Evangelium secundum Marcum, 15

1. et confestim mane consilium facientes summi sacerdotes cum senioribus et scribis et universo concilio vincientes Jesum duxerunt et tradiderunt Pilato

1. Et confestim mane consilium facientes summi sacerdotes cum senioribus et scribis, id est universum concilium, vincientes Iesum duxerunt et tradiderunt Pilato.

2. et interrogavit eum Pilatus tu es rex Judæorum at ille respondens ait illi tu dicis

2. Et interrogavit eum Pilatus: “Tu es rex Iudaeorum?”. At ille respondens ait illi: “Tu dicis”.

3. et accusabant eum summi sacerdotes in multis

3. Et accusabant eum summi sacerdotes in multis.

4. Pilatus autem rursum interrogavit eum dicens non respondes quicquam vide in quantis te accusant

4. Pilatus autem rursum interrogabat eum dicens: “Non respondes quidquam? Vide in quantis te accusant”.

5. Jesus autem amplius nihil respondit ita ut miraretur Pilatus

5. Iesus autem amplius nihil respondit, ita ut miraretur Pilatus.

6. per diem autem festum dimittere solebat illis unum ex vinctis quemcumque petissent

6. Per diem autem festum dimittere solebat illis unum ex vinctis, quem peterent.

7. erat autem qui dicebatur Barabbas qui cum seditiosis erat vinctus qui in seditione fecerant homicidium

7. Erat autem qui dicebatur Barabbas, vinctus cum seditiosis, qui in seditione fecerant homicidium.

8. et cum ascendisset turba cœpit rogare sicut semper faciebat illis

8. Et cum ascendisset turba, coepit rogare, sicut faciebat illis.

9. Pilatus autem respondit eis et dixit vultis dimittam vobis regem Judæorum

9. Pilatus autem respondit eis et dixit: “Vultis dimittam vobis regem Iudaeorum?”.

10. sciebat enim quod per invidiam tradidissent eum summi sacerdotes

10. Sciebat enim quod per invidiam tradidissent eum summi sacerdotes.

11. pontifices autem concitaverunt turbam ut magis Barabban dimitteret eis

11. Pontifices autem concitaverunt turbam, ut magis Barabbam dimitteret eis.

12. Pilatus autem iterum respondens ait illis quid ergo vultis faciam regi Judæorum

12. Pilatus autem iterum respondens aiebat illis: “Quid ergo vultis faciam regi Iudaeorum?”.

13. at illi iterum clamaverunt crucifige eum

13. At illi iterum clamaverunt: “Crucifige eum!”.

14. Pilatus vero dicebat eis quid enim mali fecit at illi magis clamabant crucifige eum

14. Pilatus vero dicebat eis: “Quid enim mali fecit?”. At illi magis clamaverunt: “Crucifige eum!”.

15. Pilatus autem volens populo satisfacere dimisit illis Barabban et tradidit Jesum flagellis cæsum ut crucifigeretur

15. Pilatus autem, volens populo satisfacere, dimisit illis Barabbam et tradidit Iesum flagellis caesum, ut crucifigeretur.

16. milites autem duxerunt eum intro in atrium prætorii et convocant totam cohortem

16. Milites autem duxerunt eum intro in atrium, quod est praetorium, et convocant totam cohortem.

17. et induunt eum purpuram et inponunt ei plectentes spineam coronam

17. Et induunt eum purpuram et imponunt ei plectentes spineam coronam;

18. et cœperunt salutare eum have rex Judæorum

18. et coeperunt salutare eum: “Ave, rex Iudaeorum!”,

19. et percutiebant caput ejus harundine et conspuebant eum et ponentes genua adorabant eum

19. et percutiebant caput eius arundine et conspuebant eum et ponentes genua adorabant eum.

20. et postquam inluserunt ei exuerunt illum purpuram et induerunt eum vestimentis suis et educunt illum ut crucifigerent eum

20. Et postquam illuserunt ei, exuerunt illum purpuram et induerunt eum vestimentis suis. Et educunt illum, ut crucifigerent eum.

21. et angariaverunt prætereuntem quempiam Simonem Cyreneum venientem de villa patrem Alexandri et Rufi ut tolleret crucem ejus

21. Et angariant praetereuntem quempiam Simonem Cyrenaeum venientem de villa, patrem Alexandri et Rufi, ut tolleret crucem eius.

