Liber Ecclesiastes, 11

1. mitte panem tuum super transeuntes aquas quia post multa tempora invenies illum

1. Mitte panem tuum super transeuntes aquas, quia post tempora multa invenies illum.

2. da partem septem necnon et octo quia ignoras quid futurum sit mali super terram

2. Da partem septem necnon et octo, quia ignoras, quid futurum sit mali super terram.

3. si repletæ fuerint nubes imbrem super terram effundent si ceciderit lignum ad austrum aut ad aquilonem in quocumque loco ceciderit ibi erit

3. Si repletae fuerint nubes, imbrem super terram effundent; si ceciderit lignum ad austrum aut ad aquilonem, in quocumque loco ceciderit, ibi erit.

4. qui observat ventum non seminat et qui considerat nubes numquam metet

4. Qui observat ventum, non seminat, et, qui considerat nubes, numquam metet.

5. quomodo ignoras quæ sit via spiritus et qua ratione conpingantur ossa in ventre prægnatis sic nescis opera Dei qui fabricator est omnium

5. Quomodo ignoras, quae sit via spiritus, et qua ratione compingantur ossa in ventre praegnantis, sic nescis opera Dei, qui fabricator est omnium.

6. mane semina sementem tuam et vespere ne cesset manus tua quia nescis quid magis oriatur hoc an illud et si utrumque simul melius erit

6. Mane semina semen tuum, et vespere ne cesset manus tua, quia nescis quid magis prosit, hoc aut illud, et si utrumque simul melius erit.

7. dulce lumen et delectabile est oculis videre solem

7. Dulce lumen, et delectabile est oculis videre solem.

8. si annis multis vixerit homo et in omnibus his lætatus fuerit meminisse debet tenebrosi temporis et dierum multorum qui cum venerint vanitatis arguentur præterita

8. Si annis multis vixerit homo et in his omnibus laetatus fuerit, meminisse debet tenebrosi temporis, quod multum erit: omne, quod venerit, vanitas.

9. lætare ergo juvenis in adulescentia tua et in bono sit cor tuum in diebus juventutis tuæ et ambula in viis cordis tui et in intuitu oculorum tuorum et scito quod pro omnibus his adducet te Deus in judicium

9. Laetare ergo, iuvenis, in adulescentia tua, et in bono sit cor tuum in diebus iuventutis tuae, et ambula in viis cordis tui et in intuitu oculorum tuorum et scito quod pro omnibus his adducet te Deus in iudicium.

10. aufer iram a corde tuo et amove malitiam a carne tua adulescentia enim et voluptas vana sunt

10. Aufer curam a corde tuo et amove malum a carne tua; adulescentia enim et iuventus vanae sunt.