Liber Proverbiorum, 7

1. fili mi custodi sermones meos et præcepta mea reconde tibi

1. Fili mi, custodi sermones meos et praecepta mea reconde tibi.

2. serva mandata mea et vives et legem meam quasi pupillam oculi tui

2. Serva mandata mea et vives, et legem meam quasi pupillam oculi tui.

3. liga eam in digitis tuis scribe illam in tabulis cordis tui

3. Liga ea in digitis tuis, scribe illa in tabulis cordis tui.

4. dic sapientiæ soror mea es et prudentiam voca amicam tuam

4. Dic sapientiae: “Soror mea es” et prudentiam voca Amicam,

5. ut custodiat te a muliere extranea et ab aliena quæ verba sua dulcia facit

5. ut custodiat te a muliere extranea et ab aliena, quae verba sua dulcia facit.

6. de fenestra enim domus meæ per cancellos prospexi

6. De fenestra enim domus meae per cancellos prospexi

7. et video parvulos considero vecordem juvenem

7. et video inter parvulos; considero inter filios vecordem iuvenem,

8. qui transit in platea juxta angulum et propter viam domus illius graditur

8. qui transit per plateam iuxta angulum et prope viam domus illius graditur

9. in obscuro advesperascente die in noctis tenebris et caligine

9. in obscuro advesperascente die, in mediis tenebris et caligine.

10. et ecce mulier occurrit illi ornatu meretricio præparata ad capiendas animas garrula et vaga

10. Et ecce, occurrit illi mulier ornatu meretricio, cauta corde, garrula et rebellans,

11. quietis inpatiens nec valens in domo consistere pedibus suis

11. quietis impatiens nec valens in domo consistere pedibus suis:

12. nunc foris nunc in plateis nunc juxta angulos insidians

12. nunc foris, nunc in plateis et iuxta angulos insidians.

13. adprehensumque deosculatur juvenem et procaci vultu blanditur dicens

13. Apprehensumque deosculatur iuvenem et procaci vultu blanditur dicens:

14. victimas pro salute debui hodie reddidi vota mea

14. “Victimas pro salute vovi, hodie reddidi vota mea;

15. idcirco egressa sum in occursum tuum desiderans te videre et repperi

15. idcirco egressa sum in occursum tuum desiderans te videre et repperi.

16. intexui funibus lectum meum stravi tapetibus pictis ex Ægypto

16. Stragulatis vestibus lectulum meum stravi, linteis pictis ex Aegypto;

17. aspersi cubile meum murra et alœ et cinnamomo

17. aspersi cubile meum myrrha et aloe et cinnamomo.

18. veni inebriemur uberibus donec inlucescat dies et fruamur cupitis amplexibus

18. Veni, inebriemur voluptatibus, usque mane fruamur amoribus.

19. non est enim vir in domo sua abiit via longissima

19. Non est enim vir in domo sua; abiit via longissima,

20. sacculum pecuniæ secum tulit in die plenæ lunæ reversurus est domum suam

20. sacculum pecuniae secum tulit, in die plenae lunae reversurus est in domum suam”.

21. inretivit eum multis sermonibus et blanditiis labiorum protraxit illum

21. Irretivit eum multis sermonibus et blanditiis labiorum protraxit illum.

22. statim eam sequitur quasi bos ductus ad victimam et quasi agnus lasciviens et ignorans quod ad vincula stultus trahatur

22. Stultus eam sequitur quasi bos ductus ad victimam, sicut irretitur vinculo cervus,

23. donec transfigat sagitta jecur ejus velut si avis festinet ad laqueum et nescit quia de periculo animæ illius agitur

23. donec transfigat sagitta iecur eius; velut si avis festinet ad laqueum et nescit quod de periculo animae illius agitur.

24. nunc ergo fili audi me et adtende verba oris mei

24. Nunc ergo, fili mi, audi me et attende verbis oris mei.

25. ne abstrahatur in viis illius mens tua neque decipiaris semitis ejus

25. Ne abstrahatur in viis illius mens tua, neque decipiaris semitis eius.

26. multos enim vulneratos dejecit et fortissimi quique interfecti sunt ab ea

26. Multos enim vulneratos deiecit, et fortissimi quique interfecti sunt ab ea:

27. viæ inferi domus ejus penetrantes interiora mortis

27. viae inferi domus eius penetrantes in interiora mortis.