.

14. pacem sequimini cum omnibus et sanctimoniam sine qua nemo videbit Dominum

14. Pacem sectamini cum omnibus et sanctificationem, sine qua nemo videbit Dominum,

15. contemplantes ne quis desit gratiæ Dei ne qua radix amaritudinis sursum germinans inpediat et per illam inquinentur multi

15. providentes, ne quis desit gratiae Dei, ne qua radix amaritudinis sursum germinans perturbet, et per illam inquinentur multi;

16. ne quis fornicator aut profanus ut Esau qui propter unam escam vendidit primitiva sua

16. ne quis fornicator aut profanus ut Esau, qui propter unam escam vendidit primogenita sua.

17. scitote enim quoniam et postea cupiens hereditare benedictionem reprobatus est non enim invenit pænitentiæ locum quamquam cum lacrimis inquisisset eam

17. Scitis enim quoniam et postea cupiens hereditare benedictionem reprobatus est; non enim invenit paenitentiae locum, quamquam cum lacrimis inquisisset eam.

18. non enim accessistis ad tractabilem et accensibilem ignem et turbinem et caliginem et procellam

18. Non enim accessistis ad tractabilem et ardentem ignem et turbinem et caliginem et procellam

19. et tubæ sonum et vocem verborum quam qui audierunt excusaverunt se ne eis fieret verbum

19. et tubae sonum et vocem verborum, quam qui audierunt, recusaverunt, ne ultra eis fieret verbum;

20. non enim portabant quod dicebatur et si bestia tetigerit montem lapidabitur

20. non enim portabant mandatum: “Et si bestia tetigerit montem, lapidabitur”;

21. et ita terribile erat quod videbatur Moses dixit exterritus sum et tremebundus

21. et ita terribile erat, quod videbatur, Moyses dixit: “Exterritus sum et tremebundus”.

22. sed accessistis ad Sion montem et civitatem Dei viventis Hierusalem cælestem et multorum milium angelorum frequentiæ

22. Sed accessistis ad Sion montem et civitatem Dei viventis, Ierusalem caelestem, et multa milia angelorum, frequentiam

23. et ecclesiam primitivorum qui conscripti sunt in cælis et judicem omnium Deum et spiritus justorum perfectorum

23. et ecclesiam primogenitorum, qui conscripti sunt in caelis, et iudicem Deum omnium et spiritus iustorum, qui consummati sunt,

24. et testamenti novi mediatorem Jesum et sanguinis sparsionem melius loquentem quam Abel

24. et testamenti novi mediatorem Iesum et sanguinem aspersionis, melius loquentem quam Abel.

25. videte ne recusetis loquentem si enim illi non effugerunt recusantes eum qui super terram loquebatur multo magis nos qui de cælis loquentem nobis avertimur

25. Videte, ne recusetis loquentem; si enim illi non effugerunt recusantes eum, qui super terram loquebatur, multo magis nos, qui de caelis loquentem avertimus;

26. cujus vox movit terram tunc modo autem repromittit dicens adhuc semel ego movebo non solum terram sed et cælum

26. cuius vox movit terram tunc, modo autem pronuntiavit dicens: “Adhuc semel ego movebo non solum terram sed et caelum”.

27. quod autem adhuc semel dicit declarat mobilium translationem tamquam factorum ut maneant ea quæ sunt inmobilia

27. Hoc autem “adhuc semel” declarat mobilium translationem tamquam factorum, ut maneant ea, quae sunt immobilia.

28. itaque regnum inmobile suscipientes habemus gratiam per quam serviamus placentes Deo cum metu et reverentia

28. Itaque, regnum immobile suscipientes, habeamus gratiam, per quam serviamus placentes Deo cum reverentia et metu;

29. etenim Deus noster ignis consumens est

29. etenim Deus noster ignis consumens est.