Liber Leviticus, 26
1. ego Dominus Deus vester non facietis vobis idolum et sculptile nec titulos erigetis nec insignem lapidem ponetis in terra vestra ut adoretis eum ego enim sum Dominus Deus vester
2. custodite sabbata mea et pavete ad sanctuarium meum ego Dominus
3. si in præceptis meis ambulaveritis et mandata mea custodieritis et feceritis ea dabo vobis pluvias temporibus suis
4. et terra gignet germen suum et pomis arbores replebuntur
5. adprehendet messium tritura vindemiam et vindemia occupabit sementem et comedetis panem vestrum in saturitatem et absque pavore habitabitis in terra vestra
6. dabo pacem in finibus vestris dormietis et non erit qui exterreat auferam malas bestias et gladius non transibit terminos vestros
7. persequemini inimicos vestros et corruent coram vobis
8. persequentur quinque de vestris centum alienos et centum ex vobis decem milia cadent inimici vestri in conspectu vestro gladio
9. respiciam vos et crescere faciam multiplicabimini et firmabo pactum meum vobiscum
10. comedetis vetustissima veterum et vetera novis supervenientibus proicietis
11. ponam tabernaculum meum in medio vestri et non abiciet vos anima mea
12. ambulabo inter vos et ero vester Deus vosque eritis populus meus
13. ego Dominus Deus vester qui eduxi vos de terra Ægyptiorum ne serviretis eis et qui confregi catenas cervicum vestrarum ut incederetis erecti
14. quod si non audieritis me nec feceritis omnia mandata mea
15. si spreveritis leges meas et judicia mea contempseritis ut non faciatis ea quæ a me constituta sunt et ad irritum perducatis pactum meum
16. ego quoque hæc faciam vobis visitabo vos velociter in egestate et ardore qui conficiat oculos vestros et consumat animas frustra seretis sementem quæ ab hostibus devorabitur
17. ponam faciem meam contra vos et corruetis coram hostibus vestris et subiciemini his qui oderunt vos fugietis nemine persequente
18. sin autem nec sic obœdieritis mihi addam correptiones vestras septuplum propter peccata vestra
19. et conteram superbiam duritiæ vestræ daboque cælum vobis desuper sicut ferrum et terram æneam
20. consumetur in cassum labor vester non proferet terra germen nec arbores poma præbebunt
21. si ambulaveritis ex adverso mihi nec volueritis audire me addam plagas vestras usque in septuplum propter peccata vestra
22. emittamque in vos bestias agri quæ consumant et vos et pecora vestra et ad paucitatem cuncta redigant desertæque fiant viæ vestræ
23. quod si nec sic volueritis recipere disciplinam sed ambulaveritis ex adverso mihi
24. ego quoque contra vos adversus incedam et percutiam vos septies propter peccata vestra
25. inducamque super vos gladium ultorem fœderis mei cumque confugeritis in urbes mittam pestilentiam in medio vestri et trademini hostium manibus
26. postquam confregero baculum panis vestri ita ut decem mulieres in uno clibano coquant panes et reddant eos ad pondus et comedetis et non saturabimini
27. sin autem nec per hæc audieritis me sed ambulaveritis contra me
28. et ego incedam adversum vos in furore contrario et corripiam vos septem plagis propter peccata vestra
29. ita ut comedatis carnes filiorum et filiarum vestrarum
30. destruam excelsa vestra et simulacra confringam cadetis inter ruinas idolorum vestrorum et abominabitur vos anima mea
31. in tantum ut urbes vestras redigam in solitudinem et deserta faciam sanctuaria vestra nec recipiam ultra odorem suavissimum
32. disperdamque terram vestram et stupebunt super ea inimici vestri cum habitatores illius fuerint
33. vos autem dispergam in gentes et evaginabo post vos gladium eritque terra vestra deserta et civitates dirutæ
34. tunc placebunt terræ sabbata sua cunctis diebus solitudinis suæ quando fueritis
35. in terra hostili sabbatizabit et requiescet in sabbatis solitudinis suæ eo quod non requieverit in sabbatis vestris quando habitabatis in ea
36. et qui de vobis remanserint dabo pavorem in cordibus eorum in regionibus hostium terrebit eos sonitus folii volantis et ita fugient quasi gladium cadent nullo sequente
37. et corruent singuli super fratres suos quasi bella fugientes nemo vestrum inimicis audebit resistere
38. peribitis inter gentes et hostilis vos terra consumet
39. quod si et de his aliqui remanserint tabescent in iniquitatibus suis in terra inimicorum suorum et propter peccata patrum suorum et sua adfligentur
40. donec confiteantur iniquitates suas et majorum suorum quibus prævaricati sunt in me et ambulaverunt ex adverso mihi
41. ambulabo igitur et ego contra eos et inducam illos in terram hostilem donec erubescat incircumcisa mens eorum tunc orabunt pro impietatibus suis
42. et recordabor fœderis mei quod pepigi cum Jacob et Isaac et Abraham terræ quoque memor ero
43. quæ cum relicta fuerit ab eis conplacebit sibi in sabbatis suis patiens solitudinem propter illos ipsi vero rogabunt pro peccatis suis eo quod abiecerint judicia mea et leges meas despexerint
44. et tamen etiam cum essent in terra hostili non penitus abieci eos neque sic despexi ut consumerentur et irritum facerem pactum meum cum eis ego enim sum Dominus Deus eorum
45. et recordabor fœderis mei pristini quando eduxi eos de terra Ægypti in conspectu gentium ut essem Deus eorum ego Dominus Deus hæc sunt præcepta atque judicia et leges quas dedit Dominus inter se et inter filios Israël in monte Sinai per manum Mosi