Apocalypsis Ioannis, 22
1. et ostendit mihi fluvium aquæ vitæ splendidum tamquam cristallum procedentem de sede Dei et agni
1. Et ostendit mihi fluvium aquae vitae splendidum tamquam crystallum, procedentem de throno Dei et Agni.
2. in medio plateæ ejus et ex utraque parte fluminis lignum vitæ adferens fructus duodecim per menses singula reddentia fructum suum et folia ligni ad sanitatem gentium
2. In medio plateae eius et fluminis ex utraque parte lignum vitae afferens fructus duodecim, per menses singulos reddens fructum suum; et folia ligni ad sanitatem gentium.
3. et omne maledictum non erit amplius et sedes Dei et agni in illa erunt et servi ejus servient illi
3. Et omne maledictum non erit amplius. Et thronus Dei et Agni in illa erit; et servi eius servient illi
4. et videbunt faciem ejus et nomen ejus in frontibus eorum
4. et videbunt faciem eius, et nomen eius in frontibus eorum.
5. et nox ultra non erit et non egebunt lumine lucernæ neque lumine solis quoniam Dominus Deus inluminat illos et regnabunt in sæcula sæculorum
5. Et nox ultra non erit, et non egent lumine lucernae neque lumine solis, quoniam Dominus Deus illuminabit super illos, et regnabunt in saecula saeculorum.
6. et dixit mihi hæc verba fidelissima et vera sunt et Dominus Deus spirituum prophetarum misit angelum suum ostendere servis suis quæ oportet fieri cito
6. Et dixit mihi: “Haec verba fidelissima et vera sunt, et Dominus, Deus spirituum prophetarum, misit angelum suum ostendere servis suis, quae oportet fieri cito.
7. et ecce venio velociter beatus qui custodit verba prophetiæ libri hujus
7. Et ecce venio velociter. Beatus, qui servat verba prophetiae libri huius”.
8. et ego Johannes qui audivi et vidi hæc et postquam audissem et vidissem cecidi ut adorarem ante pedes angeli qui mihi hæc ostendebat
8. Et ego Ioannes, qui audivi et vidi haec. Et postquam audissem et vidissem, cecidi, ut adorarem ante pedes angeli, qui mihi haec ostendebat.
9. et dicit mihi vide ne feceris conservus tuus sum et fratrum tuorum prophetarum et eorum qui servant verba libri hujus Deum adora
9. Et dicit mihi: “Vide, ne feceris. Conservus tuus sum et fratrum tuorum prophetarum et eorum, qui servant verba libri huius; Deum adora!”.
10. et dicit mihi ne signaveris verba prophetiæ libri hujus tempus enim prope est
10. Et dicit mihi: “Ne signaveris verba prophetiae libri huius; tempus enim prope est!
11. qui nocet noceat adhuc et qui in sordibus est sordescat adhuc et justus justitiam faciat adhuc et sanctus sanctificetur adhuc
11. Qui nocet, noceat adhuc; et, qui sordidus est, sordescat adhuc; et iustus iustitiam faciat adhuc; et sanctus sanctificetur adhuc.
12. ecce venio cito et merces mea mecum est reddere unicuique secundum opera sua
12. Ecce venio cito, et merces mea mecum est, reddere unicuique sicut opus eius est.
13. ego Alpha et Omega primus et novissimus principium et finis
13. Ego Alpha et Omega, primus et novissimus, principium et finis.
14. beati qui lavant stolas suas ut sit potestas eorum in ligno vitæ et portis intrent in civitatem
14. Beati, qui lavant stolas suas, ut sit potestas eorum super lignum vitae, et per portas intrent in civitatem.
15. foris canes et venefici et inpudici et homicidæ et idolis servientes et omnis qui amat et facit mendacium
15. Foris canes et venefici et impudici et homicidae et idolis servientes et omnis, qui amat et facit mendacium!
16. ego Jesus misi angelum meum testificari vobis hæc in ecclesiis ego sum radix et genus David stella splendida et matutina
16. Ego Iesus misi angelum meum testificari vobis haec super ecclesiis. Ego sum radix et genus David, stella splendida matutina”.
17. et Spiritus et sponsa dicunt veni et qui audit dicat veni et qui sitit veniat qui vult accipiat aquam vitæ gratis
17. Et Spiritus et sponsa dicunt: “Veni!”. Et, qui audit, dicat: “Veni!”. Et, qui sitit, veniat; qui vult, accipiat aquam vitae gratis.
18. contestor ego omni audienti verba prophetiæ libri hujus si quis adposuerit ad hæc adponet Deus super illum plagas scriptas in libro isto
18. Contestor ego omni audienti verba prophetiae libri huius: Si quis apposuerit ad haec, apponet Deus super illum plagas scriptas in libro isto;
19. et si quis deminuerit de verbis libri prophetiæ hujus auferet Deus partem ejus de ligno vitæ et de civitate sancta et de his quæ scripta sunt in libro isto
19. et si quis abstulerit de verbis libri prophetiae huius, auferet Deus partem eius de ligno vitae et de civitate sancta, de his, quae scripta sunt in libro isto.
20. dicit qui testimonium perhibet istorum etiam venio cito amen veni Domine Jesu
20. Dicit, qui testimonium perhibet istorum: “Etiam, venio cito”. “Amen. Veni, Domine Iesu!”.
21. gratia Domini nostri Jesu Christi cum omnibus
21. Gratia Domini Iesu cum omnibus.
