Evangelium secundum Matthaeum, 15

1. tunc accesserunt ad eum ab Hierosolymis scribæ et Pharisæi dicentes

1. Tunc accedunt ad Iesum ab Hierosolymis pharisaei et scribae dicentes:

2. quare discipuli tui transgrediuntur traditionem seniorum non enim lavant manus suas cum panem manducant

2. “Quare discipuli tui transgrediuntur traditionem seniorum? Non enim lavant manus suas, cum panem manducant”.

3. ipse autem respondens ait illis quare et vos transgredimini mandatum Dei propter traditionem vestram

3. Ipse autem respondens ait illis: “Quare et vos transgredimini mandatum Dei propter traditionem vestram?

4. nam Deus dixit honora patrem et matrem et qui maledixerit patri vel matri morte moriatur

4. Nam Deus dixit: "Honora patrem tuum et matrem" et: "Qui maledixerit patri vel matri, morte moriatur".

5. vos autem dicitis quicumque dixerit patri vel matri munus quodcumque est ex me tibi proderit

5. Vos autem dicitis: “Quicumque dixerit patri vel matri: Munus est, quodcumque ex me profuerit,

6. et non honorificabit patrem suum aut matrem et irritum fecistis mandatum Dei propter traditionem vestram

6. non honorificabit patrem suum”; et irritum fecistis verbum Dei propter traditionem vestram.

7. hypocritæ bene prophetavit de vobis Esajas dicens

7. Hypocritae! Bene prophetavit de vobis Isaias dicens:

8. populus hic labiis me honorat cor autem eorum longe est a me

8. "Populus hic labiis me honorat, cor autem eorum longe est a me;

9. sine causa autem colunt me docentes doctrinas mandata hominum

9. sine causa autem colunt me docentes doctrinas mandata homi num"”.

10. et convocatis ad se turbis dixit eis audite et intellegite

10. Et convocata ad se turba, dixit eis: “Audite et intellegite:

11. non quod intrat in os coinquinat hominem sed quod procedit ex ore hoc coinquinat hominem

11. Non quod intrat in os, coinquinat hominem; sed quod procedit ex ore, hoc coinquinat hominem!”.

12. tunc accedentes discipuli ejus dixerunt ei scis quia Pharisæi audito verbo scandalizati sunt

12. Tunc accedentes discipuli dicunt ei: “Scis quia pharisaei, audito verbo, scandalizati sunt?”.

13. at ille respondens ait omnis plantatio quam non plantavit Pater meus cælestis eradicabitur

13. At ille respondens ait: “Omnis plantatio, quam non plantavit Pater meus caelestis, eradicabitur.

14. sinite illos cæci sunt duces cæcorum cæcus autem si cæco ducatum præstet ambo in foveam cadunt

14. Sinite illos: caeci sunt, duces caecorum. Caecus autem si caeco ducatum praestet, ambo in foveam cadent”.

15. respondens autem Petrus dixit ei edissere nobis parabolam istam

15. Respondens autem Petrus dixit ei: “Edissere nobis parabolam istam”.

16. at ille dixit adhuc et vos sine intellectu estis

16. At ille dixit: “Adhuc et vos sine intellectu estis?

17. non intellegitis quia omne quod in os intrat in ventrem vadit et in secessum emittitur

17. Non intellegitis quia omne quod in os intrat, in ventrem vadit et in secessum emittitur?

18. quæ autem procedunt de ore de corde exeunt et ea coinquinant hominem

18. Quae autem procedunt de ore, de corde exeunt, et ea coinquinant hominem.

19. de corde enim exeunt cogitationes malæ homicidia adulteria fornicationes furta falsa testimonia blasphemiæ

19. De corde enim exeunt cogitationes malae, homicidia, adulteria, fornicationes, furta, falsa testimonia, blasphemiae.

20. hæc sunt quæ coinquinant hominem non lotis autem manibus manducare non coinquinat hominem

20. Haec sunt, quae coinquinant hominem; non lotis autem manibus manducare non coinquinat hominem”.

21. et egressus inde Jesus secessit in partes Tyri et Sidonis

21. Et egressus inde Iesus, secessit in partes Tyri et Sidonis.

22. et ecce mulier chananea a finibus illis egressa clamavit dicens ei miserere mei Domine Fili David filia mea male a dæmonio vexatur

22. Et ecce mulier Chananaea a finibus illis egressa clamavit dicens: “Miserere mei, Domine, fili David! Filia mea male a daemonio vexatur”.

