Prophetia Ezechielis, 46
1. hæc dicit Dominus Deus porta atrii interioris quæ respicit ad orientem erit clausa sex diebus in quibus opus fit die autem sabbati aperietur sed et in die kalendarum aperietur
2. et intrabit princeps per viam vestibuli portæ de foris et stabit in limine portæ et facient sacerdotes holocaustum ejus et pacifica ejus et adorabit super limen portæ et egredietur porta autem non claudetur usque ad vesperam
3. et adorabit populus terræ ad ostium portæ illius in sabbatis et in kalendis coram Domino
4. holocaustum autem hoc offeret princeps Domino in die sabbati sex agnos inmaculatos et arietem inmaculatum
5. et sacrificium œphi per arietem agnis autem sacrificium quod dederit manus ejus et olei hin per singula œphi
6. in die autem kalendarum vitulum de armento inmaculatum et sex agni et arietes inmaculati erunt
7. et œphi per vitulum œphi quoque per arietem faciet sacrificium agnis autem sicut invenerit manus ejus et olei hin per singula œphi
8. cumque ingressurus est princeps per viam vestibuli portæ ingrediatur et per eandem viam exeat
9. et cum intrabit populus terræ in conspectu Domini in sollemnitatibus qui ingreditur per portam aquilonis ut adoret egrediatur per viam portæ meridianæ porro qui ingreditur per viam portæ meridianæ egrediatur per viam portæ aquilonis non revertetur per viam portæ per quam ingressus est sed e regione illius egredietur
10. princeps autem in medio eorum cum ingredientibus ingredietur et cum egredientibus egredietur
11. et in nundinis et in sollemnitatibus erit sacrificium œphi per vitulum et œphi per arietem agnis autem erit sacrificium sicut invenerit manus ejus et olei hin per singula œphi
12. cum autem fecerit princeps spontaneum holocaustum aut pacifica voluntaria Domino aperietur ei porta quæ respicit ad orientem et faciet holocaustum suum et pacifica sua sicut fieri solet in die sabbati et egredietur claudeturque porta postquam exierit
13. et agnum ejusdem anni inmaculatum faciet holocaustum cotidie Domino semper mane faciet illud
14. et sacrificium faciet super eo cata mane mane sextam partem œphi et de oleo tertiam partem hin ut misceatur similæ sacrificium Domino legitimum juge atque perpetuum
15. faciet agnum et sacrificium et oleum cata mane mane holocaustum sempiternum
16. hæc dicit Dominus Deus si dederit princeps donum alicui de filiis suis hereditas ejus filiorum suorum erit possidebunt ea hereditarie
17. si autem dederit legatum de hereditate sua uni servorum suorum erit illius usque ad annum remissionis et revertetur ad principem hereditas autem ejus filiis ejus erit
18. et non accipiet princeps de hereditate populi per violentiam et de possessione eorum sed de possessione sua hereditatem dabit filiis suis ut non dispergatur populus meus unusquisque a possessione sua
19. et introduxit me per ingressum qui erat ex latere portæ in gazofilacia sanctuarii ad sacerdotes quæ respiciebant ad aquilonem et erat ibi locus vergens ad occidentem
20. et dixit ad me iste est locus ubi coquent sacerdotes pro delicto et pro peccato ubi coquent sacrificium ut non efferant in atrio exteriori et sanctificetur populus
21. et eduxit me in atrium exterius et circumduxit me per quattuor angulos atrii et ecce atriolum erat in angulo atrii atriola singula per angulos atrii
22. in quattuor angulos atrii atriola disposita quadraginta cubitorum per longum et triginta per latum mensuræ unius quattuor erant
23. et paries per circuitum ambiens quattuor atriola et culinæ fabricatæ erant subter porticus per gyrum
24. et dixit ad me hæc est domus culinarum in qua coquent ministri domus Domini victimas populi