22. et perducunt illum in Golgotha locum quod est interpretatum Calvariæ locus

22. Et perducunt illum in Golgotha locum, quod est interpretatum Calvariae locus.

23. et dabant ei bibere murratum vinum et non accepit

23. Et dabant ei myrrhatum vinum; ille autem non accepit.

24. et crucifigentes eum diviserunt vestimenta ejus mittentes sortem super eis quis quid tolleret

24. Et crucifigunt eum et dividunt vestimenta eius, mittentes sortem super eis, quis quid tolleret.

25. erat autem hora tertia et crucifixerunt eum

25. Erat autem hora tertia, et crucifixerunt eum.

26. et erat titulus causæ ejus inscriptus rex Judæorum

26. Et erat titulus causae eius inscriptus: “Rex Iudaeorum”.

27. et cum eo crucifigunt duos latrones unum a dextris et alium a sinistris ejus

27. Et cum eo crucifigunt duos latrones, unum a dextris et alium a sinistris eius.

28. et adimpleta est scriptura quæ dicit et cum iniquis reputatus est

28. Et praetereuntes blasphemabant eum moventes capita sua et dicentes: “Vah, qui destruit templum et in tribus diebus aedificat;

29. et prætereuntes blasphemabant eum moventes capita sua et dicentes va qui destruit templum et in tribus diebus ædificat

29. []

30. salvum fac temet ipsum descendens de cruce

30. salvum fac temetipsum descendens de cruce!”.

31. similiter et summi sacerdotes ludentes ad alterutrum cum scribis dicebant alios salvos fecit se ipsum non potest salvum facere

31. Similiter et summi sacerdotes ludentes ad alterutrum cum scribis dicebant: “Alios salvos fecit, seipsum non potest salvum facere.

32. Christus rex Israël descendat nunc de cruce ut videamus et credamus et qui cum eo crucifixi erant conviciabantur ei

32. Christus rex Israel descendat nunc de cruce, ut videamus et credamus”. Etiam qui cum eo crucifixi erant, conviciabantur ei.

33. et facta hora sexta tenebræ factæ sunt per totam terram usque in horam nonam

33. Et, facta hora sexta, tenebrae factae sunt per totam terram usque in horam nonam.

34. et hora nona exclamavit Jesus voce magna dicens Heloi Heloi lama sabacthani quod est interpretatum Deus meus Deus meus ut quid dereliquisti me

34. Et hora nona exclamavit Iesus voce magna: “Heloi, Heloi, lema sabacthani?”, quod est interpretatum: “Deus meus, Deus meus, ut quid dereliquisti me?”.

35. et quidam de circumstantibus audientes dicebant ecce Heliam vocat

35. Et quidam de circumstantibus audientes dicebant: “Ecce, Eliam vocat”.

36. currens autem unus et implens spongiam aceto circumponensque calamo potum dabat ei dicens sinite videamus si veniat Helias ad deponendum eum

36. Currens autem unus et implens spongiam aceto circumponensque calamo potum dabat ei dicens: “Sinite, videamus, si veniat Elias ad deponendum eum”.

37. Jesus autem emissa voce magna exspiravit

37. Iesus autem, emissa voce magna, exspiravit.

38. et velum templi scissum est in duo a sursum usque deorsum

38. Et velum templi scissum est in duo a sursum usque deorsum.

39. videns autem centurio qui ex adverso stabat quia sic clamans exspirasset ait vere homo hic Filius Dei erat

39. Videns autem centurio, qui ex adverso stabat, quia sic clamans exspirasset, ait: “Vere homo hic Filius Dei erat”.

40. erant autem et mulieres de longe aspicientes inter quas et Maria Magdalene et Maria Jacobi minoris et Joseph mater et Salome

40. Erant autem et mulieres de longe aspicientes, inter quas et Maria Magdalene et Maria Iacobi minoris et Iosetis mater et Salome,

41. et cum esset in Galilæa sequebantur eum et ministrabant ei et aliæ multæ quæ simul cum eo ascenderant Hierosolyma

41. quae, cum esset in Galilaea, sequebantur eum et ministrabant ei, et aliae multae, quae simul cum eo ascenderant Hierosolymam.

42. et cum jam sero esset factum quia erat parasceve quod est ante sabbatum

42. Et cum iam sero esset factum, quia erat Parasceve, quod est ante sabbatum,

43. venit Joseph ab Arimathia nobilis decurio qui et ipse erat expectans regnum Dei et audacter introjit ad Pilatum et petiit corpus Jesu

43. venit Ioseph ab Arimathaea nobilis decurio, qui et ipse erat exspectans regnum Dei, et audacter introivit ad Pilatum et petiit corpus Iesu.

44. Pilatus autem mirabatur si jam obisset et accersito centurione interrogavit eum si jam mortuus esset

44. Pilatus autem miratus est si iam obisset, et, accersito centurione, interrogavit eum si iam mortuus esset,

45. et cum cognovisset a centurione donavit corpus Joseph

45. et, cum cognovisset a centurione, donavit corpus Ioseph.

46. Joseph autem mercatus sindonem et deponens eum involvit sindone et posuit eum in monumento quod erat excisum de petra et advolvit lapidem ad ostium monumenti

46. Is autem mercatus sindonem et deponens eum involvit sindone et posuit eum in monumento, quod erat excisum de petra, et advolvit lapidem ad ostium monumenti.

47. Maria autem Magdalene et Maria Joseph aspiciebant ubi poneretur

47. Maria autem Magdalene et Maria Iosetis aspiciebant, ubi positus esset.