Evangelium secundum Matthaeum, 3

1. in diebus autem illis venit Johannes Baptista prædicans in deserto Judææ

1. In diebus autem illis venit Ioannes Baptista praedicans in deserto Iudaeae

2. et dicens pænitentiam agite adpropinquavit enim regnum cælorum

2. et dicens: “Paenitentiam agite; appropinquavit enim regnum caelorum”.

3. hic est enim qui dictus est per Esajam prophetam dicentem vox clamantis in deserto parate viam Domini rectas facite semitas ejus

3. Hic est enim, qui dictus est per Isaiam prophetam dicentem: “Vox clamantis in deserto: "Parate viam Domini, rectas facite semitas eius!"”.

4. ipse autem Johannes habebat vestimentum de pilis camelorum et zonam pelliciam circa lumbos suos esca autem ejus erat lucustæ et mel silvestre

4. Ipse autem Ioannes habebat vestimentum de pilis cameli et zonam pelliceam circa lumbos suos; esca autem eius erat locustae et mel silvestre.

5. tunc exiebat ad eum Hierosolyma et omnis Judæa et omnis regio circa Jordanen

5. Tunc exibat ad eum Hierosolyma et omnis Iudaea et omnis regio circa Iordanem,

6. et baptizabantur in Jordane ab eo confitentes peccata sua

6. et baptizabantur in Iordane flumine ab eo, confitentes peccata sua.

7. videns autem multos Pharisæorum et Sadducæorum venientes ad baptismum suum dixit eis progenies viperarum quis demonstravit vobis fugere a futura ira

7. Videns autem multos pharisaeorum et sadducaeorum venientes ad baptismum suum, dixit eis: “Progenies viperarum, quis demonstravit vobis fugere a futura ira?

8. facite ergo fructum dignum pænitentiæ

8. Facite ergo fructum dignum paenitentiae

9. et ne velitis dicere intra vos patrem habemus Abraham dico enim vobis quoniam potest Deus de lapidibus istis suscitare filios Abrahæ

9. et ne velitis dicere intra vos: “Patrem habemus Abraham”; dico enim vobis quoniam potest Deus de lapidibus istis suscitare Abrahae filios.

10. jam enim securis ad radicem arborum posita est omnis ergo arbor quæ non facit fructum bonum exciditur et in ignem mittitur

10. Iam enim securis ad radicem arborum posita est; omnis ergo arbor, quae non facit fructum bonum, exciditur et in ignem mittitur.

11. ego quidem vos baptizo in aqua in pænitentiam qui autem post me venturus est fortior me est cujus non sum dignus calciamenta portare ipse vos baptizabit in Spiritu Sancto et igni

11. Ego quidem vos baptizo in aqua in paenitentiam; qui autem post me venturus est, fortior me est, cuius non sum dignus calceamenta portare; ipse vos baptizabit in Spiritu Sancto et igni,

12. cujus ventilabrum in manu sua et permundabit aream suam et congregabit triticum suum in horreum paleas autem conburet igni inextinguibili

12. cuius ventilabrum in manu sua, et permundabit aream suam et congregabit triticum suum in horreum, paleas autem comburet igni inexstinguibili”.

13. tunc venit Jesus a Galilæa in Jordanen ad Johannem ut baptizaretur ab eo

13. Tunc venit Iesus a Galilaea in Iordanem ad Ioannem, ut baptizaretur ab eo.

14. Johannes autem prohibebat eum dicens ego a te debeo baptizari et tu venis ad me

14. Ioannes autem prohibebat eum dicens: “Ego a te debeo baptizari, et tu venis ad me?”.

15. respondens autem Jesus dixit ei sine modo sic enim decet nos implere omnem justitiam tunc dimisit eum

15. Respondens autem Iesus dixit ei: “Sine modo, sic enim decet nos implere omnem iustitiam”. Tunc dimittit eum.

16. baptizatus autem confestim ascendit de aqua et ecce aperti sunt ei cæli et vidit Spiritum Dei descendentem sicut columbam venientem super se

16. Baptizatus autem Iesus, confestim ascendit de aqua; et ecce aperti sunt ei caeli, et vidit Spiritum Dei descendentem sicut columbam et venientem super se.

17. et ecce vox de cælis dicens hic est Filius meus dilectus in quo mihi conplacui

17. Et ecce vox de caelis dicens: “Hic est Filius meus dilectus, in quo mihi complacui”.