23. qui non respondit ei verbum et accedentes discipuli ejus rogabant eum dicentes dimitte eam quia clamat post nos

23. Qui non respondit ei verbum. Et accedentes discipuli eius rogabant eum dicentes: “Dimitte eam, quia clamat post nos”.

24. ipse autem respondens ait non sum missus nisi ad oves quæ perierunt domus Israël

24. Ipse autem respondens ait: “Non sum missus nisi ad oves, quae perierunt domus Israel”.

25. at illa venit et adoravit eum dicens Domine adiuva me

25. At illa venit et adoravit eum dicens: “Domine, adiuva me!”.

26. qui respondens ait non est bonum sumere panem filiorum et mittere canibus

26. Qui respondens ait: “Non est bonum sumere panem filiorum et mittere catellis”.

27. at illa dixit etiam Domine nam et catelli edunt de micis quæ cadunt de mensa dominorum suorum

27. At illa dixit: “Etiam, Domine, nam et catelli edunt de micis, quae cadunt de mensa dominorum suorum”.

28. tunc respondens Jesus ait illi o mulier magna est fides tua fiat tibi sicut vis et sanata est filia illius ex illa hora

28. Tunc respondens Iesus ait illi: “O mulier, magna est fides tua! Fiat tibi, sicut vis”. Et sanata est filia illius ex illa hora.

29. et cum transisset inde Jesus venit secus mare Galilææ et ascendens in montem sedebat ibi

29. Et cum transisset inde, Iesus venit secus mare Galilaeae et ascendens in montem sedebat ibi.

30. et accesserunt ad eum turbæ multæ habentes secum mutos clodos cæcos debiles et alios multos et projecerunt eos ad pedes ejus et curavit eos

30. Et accesserunt ad eum turbae multae habentes secum claudos, caecos, debiles, mutos et alios multos et proiecerunt eos ad pedes eius, et curavit eos,

31. ita ut turbæ mirarentur videntes mutos loquentes clodos ambulantes cæcos videntes et magnificabant Deum Israël

31. ita ut turba miraretur videntes mutos loquentes, debiles sanos et claudos ambulantes et caecos videntes. Et magnificabant Deum Israel.

32. Jesus autem convocatis discipulis suis dixit misereor turbæ quia triduo jam perseverant mecum et non habent quod manducent et dimittere eos jejunos nolo ne deficiant in via

32. Iesus autem convocatis discipulis suis dixit: “Misereor turbae, quia triduo iam perseverant mecum et non habent, quod manducent; et dimittere eos ieiunos nolo, ne forte deficiant in via”.

33. et dicunt ei discipuli unde ergo nobis in deserto panes tantos ut saturemus turbam tantam

33. Et dicunt ei discipuli: “Unde nobis in deserto panes tantos, ut saturemus turbam tantam?”.

34. et ait illis Jesus quot panes habetis at illi dixerunt septem et paucos pisciculos

34. Et ait illis Iesus: “Quot panes habetis?”. At illi dixerunt: “Septem et paucos pisciculos”.

35. et præcepit turbæ ut discumberet super terram

35. Et praecepit turbae, ut discumberet super terram;

36. et accipiens septem panes et pisces et gratias agens fregit et dedit discipulis suis et discipuli dederunt populo

36. et accipiens septem panes et pisces et gratias agens fregit et dedit discipulis, discipuli autem turbis.

37. et comederunt omnes et saturati sunt et quod superfuit de fragmentis tulerunt septem sportas plenas

37. Et comederunt omnes et saturati sunt; et, quod superfuit de fragmentis, tulerunt septem sportas plenas.

38. erant autem qui manducaverant quattuor milia hominum extra parvulos et mulieres

38. Erant autem, qui manducaverant, quattuor milia hominum extra mulieres et parvulos.

39. et dimissa turba ascendit in naviculam et venit in fines Magedan

39. Et dimissis turbis, ascendit in naviculam et venit in fines Magadan.